பேட்மிண்டன் ரசிகர்களுக்கு குட் நியூஸ்.. புதிய பெயரில் மீண்டும் வருகிறது பிரீமியர் லீக்!

பெங்களூர்: இந்தியாவில் பேட்மிண்டன் ரசிகர்களால் பெரிதும் எதிர்பார்க்கப்பட்ட பிரீமியர் பேட்மிண்டன் லீக் (PBL), கடந்த ஐந்து ஆண்டுகளாக முடங்கிக் கிடந்த நிலையில், தற்போது புத்தம் புதிய வடிவத்தில் மீண்டும் தொடங்கப்பட உள்ளதாக இந்திய பேட்மிண்டன் சங்கத்தின் (BAI) செயலாளர் சஞ்சய் மிஸ்ரா உறுதிப்படுத்தியுள்ளார். இது பேட்மிண்டன் வட்டாரத்தில் பெரும் மகிழ்ச்சியை ஏற்படுத்தியுள்ளது.

கடைசியாக 2020-ஆம் ஆண்டு நடைபெற்ற பிரீமியர் பேட்மிண்டன் லீக், கொரோனா பெருந்தொற்று காரணமாக நிறுத்தப்பட்டது. அதன் பிறகு, தொடரை மீண்டும் நடத்துவதற்கான முயற்சிகள் பலமுறை தோல்வியடைந்தன. இந்நிலையில், தொடரின் பழைய விளம்பரதாரரான 'ஸ்போர்ட்ஸ்லைவ்' நிறுவனத்துடனான உறவை முறித்துக் கொள்ள இந்திய பேட்மிண்டன் சங்கம் முடிவு செய்துள்ளது.

இதுகுறித்து சஞ்சய் மிஸ்ரா கூறுகையில், "நாங்கள் ஸ்போர்ட்ஸ்லைவ் நிறுவனத்துடன் இணைந்துதான் இந்தத் தொடரை நடத்தி வந்தோம். தொடரை மீண்டும் தொடங்கும்படி அவர்களிடம் பலமுறை கூறினோம். ஆனால், அணி உரிமையாளர்களுடனான கருத்து வேறுபாடுகளால் அவர்களால் தொடரை நடத்த முடியவில்லை. இரண்டு முறை இதே நிலை நீடித்ததால், தற்போது அவர்களுக்கு இறுதி எச்சரிக்கை விடுத்துள்ளோம். ஒப்பந்தத்தை முடித்துக் கொள்ளும்படி கூறியுள்ளோம். நாங்கள் ஓராண்டுக்குள் இந்தத் தொடரை மீண்டும் தொடங்குவோம். ஆனால், அதன் பெயர் பிபிஎல் ஆக இருக்காது, வேறு புதிய பெயரில் தொடங்கும்" என்று திட்டவட்டமாகத் தெரிவித்தார்.

புதிய பிரீமியர் பேட்மிண்டன் லீக் எப்படி இருக்கும்?

பழைய பிபிஎல் தொடரின் போட்டி வடிவத்தில் அணி உரிமையாளர்கள் மகிழ்ச்சியாக இல்லை என்றும் சஞ்சய் மிஸ்ரா குறிப்பிட்டார். முன்பு, ஒவ்வொரு போட்டியும் ஐந்து ஆட்டங்களைக் (இரண்டு ஆடவர் ஒற்றையர், மகளிர் ஒற்றையர், ஆடவர் இரட்டையர், கலப்பு இரட்டையர்) கொண்டதாக இருந்தது. இந்த வடிவத்தை மாற்றி, மேலும் விறுவிறுப்பான புதிய வடிவத்தை உருவாக்க அணி உரிமையாளர்களுடன் பேச்சுவார்த்தை நடத்தி வருவதாக அவர் கூறினார்.

"அடுத்த ஆறு மாதங்களுக்குள் புதிய தொடர் குறித்த அறிவிப்பை வெளியிடுவோம். அடுத்த ஆண்டுக்குள் நிச்சயம் புதிய பெயரில், புதிய வடிவத்தில் தொடர் தொடங்கும்," என சஞ்சய் மிஸ்ரா நம்பிக்கையுடன் தெரிவித்துள்ளார். இந்தியாவில் ஒலிம்பிக் பதக்க நம்பிக்கைகளில் ஒன்றாக விளங்கும் பேட்மிண்டன் விளையாட்டுக்கு, இந்த லீக்கின் மறுவருகை பெரும் ஊக்கத்தைக் கொடுக்கும் என எதிர்பார்க்கப்படுகிறது.