ஆசிய கோப்பைக்கான பாகிஸ்தான் அணி அறிவிப்பு.. துணை கேப்டன் அதிரடி நீக்கம்.. இளம் வீரருக்கு வாய்ப்பு

மும்பை : ஆசிய கோப்பை கிரிக்கெட் தொடருக்கான பாகிஸ்தான அணி தற்போது அறிவிக்கப்பட்டுள்ளது. இந்தியா, பாகிஸ்தான், இலங்கை உள்ளிட்ட ஆறு நாடுகள் பங்கேற்கும் ஆசிய கோப்பைத் தொடர் இம்மாதம் ஆகஸ்ட் 30ஆம் தேதி தொடங்குகிறது.

இதில் இந்தியாவும் பாகிஸ்தானும் வரும் செப்டம்பர் 2-ஆம் தேதி மோத உள்ளது. இந்த நிலையில் உலககோப்பை தொடருக்கு முன்பு ஆசிய கோப்பை நடைபெறுவதால் பெரும் முக்கியத்துவம் வாய்ந்ததாக இது கருதப்படுகிறது.

இந்த நிலையில் 17 பேர் கொண்ட பாகிஸ்தான் அணியை புதிய தேர்வு குழு தலைவர் இன்சமாம் உல் ஹக் அறிவித்திருக்கிறார். அதன்படி பாகிஸ்தான் அணியின் துணை கேப்டனாக அறிவிக்கப்பட்ட ஷான் மசூத் அதிரடியாக ஆசிய கோப்பை தொடரிலிருந்து நீக்கப்பட்டு இருக்கிறார். சான் மசூத் இதுவரை 9 போட்டிகளில் தான் விளையாடி இருக்கிறார். நடப்பாண்டில் அவர் நான்கு போட்டிகளில் விளையாடி மொத்தமே 52 ரன்கள் தான் அடித்திருக்கிறார்.

இதில் ஒரு ஆட்டத்தில் 44 ரன்கள் அதிகபட்சமாக அவர் அடித்திருந்தார். இதன் காரணமாக அவர் நீக்கப்பட்டு இருக்கிறார். இதேபோன்று பஹிம் அஷ்ரப் என்ற ஆல்ரவுண்டர் இரண்டு ஆண்டுகளுக்கு பிறகு பாகிஸ்தான் அணிக்கு திரும்பியிருக்கிறார். இது குறித்து பேசிய இன்சாமம் உல் ஹக், உலக கோப்பை தொடருக்கு பாகிஸ்தான் அணியில் வேகப்பந்து வீச்சு ஆல்ரவுண்டர் தேவை என்பதால் இந்த முடிவு எடுக்கப்பட்டிருப்பதாக கூறியுள்ளார்.

இதேபோன்று இலங்கைக்கு எதிரான தொடரில் இரட்டை சதம் விளாசிய சவுத் சக்கிலுக்கு ஆசிய கோப்பை தொடரில் இடம் கிடைத்திருக்கிறது. மேலும் இலங்கையில் நடைபெற்ற ஆசிய கோப்பை எமர்ஜிங் பிளேயர் தொடரில் இந்தியாவுக்கு எதிரான இறுதி ஆட்டத்தில் 71 பந்துகளில் 108 ரன்கள் விளாசிய இளம் வீர தாயப்புக்கு வாய்ப்பு வழங்கப்பட்டிருக்கிறது.

இதேபோன்று முன்னாள் கேப்டன் சர்பிராஸ் அகமதும் ஆசிய கோப்பை தொடரில் சேர்க்கப்படவில்லை. ஆசியக் கோப்பை தொடருக்கு முன்பு இலங்கைக்குச் சென்று மூன்று ஒரு நாள் போட்டிகளில் ஆப்கானிஸ்தான் உடன் பாகிஸ்தான் விளையாடுகிறது. அந்த தொடருக்கும் இதே அணி பங்கேற்கும் என அறிவிக்கப்பட்டுள்ளது.

பாகிஸ்தான் அணி விவரம் : பாபர் அசாம் (கேப்டன்), ஷதாப் கான், முகமது ரிஸ்வான், ஃபகர் சமான், அப்துல்லா சபிக், இமாம் உல் ஹக், சவுத் ஷகில், சல்மான் அலி அகா, இஃபிதிகார் அகமது, முகமது நவாஸ், உசாமா மிர், ஹரிஸ் ரவுஃப், நஷீம் ஷா, ஷாகின் ஆபரிடி, தயாப் தாஹிர், முகமது ஹாரிஸ், பஹிம் அஸ்ரப், முகமது வசீம்