பாகிஸ்தான் போட்ட ‘நடு விரல்’ எமோஜி ட்வீட்.. பிறந்தநாளன்று அசிங்கப்பட்ட வீரர்..கலாய்க்கும் ரசிகர்கள்

பவுலர் ஹசின் அலி

பாகிஸ்தான் அணியை சேர்ந்த இளம் வேகப்பந்து வீச்சாளர் ஹசன் அலி, இன்று தனது 27வது பிறந்தநாளை கொண்டாடுகிறார். கடந்த 2016ஆம் ஆண்டு பாகிஸ்தான் அணிக்காக அறிமுகமாகிய இவர் இதுவரை 13 டெஸ்ட் போட்டிகளில் விளையாடி 57 விக்கெட்டுகளையும், 54 ஒருநாள் போட்டிகளில் விளையாடி 83 விக்கெட்டுகளையும் எடுத்துள்ளார். டி20 போட்டிகளை பொறுத்தவரை 36 டி20 போட்டிகளில் விளையாடி 48 விக்கெட்டுகளையும் வீழ்த்தியுள்ளார். இவருக்கு கிரிக்கெட் உலகை சேர்ந்த பலரும் தற்போது வாழ்த்து தெரிவித்து வருகின்றனர்.

வாழ்த்து ட்வீட்

இந்நிலையில் பாகிஸ்தான் கிரிக்கெட் வாரியம் தெரிவித்த பிறந்தநாள் வாழ்த்துதான் பிரச்னையாகியுள்ளது. தனது அதிகாரப்பூர்வ ட்விட்டர் பக்கத்தில், ஹசன் அலி விளையாடிய போட்டிகள், விக்கெட்டுகள், சாதனைகள் என பட்டியலிட்டு வாழ்த்துக்கூறியிருந்தது. அதில் சர்வதேச விக்கெட்டுகளை எடுத்தது குறித்த விவரங்களின் முன்னால் நடுவிரல் எமோஜியை பயன்படுத்தியுள்ளது. பொதுவாக ஒருவரை ஆபாசமாக திட்டுவதற்காக இந்த நடுவிரல் எமோஜியை நெட்டிசன்கள் பயன்படுத்தி வருகின்றனர். அதனை பாகிஸ்தான் வாரியம் தவறுதலாக பயன்படுத்திவிட்டது.

வைரல் புகைப்படம்

தனது ட்வீட்டில் தவறான எமோஜி இருப்பதை உணர்ந்த பாகிஸ்தான் கிரிக்கெட் வாரியம், உடனடியாக அதனை நீக்கிவிட்டு மீண்டும் புதிதாக ஒரு வாழ்த்து ட்வீட்டை போட்டது. ஆனால் நெட்டிசன்களிடம் இருந்து அந்நாட்டு வாரியம் தப்பவில்லை. அந்த ட்வீட்டை புகைப்படம் எடுத்து இணையத்தில் வைரலாக்கி வருகின்றனர். இவ்வளவு பெரிய நிர்வாகம், இந்த தவறான எமோஜியை கூட பார்க்காமல் எப்படி பதிவிட்டது என விமர்சித்து வருகின்றனர்.

முக்கிய கடிதம்

இது ஒரு புறம் இருக்க, பாகிஸ்தான் கிரிக்கெட் வாரியம், ஐசிசி அமைப்புக்கு அனுப்பிய ஒற்றை கடிதம் உலக நாடுகளின் கவனத்தை ஈர்த்துள்ளது. அதில், 2021 - 2031 ஆண்டு காலக்கட்டத்தில் 6 ஐசிசி தொடர்களை பாகிஸ்தான் நடத்த விரும்புவதாகவும், அதற்கான மைதான விவரங்களையும் தருவதாக தெரிவித்துள்ளது.