வீரர்கள் காயத்தை தடுக்க அஸ்வின் சொன்ன யோசனை.. யாராவது பொறுப்பேற்க வேண்டும் என கருத்து

மும்பை: இந்திய கிரிக்கெட் அணி அனைத்து வகை போட்டிகளுக்கும்தனித்தனி அணிகளை களமிறக்க வேண்டிய நேரம் வந்துவிட்டது என்று முன்னாள் கிரிக்கெட் வீரர் அஸ்வின் கருத்து தெரிவித்துள்ளார். சுழற்பந்து வீச்சாளர் வருண் சக்கரவர்த்தியின் தொடர்ச்சியான காயம் தொடர்பான பிரச்சனைகளைச் சுட்டிக்காட்டி தேசிய சிறப்பு மையத்தின் செயல்பாடுகள் குறித்தும் அவர் கேள்வி எழுப்பியுள்ளார்.

ஆப்கானிஸ்தானுக்கு எதிரான முதல் டி20 போட்டியில் விளையாடிய வருண் சக்கரவர்த்திக்கு மீண்டும் காயம் ஏற்பட்டது. இங்கிலாந்து சுற்றுப்பயணத்தின் போது ஏற்பட்ட காயத்தில் இருந்து மீண்டு அவர் விளையாடிய முதல் சர்வதேச போட்டி இதுவாகும்.

ஆனால், இந்த காயத்தின் காரணமாக ஆப்கானிஸ்தான் தொடரின் எஞ்சிய போட்டிகள், ஆசிய விளையாட்டுப் போட்டிகள் மற்றும் மேற்கிந்தியத் தீவுகளுக்கு எதிரான உள்நாட்டுத் தொடர் ஆகியவற்றிலிருந்து அவர் விலக வேண்டிய கட்டாயம் ஏற்பட்டது. முன்னதாக, 2026 ஐபிஎல் தொடரிலும் வருண் சக்கரவர்த்தி பல போட்டிகளில் விளையாட முடியாமல் காயத்தால் அவதிப்பட்டார் என்பது குறிப்பிடத்தக்கது.

இதுகுறித்து தனது யூடியூப் சேனலில் பேசிய ரவிச்சந்திரன் அஸ்வின், "டெஸ்ட், ஒருநாள் மற்றும் டி20 போட்டிகளுக்கு என தனித்தனி அணிகளை உருவாக்குவதற்கான நேரம் வந்துவிட்டது என்று நான் நினைக்கிறேன். ஒன்று அல்லது இரண்டு வீரர்கள் மட்டுமே அனைத்து வடிவங்களிலும் விளையாடலாம். அதே நேரத்தில், வீரர்களின் காயம் மேலாண்மை விஷயத்தில் எங்கோ ஒரு இடத்தில் பொறுப்புகள் இருக்க வேண்டும்" என்று கூறினார்.

வருண் சக்கரவர்த்தியின் காயம் குறித்து மேலும் பேசிய அவர், "வருண் சக்கரவர்த்தி கடந்த 3, 4 மாதங்களாக தேசிய கிரிக்கெட் அகாடமியில் இருந்தார் என்பது எனக்குத் தெரியும். டிஎன்பிஎல் தொடரில் விளையாட அனுமதி கேட்டபோது அவர்கள் அவரை விடுவிக்கவில்லை. பொதுவாக ஒரு மாதத்தில் குணமடைந்து திரும்பியிருக்க வேண்டிய அவர், அங்கு 2 முதல் 3 மாதங்கள் வரை இருக்க வேண்டியதாயிற்று" என்று அஸ்வின் ஆதங்கத்தை வெளிப்படுத்தினார்.

"ஒரு வீரராக, உங்களுடைய பயிற்சி முறை சரியாக இருக்கிறதா என்பதை நீங்களும் கவனிக்க வேண்டும். நான் சரியான பயிற்சிகளைத்தான் செய்கிறேனா? என்று யோசிக்க வேண்டும். எனக்கு 2015-இல் ஏற்பட்ட விலா எலும்புப் பகுதி காயம் பளுதூக்குதல் பயிற்சியால் தான் ஏற்பட்டது. அதற்குப் பிறகு நான் 'ஸ்னாட்ச்' செய்வதை நிறுத்திவிட்டேன்," என்று அஸ்வின் கூறினார்.

"பளுதூக்குதல் பயிற்சிகள் உங்களை இன்னும் வேகமாகவும், அதிக ஆற்றல் கொண்டவராகவும் மாற்ற உதவும் என்பதில் சந்தேகமில்லை. ஆனால், குறிப்பிட்ட காயம் உங்களுக்கு ஒத்துவரவில்லை என்றால், ஒரு வீரராக நீங்கள் என்ன செய்கிறீர்கள் என்பதை கவனமாகப் பார்த்து மாற்றிக் கொள்ள வேண்டும்" என்றும் அஸ்வின் மேலும் அறிவுறுத்தினார்.