பாகிஸ்தான் தோற்றுவிட்டது என கொண்டாடிய இங்கிலாந்து வீரர்கள்.. உடனே தீர்ப்பை மாற்றிய அம்பயர்!

லாகூர்: பாகிஸ்தான் மற்றும் இங்கிலாந்து அணிகளுக்கு இடையே லாகூர் கடாபி மைதானத்தில் நடைபெற்ற முத்தரப்பு ஒருநாள் கிரிக்கெட் போட்டியில், டிஆர்எஸ் ரிவ்யூ பார்ப்பதில் சர்ச்சை அரங்கேறியது. போட்டி முடிந்துவிட்டது என்று நினைத்து அம்பயர்கள் மற்றும் இரு அணி வீரர்களும் களத்தில் கைகுலுக்கிக் கொண்ட பிறகு, மூன்றாவது அம்பயரின் முடிவால் மீண்டும் ஆட்டம் தொடங்கப்பட்டு, பாகிஸ்தான் அணி 1 விக்கெட் வித்தியாசத்தில் அசாத்திய வெற்றியைப் பதிவு செய்தது.

இந்த ஆட்டத்தில் 221 ரன்களுக்கு 9 விக்கெட்டுகளை இழந்து திணறிய பாகிஸ்தான் வெற்றி பெற கடைசி 35 பந்துகளில் 21 ரன்கள் தேவைப்பட்டது. அப்போது 97 ரன்களுடன் களத்தில் நின்ற ஷதாப் கானுக்கு, இங்கிலாந்து வேகப்பந்து வீச்சாளர் கஸ் அட்கின்சன் மிகத் துல்லியமான யார்க்கர் வீசினார். பந்து காலில் பட்டதும் கள அம்பயர் உடனடியாக எல்பிடபிள்யூ அவுட் கொடுத்தார். இங்கிலாந்து அணி 20 ரன்கள் வித்தியாசத்தில் வெற்றி பெற்றுவிட்டதாகக் கருதி இரு அணி வீரர்களும் மைதானத்தில் கைகுலுக்கத் தொடங்கினர். பெஞ்சில் இருந்த இங்கிலாந்து வீரர்களும் மகிழ்ச்சியுடன் களத்திற்குள் வந்துவிட்டனர். ஆனால் ஷதாப் கான் நம்பிக்கையற்ற நிலையில் பாகிஸ்தான் வசம் ரிவ்யூ மீதமுள்ளதே என்பதற்காக அம்பயரின் முடிவை ரிவ்யூ செய்யுமாறு கோரினார்.

பெரிய திரையில் டிஆர்எஸ் சோதனை செய்த போது, பந்து பேட்டின் உட்பகுதியில் உரசிச் சென்றது அல்ட்ரா எட்ஜ் கருவியில் மிகத் தெளிவாகத் தெரிந்தது. இதைப் பார்த்ததும் அம்பயர் தனது அவுட் தீர்ப்பை மாற்றிக் கொண்டார். மைதானத்திற்குள் நுழைந்த இங்கிலாந்து வீரர்கள் அதிர்ச்சியில் உறைந்து அவசர அவசரமாக பெவிலியனுக்குத் திரும்பி ஓடினர். ஹாரிஸ் ராவுப் தலையில் கைவைத்தபடி ஆச்சரியப்பட்டார்.

IND vs NZ: இந்த 24 வயது வீரர் தான் இந்திய பந்துவீச்சின் எதிர்காலம்.. தினேஷ் கார்த்திக் பாராட்டு

புதிய உயிர் பெற்ற ஷதாப் கான், அட்கின்சன் பந்துவீச்சை நாலாபுறமும் விரட்டி 2 பவுண்டரிகள் மற்றும் ஒரு சிக்சருடன் சதம் விளாசினார். கடைசி பந்தில் ஹாரிஸ் ராவுப் பவுண்டரி விரட்டி 1 விக்கெட் வித்தியாசத்தில் பாகிஸ்தானை த்ரில் வெற்றி பெற வைத்தார். ஆட்டமிழக்காமல் 113 ரன்கள் குவித்த ஷதாப் கான், ஒருநாள் கிரிக்கெட் வரலாற்றில் 8-வது வரிசையில் களமிறங்கி அதிக ரன்கள் அடித்த பேட்டர் என்ற புதிய உலக சாதனையும் படைத்தார்.