SRH vs RR: அதிரடி வீரர் இல்லாமல் களமிறங்கும் ராஜஸ்தான்.. ராயல்ஸ் வெற்றியை தடுக்குமா சன்ரைசர்ஸ்?

ஐதராபாத்: ஐபிஎல் 2026 சீசனில் ஐதராபாத் ராஜீவ் காந்தி மைதானத்தில் சன்ரைசர்ஸ் ஹைதராபாத் மற்றும் ராஜஸ்தான் ராயல்ஸ் அணிகள் இன்று மோதுகின்றன. நான்கு தொடர் அபார வெற்றிகளுடன் ராஜஸ்தான் புள்ளிப்பட்டியலில் உச்சத்திலுள்ளது. பேட்டிங், பந்துவீச்சு என இரண்டிலும் சிறந்து விளங்கும் ராஜஸ்தான், நடப்பு சீசனின் முழுமையான அணியாகத் திகழ்கிறது.

யஷஸ்வி ஜெய்ஸ்வால், இளம் வைபவ் சூர்யவன்ஷி ஆகியோரின் அதிரடித் தொடக்கம் ராஜஸ்தானின் பலம். சன்ரைசர்ஸ் அணி நான்கு போட்டிகளில் ஒரே வெற்றியுடன் தவிக்கிறது. டிராவிஸ் ஹெட், அபிஷேக் ஷர்மா சொதப்ப, இஷான் கிஷனும் தனது வலுவான தொடக்கத்தைத் தக்கவைக்கவில்லை.

சன்ரைசர்ஸின் பிரதானச் சிக்கல் பந்துவீச்சில்தான். இளம் சுழற்பந்துவீச்சு ஆல்-ரவுண்டரான ஹர்ஷ் துபேவைத் தவிர, மற்ற பந்துவீச்சாளர்கள் நம்பிக்கை அளிக்கவில்லை. போட்டிக்கான டாஸ் போடப்பட்ட போது, ராஜஸ்தான் ராயல்ஸ் அணி வென்று முதலில் பந்துவீச முடிவு செய்தது.

மேலும், சன்ரைசர்ஸ் ஹைதராபாத் இந்த சீசனில் இதுவரை இரண்டாவது பேட்டிங் செய்யவில்லை. ஐதராபாத் அணியில் இன்று ஹர்சல் பட்டேல் மற்றும் உனாட்கட் ஆகியோர் இடம்பெறவில்லை. ராஜஸ்தான் அணியில் ஹெட்மயருக்கு பதில், பிரிட்டோரியஸ் களமிறங்குகிறார். ஐதராபாத்தில் நடந்த கடந்த ஐபிஎல் 2026 போட்டியில், சன்ரைசர்ஸ் அணி 156 ரன்களுக்கு கட்டுப்படுத்தப்பட்டது. இந்த இலக்கை லக்னோ சூப்பர் ஜெயன்ட்ஸ் கடைசி ஓவரில் துரத்திப் பிடித்தது.

இருப்பினும், ராஜீவ் காந்தி சர்வதேச மைதானம் பெரும்பாலும் அதிக ரன்கள் குவிக்கப்படும் ஆட்டங்களுக்கே பெயர் பெற்றது. முன்னதாக இங்கு நடைபெற்ற SRH மற்றும் RR மோதலில், சன்ரைசர்ஸ் அணி 6 விக்கெட் இழப்புக்கு 286 ரன்கள் குவிக்க, ராஜஸ்தான் ராயல்ஸ் அணியும் 20 ஓவர்களில் 242 ரன்கள் அடித்தது குறிப்பிடத்தக்கது.

நேருக்கு நேர் மோதலில் இரு அணிகளும் இதுவரை 21 முறை விளையாடியுள்ளன. இதில் "ஆரஞ்சு ஆர்மி" என்று அழைக்கப்படும் சன்ரைசர்ஸ் அணி 12 வெற்றிகளுடன் முன்னிலை வகிக்கிறது; ராஜஸ்தான் ராயல்ஸ் 9 போட்டிகளில் வென்றுள்ளது. கடைசி நான்கு மோதல்களிலும் சன்ரைசர்ஸ் தான் வென்றது. ராஜஸ்தானின் கடைசி வெற்றி ஏப்ரல் 2023 இல் பதிவானது.