"ஆய்வு செய்வதாக கூறி.." -17 வயது வீராங்கனையிடம் அத்துமீறல்? தேசிய துப்பாக்கி சுடுதல் கோச் இடைநீக்கம்

ஃபரிதாபாத்: தேசிய அளவிலான துப்பாக்கிச் சுடுதல் போட்டிகளில் பங்கேற்று வரும் 17 வயது இளம் இந்திய வீராங்கனைக்கு பாலியல் தொல்லை கொடுத்ததாக எழுந்த புகாரில், பயிற்சியாளர் அங்குஷ் பரத்வாஜ் மீது போக்சோ சட்டத்தின் கீழ் போலீஸார் வழக்குப் பதிவு செய்துள்ளனர். இதனையடுத்து, அவர் உடனடியாகப் பணியிடை நீக்கம் செய்யப்பட்டுள்ளார்.

புது தில்லியில் உள்ள டாக்டர் கர்னி சிங் துப்பாக்கிச் சுடுதல் தளத்தில் தேசிய அளவிலான துப்பாக்கிச் சுடுதல் போட்டிகள் நடைபெற்றன. இப்போட்டியில் பங்கேற்பதற்காக வந்திருந்த வீராங்கனைகள் ஃபரிதாபாத் பகுதியில் உள்ள ஒரு உணவகத்தில் தங்கியிருந்தனர்.

பாதிக்கப்பட்ட 17 வயது சிறுமியின் குடும்பத்தினர் அளித்த புகாரின்படி, பயிற்சியாளர் அங்குஷ் பரத்வாஜ், அந்தச் சிறுமியின் "செயல்திறனை (Performance) ஆய்வு செய்ய வேண்டும்" எனக் கூறி ஓட்டல் அறைக்கு அழைத்துள்ளார். முதலில் ஓட்டல் வரவேற்பறையில் சந்திப்பதாகக் கூறப்பட்ட நிலையில், பின்னர் கட்டாயப்படுத்தித் தனது அறைக்கு வரவழைத்ததாகவும், அங்கு வைத்து பாலியல் ரீதியாகத் துன்புறுத்தியதாகவும் கூறப்படுகிறது.

நடந்த சம்பவத்தை வெளியே யாரிடமாவது கூறினால், "உன்னுடைய விளையாட்டு வாழ்க்கையையே அழித்துவிடுவேன்" என்றும், "குடும்பத்தினருக்கு ஆபத்து ஏற்படுத்துவேன்" என்றும் பயிற்சியாளர் அந்தச் சிறுமியை மிரட்டியதாக முதல் தகவல் அறிக்கையில் குறிப்பிடப்பட்டுள்ளது. அதிர்ச்சியில் உறைந்த அந்தச் சிறுமி, பின்னர் இதுகுறித்துத் தனது பெற்றோரிடம் தெரிவித்துள்ளார்.

ஃபரிதாபாத் மகளிர் காவல் நிலையத்தில் பயிற்சியாளர் அங்குஷ் பரத்வாஜ் மீது இரண்டு கடுமையான பிரிவுகளின் கீழ் வழக்குப் பதிவு செய்யப்பட்டுள்ளது. POCSO சட்டம் - பிரிவு 6: பாலியல் குற்றங்களிலிருந்து குழந்தைகளைப் பாதுகாக்கும் சட்டம் மற்றும் பாரதிய நியாய சம்ஹிதா (BNS) - பிரிவு 351(2): குற்றவியல் மிரட்டல் தொடர்பான பிரிவு ஆகியவற்றின் கீழ் வழக்கு பதிவு செய்யப்பட்டுள்ளது. சம்பவம் நடந்த ஓட்டலின் சிசிடிவி (CCTV) காட்சிகளை உடனடியாக ஒப்படைக்குமாறு ஓட்டல் நிர்வாகத்திற்கு போலீஸார் உத்தரவிட்டுள்ளனர்.

இந்தியத் தேசிய ரைபிள் சங்கம் நியமித்துள்ள 13 தேசிய பிஸ்டல் பயிற்சியாளர்களில் அங்குஷ் பரத்வாஜும் ஒருவர். இந்தப் புகார் வெளிவந்த உடனேயே சங்கம் அவரை இடைநீக்கம் செய்துள்ளது.

இது குறித்து NRAI பொதுச் செயலாளர் பவன் குமார் சிங் கூறுகையில், "விசாரணை முடியும் வரை அங்குஷ் பரத்வாஜ் அனைத்துப் பொறுப்புகளிலிருந்தும் இடைநீக்கம் செய்யப்படுகிறார். விளையாட்டுத் துறையில் இத்தகைய செயல்கள் ஒருபோதும் சகித்துக் கொள்ளப்படாது" என்று தெரிவித்தார்.