சிஎஸ்கே, ஆர்சிபி, மும்பை இந்தியன்ஸ் கதை முடிந்தது.. கூகுள் தேடலில் முன்னே வந்த பஞ்சாப் கிங்ஸ்

மும்பை: 2025-ம் ஆண்டு முடிவடையவுள்ள நிலையில், இந்த ஆண்டில் கூகுளில் அதிகம் தேடப்பட்ட விஷயங்களின் பட்டியலை கூகுள் நிறுவனம் வெளியிட்டுள்ளது. இதில் விளையாட்டு அணிகள் பிரிவில் வெளியான தகவல் ஐபிஎல் ரசிகர்களைப் பெரும் அதிர்ச்சியில் ஆழ்த்தியுள்ளது. கோப்பை வென்ற ராயல் சேலஞ்சர்ஸ் பெங்களூரு அணியோ, ஜாம்பவான் அணிகளான சென்னை சூப்பர் கிங்ஸ் மற்றும் மும்பை இந்தியன்ஸோ இந்தப் பட்டியலில் முதலிடத்தைப் பிடிக்கவில்லை. வேறு நான்கு அணிகள் முதல் 10 இடங்களில் இடம் பெற்றுள்ளன.

2025-ம் ஆண்டு ஐபிஎல் தொடர் ராயல் சேலஞ்சர்ஸ் பெங்களூரு (RCB) ரசிகர்களுக்கு ஒரு பொற்காலம். 18 வருடக் காத்திருப்புக்குப் பிறகு, பஞ்சாப் கிங்ஸை வீழ்த்தி ஆர்சிபி அணி முதல்முறையாக ஐபிஎல் கோப்பையை வென்று வரலாறு படைத்தது. விராட் கோலி, எம்.எஸ்.தோனி, ரோஹித் சர்மா போன்ற நட்சத்திரங்கள் இருந்தும், உலக அளவில் கூகுளில் அதிகம் தேடப்பட்ட விளையாட்டு அணிகள் பட்டியலில் ராயல் சேலஞ்சர்ஸ் பெங்களூரு, சென்னை சூப்பர் கிங்ஸ் மற்றும் மும்பை இந்தியன்ஸ் ஆகிய மூன்று பெரிய அணிகள் இடம்பெறவில்லை என்பது வியப்பை ஏற்படுத்தி உள்ளது.

நட்சத்திர அணிகளை பின்னுக்குத் தள்ளி, பஞ்சாப் கிங்ஸ் மற்றும் டெல்லி கேப்பிட்டல்ஸ் ஆகிய அணிகள் தான் 2025-ல் உலக அளவில் அதிகம் தேடப்பட்ட ஐபிஎல் அணிகளாக உருவெடுத்துள்ளன. இந்தப் பட்டியலில் பஞ்சாப் கிங்ஸ் 4-வது இடத்திலும், டெல்லி கேப்பிட்டல்ஸ் 5-வது இடத்திலும் உள்ளன.

2008-ல் இருந்து விளையாடி வந்தாலும், கோப்பையை வெல்லாத அணிகளாக இருந்த இவை, இந்த ஆண்டு இணையவாசிகள் மத்தியில் அதிக கவனத்தை ஈர்த்துள்ளன. குறிப்பாக இறுதிப்போட்டி வரை வந்த பஞ்சாப் கிங்ஸ் அதிகம் தேடப்பட்டுள்ளது. இவர்களுக்கு அடுத்தபடியாக குஜராத் டைட்டன்ஸ் 6-வது இடத்திலும், லக்னோ சூப்பர் ஜெயண்ட்ஸ் 7-வது இடத்திலும் உள்ளன.

உலக அளவில் நம்பர் 1 யார்?

உலக அளவில் கூகுளில் அதிகம் தேடப்பட்ட விளையாட்டு அணியாகக் கால்பந்து கிளப்பான பாரிஸ் செயின்ட்-ஜெர்மைன் (PSG FC) முதலிடத்தைப் பிடித்துள்ளது. அந்த அணியின் வீரர் உஸ்மான் டெம்பேலே இந்த ஆண்டு பாலன் டி ஓர் (Ballon d'Or) விருது வென்றது இதற்கு முக்கிய காரணமாக பார்க்கப்படுகிறது.

இரண்டாவது இடத்தில் போர்ச்சுகல் நாட்டைச் சேர்ந்த எஸ்.எல். பென்ஃபிகா (S.L. Benfica) கால்பந்து அணியும், மூன்றாவது இடத்தில் டொராண்டோ ப்ளூ ஜேஸ் (Toronto Blue Jays) என்ற பேஸ்பால் அணியும் உள்ளன.

2025-ல் உலக அளவில் அதிகம் தேடப்பட்ட டாப் 10 விளையாட்டு அணிகள்:

பாரிஸ் செயின்ட்-ஜெர்மைன் FC (கால்பந்து)
எஸ்.எல். பென்ஃபிகா (கால்பந்து)
டொராண்டோ ப்ளூ ஜேஸ் (பேஸ்பால்)
பஞ்சாப் கிங்ஸ் (கிரிக்கெட்)
டெல்லி கேப்பிட்டல்ஸ் (கிரிக்கெட்)
குஜராத் டைட்டன்ஸ் (கிரிக்கெட்)
லக்னோ சூப்பர் ஜெயண்ட்ஸ் (கிரிக்கெட்)
ஓக்லஹோமா சிட்டி தண்டர் (கூடைப்பந்து)
இந்தியானா பேசர்ஸ் (கூடைப்பந்து)
சியாட்டில் மரைனர்ஸ் (பேஸ்பால்)