Asia Cup: அம்பயரின் தலையில் அடித்த பாகிஸ்தான் வீரர்.. குறிபார்த்து பந்தை வீசினாரா? ரசிகர்கள் விளாசல்

துபாய்: 2025 ஆசிய கோப்பை தொடரில் பாகிஸ்தான் அணி மீண்டும் ஒரு சர்ச்சையை ஏற்படுத்தி உள்ளது. இந்தியாவுடனான 'கைகுலுக்கல்' விவகாரம் இன்னும் முடிவுக்கு வராத நிலையில், ஐக்கிய அரபு அமீரகம் (UAE) அணிக்கு எதிரான போட்டியில், பாகிஸ்தான் வீரர் வீசிய பந்து தலையில் தாக்கியதால், கள நடுவர் மைதானத்தை விட்டு வெளியேறிய சம்பவம், புதிய சர்ச்சையைக் கிளப்பியுள்ளது.

துபாய் சர்வதேச மைதானத்தில் நடந்த இந்த போட்டியின் இரண்டாவது பாதியில், ஐக்கிய அரபு அமீரகம் பேட்டிங் செய்து கொண்டிருந்தபோது இந்த மோசமான சம்பவம் நிகழ்ந்தது. ஓவரின் 5வது பந்தின்போது, பாகிஸ்தான் விக்கெட் கீப்பர் முகமது ஹாரிஸ் வீசிய ஒரு த்ரோ, எதிர்பாராத விதமாக கள நடுவரான ருசிரா பள்ளியகுருகேவின் தலையின் பக்கவாட்டில் பலமாகத் தாக்கியது.

பந்து பட்ட வேகத்தில், நடுவர் வலியால் துடித்து, தனது தலையைப் பிடித்துக் கொண்டார். உடனடியாக, பாகிஸ்தான் அணியின் பிசியோக்கள் மற்றும் பந்துவீசிக் கொண்டிருந்த சயிம் அயூப் ஆகியோர் அவரிடம் ஓடிச் சென்று அவரது நிலைமையைச் சோதித்தனர். தலையில் ஏற்பட்ட காயத்தால், அவர் தொடர்ந்து போட்டியில் நடுவராகப் பணியாற்ற முடியாத நிலையில் இருப்பதாக மருத்துவர்கள் அறிவித்ததைத் தொடர்ந்து, ருசிரா பள்ளியகுருகே மைதானத்தை விட்டு வெளியேறினார். அவருக்குப் பதிலாக, இந்தப் போட்டிக்கு மாற்று நடுவராக இருந்த காசி சோஹேல், கள நடுவராகப் பொறுப்பேற்றார்.

இணையத்தில் வெடித்த சர்ச்சை

நடுவர் காயமடைந்த இந்த வீடியோ, சமூக வலைதளங்களில் பரவி பெரும் விவாதத்தை ஏற்படுத்தியுள்ளது. இணையவாசிகள் இந்தச் சம்பவம் குறித்து இருவேறுபட்ட கருத்துக்களைப் பதிவு செய்து வருகின்றனர். ஒரு தரப்பினர் இதை ஒரு வேடிக்கையான சம்பவமாக மாற்றி, மீம்ஸ்களைப் பறக்கவிட்டனர். குறிப்பாக, இந்தியாவுடனான போட்டியில் சர்ச்சையில் சிக்கிய போட்டி நடுவர் ஆண்டி பைக்ராஃப்ட்டை இதில் தொடர்புபடுத்தி, நகைச்சுவையான பதிவுகளை வெளியிட்டனர்.

ஆனால், மற்றொரு தரப்பினர் இது வேண்டுமென்றே செய்யப்பட்ட தாக்குதல் என்று கடுமையாகக் குற்றம் சாட்டினர். பாகிஸ்தானுக்கு எதிராக சில முடிவுகள் சென்றதால், ஆத்திரத்தில் நடுவரைக் காயப்படுத்தும் நோக்கில் இந்த த்ரோ வீசப்பட்டிருக்கலாம் என்று அவர்கள் சந்தேகம் எழுப்பியுள்ளனர்.

போட்டியின் முடிவு:

முன்னதாக, இந்தப் போட்டியில் முதலில் பேட்டிங் செய்த பாகிஸ்தான் அணி, பேட்டிங்கில் தடுமாறியது. 9 ரன்களுக்கு 2 விக்கெட்டுகளை இழந்து சரிவைச் சந்தித்த அந்த அணியை, ஃபக்கர் ஜமான் (50) மற்றும் கடைசி நேரத்தில் அதிரடி காட்டிய ஷஹீன் அஃப்ரிடி (29) ஆகியோர் காப்பாற்றினர். இதனால், பாகிஸ்தான் அணி 20 ஓவர்களில் 9 விக்கெட் இழப்பிற்கு 146 ரன்கள் எடுத்தது. ஐக்கிய அரபு அமீரகம் சார்பில், ஜுனைத் சித்திக் 4 விக்கெட்டுகளை வீழ்த்தி மிரட்டினார்.

147 ரன்கள் என்ற இலக்கைத் துரத்திய ஐக்கிய அரபு அமீரக அணி, பாகிஸ்தானின் பந்துவீச்சுக்கு முன்னால் தாக்குப்பிடிக்க முடியவில்லை. அந்த அணி 17.4 ஓவர்களில் 105 ரன்களுக்கு அனைத்து விக்கெட்டுகளையும் இழந்தது. இதன் மூலம், பாகிஸ்தான் அணி 41 ரன்கள் வித்தியாசத்தில் வெற்றி பெற்று, சூப்பர் 4 சுற்றுக்குத் தகுதி பெற்றது. இந்த வெற்றியையும் தாண்டி, நடுவர் காயமடைந்த இந்த விரும்பத்தகாத சம்பவம், பாகிஸ்தான் அணியின் மீதான சர்ச்சைகளை மேலும் அதிகரித்துள்ளது.