சிறந்த கிரிக்கெட் வீரர் விருது... 2வது முறையாக அள்ளிய குவின்டன் டீ காக்

ஆண்டு விருதுகள் வழங்கும் விழா

தென்னாப்பிரிக்க கிரிக்கெட் வாரியத்தின் ஆண்டு விருதுகள் வழங்கும் விழா நேற்று எளிய முறையில் நடைபெற்றது. ஆண்டுதோறும் மிகவும் பிரம்மாண்டமான அளவில் நடத்தப்படும் இந்த விழா, இந்த ஆண்டு கொரோனா பாதிப்பையடுத்து மிகவும் எளிமையாக நடத்தப்பட்டுள்ளது. இதில் சிறந்த கிரிக்கெட் வீரர் விருதை ஒயிட் பால் கேப்டன் குவின்டன் டீ காக் பெற்றுள்ளார்.

2 விருதுகளை அள்ளிய குவின்டன்

27 வயதாகும் குவின்டன் டீ காக் இந்த ஆண்டிற்கான டெஸ்ட் கிரிக்கெட் வீரர் விருதையும் பெற்றுள்ளார். சிறந்த கிரிக்கெட் வீரருக்கான விருதை குவின்டன் இரண்டாவது முறையாக பெற்றுள்ளார். கடந்த 2017ல் இந்த விருதினை இவர் முதல் முறையாக பெற்றிருந்தார். கடந்த 2004 முதல் இந்த விருதுகள் தொடர்ந்து அளிக்கப்பட்டு வருகிறது.

சிறந்த வீரர் என பாராட்டு

இதனிடையே, டெஸ்ட் கிரிக்கெட்டில் குவின்டன் சிறந்த விக்கெட் கீப்பர் மற்றும் பேட்ஸ்மேன் என்று கிரிக்கெட் தென்னாப்பிரிக்காவின் ஆக்டிங் சிஇஓ ஜாக்குவஸ் ஃபால் குறிப்பிட்டுள்ளார். மேலும் குவின்டன் ஒயிட் பந்து மற்றும் சிவப்பு பந்து என இரண்டிலுமே மிகச்சிறந்த வீரராக செயல்பட்டு வருவதாகவும் அவர் கூறியுள்ளார்.

லாரா வால்வார்ட் அள்ளினார்

இதனிடையே இந்த ஆண்டிற்கான மிகச்சிறந்த கிரிக்கெட் வீராங்கனை விருது மற்றும் சிறந்த ஒருநாள் போட்டிகளின் வீராங்கனை விருதுகளை மகளிர் அணியை சேர்ந்த லாரா வால்வார்ட் தட்டி சென்றுள்ளார். இதேபோல ஆண்கள் கிரிக்கெட்டில் பௌலர் லுங்கி நிகிடி சிறந்த ஒருநாள் மற்றும் டி20 வீரர் விருதை கைகொண்டுள்ளார். டேவிட் மில்லர் ரசிகர்களின் விருப்பத்திற்குரிய வீரர் விருதை பெற்றுள்ளார்.