டி20 உலககோப்பை: பாகிஸ்தான் அணி அறிவிப்பு..முக்கிய வீரர்கள் நீக்கம்..ஐசிசி மிரட்டலுக்கு அடிப்பணிந்தது

லாகூர்: 2026 டி20 உலகக் கோப்பையில் பாகிஸ்தான் பங்கேற்குமா என்று சந்தேகம் எழுந்த நிலையில், தங்கள் அணியை அந்த நாட்டு கிரிக்கெட் வாரியம்அறிவித்துள்ளது. இந்த அணியில் சல்மான் அலி ஆகா கேப்டனாகத் தொடர்கிறார். கடந்த காலங்களில் மோசமான ஃபார்மில் இருந்தபோதிலும், அனுபவ வீரர் பாபர் அசாம் அணிக்குள் மீண்டும் இடம்பிடித்துள்ளார். ஆசியக் கோப்பை 2025- தொடரில் தடுமாறிய ஹாரிஸ் ரவுஃப் அணியிலிருந்து நீக்கப்பட்டுள்ளார். அதேபோல், பிக் பாஷ் லீக்கில் (பிபிஎல்) சோபிக்காத முகமது ரிஸ்வானும் அணியில் இடம்பெறவில்லை.

இளம் மற்றும் அனுபவம் கலந்த அணியாக பாகிஸ்தான் களமிறங்குகிறது. ஃபக்கர் ஸமான், ஷாஹிப்சாதா ஃபர்ஹான், சையாம் அயூப், பாபர் அசாம் மற்றும் கேப்டன் சல்மான் அலி ஆகா ஆகியோர் பேட்டிங்கில் முக்கியப் பங்கு வகிப்பார்கள். பந்துவீச்சில் ஷாஹீன் அஃப்ரிடி, நசீம் ஷா, முகமது வசீம் ஜூனியர் மற்றும் உஸ்மான் தாரிக் ஆகியோர் பலம் சேர்க்கின்றனர்.

இலங்கையின் தோய்வான ஆடுகளங்களில் சுழற்பந்துவீச்சாளர்களான அப்ரார் அகமது மற்றும் ஷதாப் கான் ஆகியோரின் பங்கு மிக முக்கியமானதாக இருக்கும். முகமது நவாஸ் மற்றும் ஃபஹீம் அஷ்ரஃப் ஆகியோர் ஆல்-ரவுண்டர்களாக அணியில் இடம்பிடித்துள்ளனர். மாற்று விக்கெட் கீப்பர் மற்றும் பேட்ஸ்மேனாக உஸ்மான் கான் தக்கவைக்கப்பட்டுள்ளார்.

இந்த டி20 உலகக் கோப்பைக்கான அணி, ஜனவரி 29 முதல் ஆஸ்திரேலியாவுக்கு எதிராக நடைபெறவுள்ள டி20ஐ தொடருக்காக பாகிஸ்தான் தேர்ந்தெடுத்த அணியுடன் பெருமளவு ஒத்துப்போகிறது. அதில் சல்மான் மிர்சா மட்டுமே நீக்கப்பட்டுள்ள ஒரே வீரர் ஆவார். பாகிஸ்தான் அணி குரூப் ஏ-வில் இந்தியா, அமெரிக்கா, நெதர்லாந்து மற்றும் நமீபியாவுடன் இடம்பிடித்துள்ளது. பிப்ரவரி 7 அன்று கொழும்பில் நெதர்லாந்து அணிக்கு எதிராக தனது உலகக் கோப்பை பயணத்தை பாகிஸ்தான் தொடங்குகிறது.

இதனிடையே, டி20 உலகக் கோப்பையில் பாகிஸ்தானின் பங்கேற்பு குறித்து சர்ச்சை எழுந்துள்ளது. பிசிபி தலைவர் மொஹ்சின் நக்வி, ஜனவரி 25 அன்று பாதுகாப்பு காரணங்களால் விலகிய பங்களாதேஷ் அணிக்கு ஆதரவாகப் பேசினார். பங்களாதேஷின் போட்டிகளை இலங்கைக்கு மாற்றும் கோரிக்கையை ஐசிசி நிராகரித்தது நியாயமற்றது என அவர் விமர்சித்தார். பாகிஸ்தானின் பங்கேற்பு குறித்து உறுதிப்படுத்த மறுத்த அவர், இறுதி முடிவு பாகிஸ்தான் பிரதமர் ஷெபாஸ் ஷெரீப் அவர்களால் எடுக்கப்படும் என்றார்.

உலகக் கோப்பை பங்கேற்பு குறித்த நிலைப்பாடு பற்றி பேசிய நக்வி, "உலகக் கோப்பை பங்கேற்பு குறித்த எங்கள் நிலைப்பாடு பாகிஸ்தான் அரசு எனக்கு அறிவுறுத்துவதைப் பொறுத்தது. பிரதமர் தற்போது பாகிஸ்தானில் இல்லை. அவர் திரும்பி வந்தவுடன், எங்கள் இறுதி முடிவை நான் தெரிவிக்க முடியும். இது அரசாங்கத்தின் முடிவு. நாங்கள் அவர்களைப் பின்பற்றுவோம், ஐசிசியை அல்ல" என்று திட்டவட்டமாகத் தெரிவித்தார்.

இருப்பினும், அணியை அறிவித்ததன் மூலம் பாகிஸ்தான் டி20 உலகக் கோப்பையில் பங்கேற்பதை பிசிபி ஏறக்குறைய உறுதிப்படுத்தியுள்ளது. முன்னதாக, பிசிபி வட்டாரங்கள், பாகிஸ்தானின் போட்டிகள் இலங்கையில் நடைபெறுவதால், உலகக் கோப்பையை புறக்கணிக்க எந்தக் காரணமும் இல்லை என்று தெரிவித்திருந்தன. இதே போன்று டி20 உலககோப்பையை பாகிஸ்தான் புறக்கணித்தால், கடும் நடவடிக்கை எடுக்கப்படும் என்று ஐசிசி எச்சரித்த நிலையில், தற்போது, பாகிஸ்தான் அதற்கு அடிப்பணிந்துள்ளது.

பாகிஸ்தான் டி20 உலகக் கோப்பை அணி: சல்மான் அலி ஆகா (கேப்டன்), அப்ரார் அகமது, பாபர் அசாம், ஃபஹீம் அஷ்ரஃப், ஃபக்கர் ஸமான், குவாஜா முகமது நஃபாய் (விக்கெட் கீப்பர்), முகமது நவாஸ், முகமது சல்மான் மிர்சா, நசீம் ஷா, ஷாஹிப்சாதா ஃபர்ஹான் (விக்கெட் கீப்பர்), சையாம் அயூப், ஷாஹீன் ஷா அஃப்ரிடி, ஷதப் கான், உஸ்மான் கான் (விக்கெட் கீப்பர்) மற்றும் உஸ்மான் தாரிக்.