பகையே நீ துள்ளாதே.. இவன் போகும் வழியில் நில்லாதே.. சிங்கம் ஒன்று புறப்பட்டதே... !

By Sutha

Published: Wednesday, November 13, 2013, 13:31 [IST]

மும்பை: ஆர்த்தெழுந்தன காண் புரவிகள்.. திணந்தோள் படைத்த மறவர்களே.. திரண்டு வாருங்கள்.. திமிரோடும், திணவோடும்.. தடம் பதித்து நையப்புடைக்க எங்கள் நாயகன் ஆர்ப்பரித்து எழுந்து வருகிறான் பாருங்கள்... இப்படித்தான் மனதில் வரிகள் ஓடுகின்றன.. சச்சின் மும்பையில் தனது கடைசி டெஸ்ட்டுக்கான பிராக்டிஸ் செய்ததைப் பார்க்கும்போது.

200வது டெஸ்ட்டைக் காணும் சச்சின் தனது மகன் சகிதம் மும்பையி்ல் தனது பயிற்சியில் தீவிரமாகியுள்ளார்.

மகன் அர்ஜூன் டெண்டுல்கர் அப்பாவோடு ஒட்டியபடியும், பேசியபடியும், சிரித்தபடியும், சீரியஸாக பேசியபடியும் பயிற்சியில் ஈடுபட்டுள்ள தந்தையுடன் நேரத்தைக் கழித்துக் கொண்டிருக்கிறார். மறுபக்கம் பயிற்சியாளருடன் கலந்து ஆலோசித்தபடி பயிற்சியில் ஈடுபட்டுள்ளார் சச்சின்.

200வது டெஸ்ட்.. கடைசியும் கூட

இந்தியா மேற்கு இந்தியத் தீவுகளுக்கிடையே நாளை மும்பை வாங்கடே மைதானத்தில் 2வது டெஸ்ட் போட்டி தொடங்குகிறது. இது சச்சினுக்கு 200வது டெஸ்ட் மற்றும் கடைசி கிரிக்கெட் போட்டியாகும்.

செவ்வாய்க்கிழமை முதல் பிராக்டிஸ்

நேற்று முதல் சச்சின் தனது பயிற்சியில் ஈடுபட்டுள்ளார். கூடவே மகன் அர்ஜூன் டெண்டுலகரும் மைதானத்தில் நடை போட்டு வருகிறார்.

டிக்கெட்டெல்லாம் வித்துப் போச்சுப்பா

இந்தப் போட்டியைக் காண ரசிகர்கள் தவம் இருந்து வருகின்றனர். டிக்கெட்டெல்லாம் ஏற்கனவே விற்றுத் தீர்ந்து விட்டன.. டிக்கெட்டை விற்ற இணையதளமும் டவுன் ஆகி மீண்டெழுந்து விட்டது.

கொல்கத்தாவில் சொதப்பல்

கொல்கத்தாவில் நடந்த 199வது டெஸ்ட் போட்டியின்போது வெறும் 10 ரன்களை மட்டுமே எடுத்தார் சச்சின். எனவே நாளைய போட்டியில் அவர் என்ன எடுப்பார் என்ற எதிர்பார்ப்பு அதிகரித்துள்ளது.