தோனி, கபில்தேவ் வெற்றிகள் பக்கத்தில் கூட இந்த டி20 உலககோப்பை வெற்றியால் வர முடியாது- மஞ்சுரேக்கர்

மும்பை: இந்திய அணியின் 2024 மற்றும் 2026 டி20 உலகக் கோப்பை வெற்றிகள், 50 ஓவர் உலகக் கோப்பைப் பட்டங்களுக்கு ஈடாகாது" என முன்னாள் இந்திய பேட்ஸ்மேன் சஞ்சய் மஞரேக்கர் தெரிவித்துள்ளார். சமீபத்தில் நிறைவடைந்த தொடரில் கோப்பையை வென்ற இந்திய அணி, தொடர்ச்சியாக இரண்டு டி20 உலகக் கோப்பைகளை வென்ற முதல் அணியாகவும், சொந்த மண்ணில் டி20 உலகக் கோப்பையை வென்ற முதல் அணியாகவும் பெருமை பெற்றது.

இதற்கு முன்னர், 2007 ஆம் ஆண்டு நடைபெற்ற முதலாவது டி20 உலகக் கோப்பையையும் இந்திய அணி வென்றிருந்தது. இதன் மூலம், டி20 உலகக் கோப்பை வரலாற்றில் மூன்று பட்டங்களை வென்ற ஒரே அணியாக இந்தியா திகழ்கிறது. இந்திய அணி 1983ல் கபில் தேவ் தலைமையிலும், 2011ல் எம்.எஸ். தோனி தலைமையிலும் இரண்டு ஒருநாள் உலகக் கோப்பைகளைப் பெற்றது.

2026 டி20 உலகக் கோப்பை வெற்றியின் இரண்டு நாட்களுக்குப் பிறகு, இந்தியாவின் ஐசிசி சாதனைகள் குறித்து தனது எக்ஸ் கணக்கில் மஞரேக்கர் பதிவிட்டார். அதில், "ஒவ்வொரு ஆண்டும் வழங்கப்படும் இந்த உலகப் பட்டங்களை காலப்போக்கில் சரியான கண்ணோட்டத்தில் பார்க்க வேண்டும். சவால் மற்றும் அதன் புனிதத்தைப் பொறுத்தவரை, இந்தியாவின் டி20 உலகக் கோப்பை வெற்றிகள் 1983 கபில்தேவ் தலைமையிலான ஒருநாள் உலகக் கோப்பை மற்றும் 2011 தோனி தலைமையிலான ஒருநாள் உலகக் கோப்பை வெற்றிகளுக்கு நெருக்கமாகக்கூட வரவில்லை" என தெரிவித்துள்ளார்.

கடந்த ஐந்து ஆண்டுகளில் இது நான்காவது டி20 உலகக் கோப்பை எனவும், ஒரே ஒரு ஒருநாள் உலகக் கோப்பை மட்டுமே நடந்துள்ளதையும் அவர் சுட்டிக்காட்டினார்.மேலும், நான்கு முக்கிய ஐசிசி தொடர்களுக்கான தனது முக்கியத்துவ வரிசையையும் சஞ்சய் மஞரேக்கர் பகிர்ந்துள்ளார். அவர் ஒருநாள் உலகக் கோப்பையை முதலிடத்திலும், உலக டெஸ்ட் சாம்பியன்ஷிப்பை இரண்டாவது இடத்திலும் வைத்தார்.

டி20 உலகக் கோப்பையை மூன்றாவது இடத்திற்கும், சாம்பியன்ஸ் டிராபியை ஐசிசி தொடர்களில் கடைசி இடத்திற்கும் அவர் இடம்பெயர்த்தார். தற்போது, ஆஸ்திரேலியா ஒருநாள் உலகக் கோப்பையை வைத்திருக்கிறது, தென்னாப்பிரிக்கா உலக டெஸ்ட் சாம்பியன். இந்தியா 2011 இல் கடைசியாக ஒருநாள் உலகக் கோப்பையை வென்றது. உலக டெஸ்ட் சாம்பியன்ஷிப்பில், 2021 மற்றும் 2023 இல் இறுதிப் போட்டிக்குத் தகுதி பெற்றிருந்தும், சாம்பியன் பட்டத்தை வெல்லவில்லை. சாம்பியன்ஸ் டிராபியில், ஆசிய அணி சமீபத்திய 2025 கோப்பை உட்பட, கடந்த மூன்று தொடரில் இரண்டை வென்றுள்ளது.