பவுன்சர் கூட ஆட தெரியாதா? ஆர்ச்சர் பந்தில் ஆட்டமிழந்த பாபர் அசாம்.. பாகிஸ்தான் தடுமாற்றம்

லண்டன்: இங்கிலாந்து அணிக்கு எதிரான இரண்டாவது டெஸ்ட் போட்டியின் இரண்டாவது இன்னிங்ஸில், பாகிஸ்தான் அணியின் கேப்டன் பாபர் அசாமை இங்கிலாந்து வேகப்பந்து வீச்சாளர் ஜோஃப்ரா ஆர்ச்சர் வீழ்த்திய விதம் கிரிக்கெட் ரசிகர்களிடையே பெரும் விவாதத்தை ஏற்படுத்தியுள்ளது. ஆர்ச்சர் வீசிய பவுன்சரை எதிர்கொள்ள முடியாமல் பாபர் அசாம் சொற்ப ரன்களில் ஆட்டமிழந்தார்.

விரலில் ஏற்பட்ட காயம் காரணமாக லீட்ஸ் நகரில் நடைபெற்ற முதல் டெஸ்ட் போட்டியில் விளையாடாத பாபர் அசாம், காயம் குணமடைந்து இரண்டாவது போட்டியில் களம் இறங்கினார். நான்காவது நாளின் ஆட்ட நேரத் துவக்கத்தில் 4-வது வீரராக களம் இறங்கிய அவர் மீது பெரும் எதிர்பார்ப்பு நிலவியது. ஆனால், பாகிஸ்தானின் இரண்டாவது இன்னிங்ஸின் 8-வது ஓவரில் ஜோஃப்ரா ஆர்ச்சர் வீசிய வேகமான பந்துவீச்சை எதிர்கொள்ள முடியாமல் திணறினார்.

ஆர்ச்சர் வீசிய ஷார்ட் பிட்ச் பந்தை புல் ஷாட் ஆட பாபர் அசாம் முயன்றார். ஆனால், பந்து அவரது பேட்டில் சரியாக படாமல் நேராக காற்றில் எழும்பியது. அதனை இங்கிலாந்து வீராங்கனை ஜோர்டான் காக்ஸ் எவ்வித பதற்றமும் இன்றி எளிதாகப் பிடித்தார். இதனால் 8 பந்துகளில் வெறும் 6 ரன்கள் மட்டுமே எடுத்த நிலையில் பாபர் அசாம் ஆட்டமிழந்தார்.

துலீப் கோப்பை:இது தான் டா கேட்ச்..இந்திய கிரிக்கெட்டிலே இப்படி ஒரு கேட்ச் பிடித்தது கிடையாது- வீடியோ

பாகிஸ்தான் அணி இரண்டாவது இன்னிங்ஸில் பெரும் சரிவைச் சந்தித்தபோது பாபர் அசாம் மூன்றாவது விக்கெட்டாக வெளியேறினார். அவர் ஆட்டமிழந்தபோது பாகிஸ்தான் அணி 7.1 ஓவர்களில் 3 விக்கெட் இழப்பிற்கு 14 ரன்கள் எடுத்து இக்கட்டான நிலையில் இருந்தது. இங்கிலாந்துக்கு எதிரான இந்த டெஸ்ட் போட்டியில் வெற்றி பெற்று தொடரை 1-1 என சமன் செய்ய பாகிஸ்தான் அணிக்கு 389 ரன்கள் தேவையாக உள்ளது. மூன்று போட்டிகள் கொண்ட இந்தத் தொடரின் முதல் போட்டியில் பாகிஸ்தான் அணி இன்னிங்ஸ் மற்றும் 103 ரன்கள் வித்தியாசத்தில் தோல்வியடைந்தது குறிப்பிடத்தக்கது.

முன்னதாக இந்த டெஸ்ட் போட்டியின் முதல் இன்னிங்ஸில் பாகிஸ்தான் அணி வெறும் 110 ரன்களுக்கு ஆல்-அவுட் ஆனது. இதன் மூலம் இங்கிலாந்து அணி 180 ரன்கள் முன்னிலை பெற்றது. தொடர்ந்து இரண்டாவது இன்னிங்ஸை விளையாடிய இங்கிலாந்து அணியை பாகிஸ்தான் பந்துவீச்சாளர் முகமது அப்பாஸ் தனது சுழல் மற்றும் வேகத்தால் கட்டுப்படுத்தினார்.

மிகச்சிறப்பாக பந்துவீசிய முகமது அப்பாஸ் 22 ஓவர்களில் 57 ரன்கள் மட்டுமே விட்டுக்கொடுத்து 5 விக்கெட்டுகளைக் கைப்பற்றி அசத்தினார். இதன் மூலம் லார்ட்ஸ் மைதானத்தில் ஐந்து விக்கெட்டுகளை வீழ்த்திய மிக வயதான ஆசிய பந்துவீச்சாளர் என்ற வரலாற்று சாதனையை அவர் படைத்தார். அவர் எமிலியோ கே, ஹாரி புரூக், ஜேமி ஸ்மித், டான் லாரன்ஸ் மற்றும் ஒல்லி ராபின்சன் ஆகிய முக்கிய விக்கெட்டுகளை வீழ்த்தினார்.

Also Read

துலீப் கோப்பை 2026: தோனியை போல் டிஆர்எஸ் பயன்படுத்தி கெத்து காட்டிய வைபவ் சூர்யவன்ஷி

முகமது அப்பாஸின் இந்த அபார பந்துவீச்சால் இங்கிலாந்து அணி தனது இரண்டாவது இன்னிங்ஸில் 208 ரன்களுக்கு சுருண்டது. எனினும், முதல் இன்னிங்ஸ் முன்னிலையோடு சேர்த்து பாகிஸ்தான் அணிக்கு 389 ரன்கள் என்ற கடினமான இலக்கை இங்கிலாந்து நிர்ணயித்துள்ளது.