டிஜிட்டல் ஏஜென்சி மூலம் ரசிகர்களிடையே மோதல்.. இந்திய அணியில் பிளவுக்கு காரணம் இதான்..அஸ்வின் புகார்

சென்னை: இந்திய கிரிக்கெட்டில் அதிகரித்து வரும் பிளவுகள் குறித்து மூத்த சுழற்பந்து வீச்சாளர் ரவிச்சந்திரன் அஸ்வின் வெளிப்படையாகப் பேசியுள்ளார். சமூக வலைத்தளங்களில் தூண்டிவிடப்படும் "சூப்பர் ஸ்டார் கலாச்சாரம்" மற்றும் திட்டமிட்டு உருவாக்கப்பட்ட கதைகள் குறித்து அவர் சாடியுள்ளார். தேசிய அணியை ஒருமனதாக ஆதரித்த ரசிகர்கள், இன்று தனிப்பட்ட வீரர்களுக்கு விசுவாசமாக இருப்பதாகவும், பிரிந்து, அணி வெற்றியை விட தனிப்பட்ட வீரரின் மீதான பற்று மேலோங்கி இருப்பதாகவும் அஸ்வின் சுட்டிக்காட்டினார்.

விராட் கோலி, ரோஹித் ஷர்மா, தோனி போன்ற வீரர்களின் ரசிகர்களிடையே நடக்கும் "ரசிகர் போர்களுக்கு" இந்த கட்டமைக்கப்பட்ட கதைகளே பெருமளவு எரிபொருளாக செயல்படுகின்றன. இத்தகைய கதைகள் ஒருபோதும் தற்செயலானவை அல்ல என்று அஸ்வின் சுட்டிக்காட்டுகிறார். குறிப்பிட்ட கருத்துக்களை விதைக்க, இவர்கள் ரசிகர் மன்ற நிர்வாகிகள் முதல் டிஜிட்டல் மார்க்கெட்டிங் ஏஜென்சிகள் வரை பலரையும் பயன்படுத்துகின்றனர்.

சமூக வலைத்தளங்களின் வளர்ச்சி மற்றும் ஐ.பி.எல் போன்ற போட்டிகளின் வருகை, ஒரு கிரிக்கெட் வீரருக்கும் ரசிகர்களுக்கும் இடையிலான உறவை அடிப்படையாக மாற்றியுள்ளது. முந்தைய காலங்களில், சுனில் கவாஸ்கர் அல்லது கபில் தேவ் போன்ற நட்சத்திரங்கள் அணியின் தூண்களாகக் கருதப்பட்டு, ரசிகர்கள் இந்திய அணியை பின்தொடர்ந்தனர்.

ஆனால், 'எக்ஸ்' மற்றும் இன்ஸ்டாகிராம் போன்ற சமூக வலைத்தளங்களின் வருகை "பிராண்ட் வீரர்களை" உருவாக்கியுள்ளது. இது குறித்து பேசிய அஸ்வின், ஒரு வீரரின் தனிப்பட்ட பிராண்ட் பல மில்லியன் டாலர் தொழிலாக மாறும் போது, "இந்தியா எப்படி செயல்பட்டது?" என்ற கேள்வி "எனக்கு பிடித்த சூப்பர் ஸ்டார் எப்படி செயல்பட்டார்?" என்று மாறிவிடுகிறது. விளையாட்டின் இந்த தனிநபரை ஒட்டி ஒரு டிஜிட்டல் சூழலை உருவாக்கியுள்ளது, அங்கு அணியின் வெற்றியை விட தனிப்பட்ட சாதனைகள் பெரும் ஆரவாரத்துடன் கொண்டாடப்படுகின்றன.

இந்தக் கதைகள் ஒருபோதும் தற்செயலானவை அல்ல என்று அஸ்வின் மீண்டும் வலியுறுத்துகிறார். "டிஜிட்டல்வெளி பெரும்பாலும் உள்ளூர் ஆட்களால் கையாளப்படுகிறது. ரசிகர் மன்ற நிர்வாகிகள் முதல் தொழில்முறை டிஜிட்டல் மார்க்கெட்டிங் ஏஜென்சிகள் வரை பல்வேறு தரப்பினர், குறிப்பிட்ட கருத்துகளை வலைத்தளங்களில் திட்டமிட்டு பரப்புகின்றனர். இதன்மூலம், விவாதப் புள்ளிகளை உருவாக்கி, ஒரு தலைப்பில் குறிப்பிட்ட கருத்தைப் பேச வைக்கின்றனர்."

"இது ஒரு வீரரின் ஸ்டிரைக் ரேட்டை மட்டும் எடுத்துக்காட்டி, சக வீரரை விமர்சிப்பதற்கோ அல்லது உள்நாட்டில் அணிக்குள் ஒரு கருத்து வேறுபாடு இருப்பதுபோன்ற தோற்றத்தை ஏற்படுத்தத் தேர்ந்தெடுத்த காணொளிகளைப் பரப்புவதற்கோ பயன்படுத்தப்படலாம். இந்த கட்டமைக்கப்பட்ட கருத்து உருவாக்கத்தால் விராட் கோலி, ரோஹித் ஷர்மா, தோனி போன்ற ஆதரவாளர்களிடையே நடக்கும் "ரசிகர் சண்டைகளுக்கு காரணமாக மாறிவிடுகின்றன. "

"வீரர்களிடையே நல்லுறவு இருந்தாலும், இந்த ரசிகர்கள் முகாம்கள் 'ஒரு வீரரை உயர்த்த, இன்னொருவர் தாழ்த்தப்பட வேண்டும்' என்ற எண்ணத்துடன் செயல்படுகின்றன. இதன் விளைவாக, ஒரு நச்சுத்தன்மை கொண்ட டிஜிட்டல் சூழல் உருவாகிவிட்டது. இதில் இந்திய ரசிகர்கள் சிலர், தாங்கள் விரும்பும் நட்சத்திர வீரருக்கு "போட்டியாக"க் கருதும் சில தேசிய வீரர்களின் தோல்வியை உற்சாகமாக வரவேற்கின்றனர்."

"இந்த மனப்பான்மை தேசிய அணி என்ற கருத்தையே அரித்து, அதை போட்டியிடும் ரசிகர் பட்டாளங்களின் தொகுப்பாக மாற்றிவிடுகிறது. அணியின் ஒருமைப்பாட்டிற்கும், ஒருங்கிணைந்த விளையாட்டு மனப்பான்மைக்கும் இது பெரிய அச்சுறுத்தலாக அமைகிறது."

"இந்த தனிப்பட்ட ரசிகர் முகாம்களின் அழுத்தம் சமூக ஊடக கருத்துகளுக்கு அப்பால், அணியின் நிஜமான நிர்வாகத்திலும் தாக்கத்தை ஏற்படுத்துகிறது. ஒரு "சூப்பர் ஸ்டார்" வீரர், அவரது ஃபார்ம் அல்லது யுத்தி காரணங்களுக்காக அணியிலிருந்து நீக்கப்படும்போது, அதன் விளைவாக எழும் டிஜிட்டல் எதிர்வினை மிகக் கடுமையாக இருக்கும்."

"பி.ஆர். கண்ணிவெடிச் சுரங்கத்தில் பயணிப்பது போல, தேர்வுக் குழுவினரும் அணி நிர்வாகமும் ஒவ்வொரு முடிவையும் கவனமாக எடுக்க வேண்டியிருக்கிறது. முடிவுகள் தேவைகளைக் காட்டிலும், வீரர்களுக்கு ஆதரவாக எடுக்கப்பட்டதா என்ற கண்ணோட்டத்திலேயே ஆய்வு செய்யப்படுகின்றன. இது சுதந்திரமான மற்றும் நியாயமான முடிவுகளை எடுப்பதற்கான வாய்ப்பைக் குறைக்கிறது."

"இந்த கலாச்சாரம் வீரர்களையும் பாதிக்கிறது. "தி கிங்" விராட் கோலி அல்லது "தி ஹிட்மேன்" ரோஹித் ஷர்மா போன்ற நட்சத்திர வீரர்கள் மீது மட்டுமே கவனம் செலுத்தப்படும்போது, பெரும்பாலும் வெற்றிகளை ஈட்டித்தரும் பெயர் அறியப்படாத "சிறிய பங்களிப்பு" வீரர்களின் உழைப்பு புறக்கணிக்கப்படுகிறது."

"இது ஒரு உளவியல் பிரச்சினையை உருவாக்குகிறது. இளம் வீரர்கள், அணியின் வெற்றிக்கு தேவையானதை செய்யாமல், தனிப்பட்ட சாதனைகளை துரத்தி அதன் மூலம் தங்களுடைய சந்தை மதிப்பை உயர்த்தவே பார்க்கிறார்கள். இதற்கான கட்டாயத்தை இந்த ஆன்லைன் சமூகம் ஏற்படுத்திவிட்டது" என்று அஸ்வின் சாடியுள்ளார். இதனை எதிர்த்து தான் கம்பீரும், அஸ்வினும் துரல் கொடுத்து வருகின்றனர்.