ரஜத் பட்டிதார் ஏன் இந்திய டி20யில் தேர்வு செய்யல.. இன்னும் அவர் என்ன தான் செய்யனும்? ஹர்பஜன் கேள்வி

மும்பை: இந்திய டி20 அணியில் ரஜத் படிதார் புறக்கணிக்கப்பட்டதை முன்னாள் சுழற்பந்து வீச்சாளர் ஹர்பஜன் சிங் கடுமையாக விமர்சித்துள்ளார். அயர்லாந்து மற்றும் இங்கிலாந்துக்கு எதிரான டி20 தொடருக்கான இந்திய வீரர்கள் பட்டியலில், ஆர்சிபி கேப்டன் படிதாருக்கு இடம் கிடைக்காதது முற்றிலும் நியாயமற்றது என்று அவர் சுட்டிக்காட்டியுள்ளார். சமீபத்திய ஐபிஎல் 2026 தொடரில் இவரது அதிரடியான ஆட்டம் மற்றும் சிறப்பான கேப்டன்சி இருந்தும், தேசிய அணியில் வாய்ப்பு மறுக்கப்பட்டுள்ளதை அவர் வெளிப்படையாகக் கண்டித்துள்ளார்.

ஐபிஎல் 2026 சீசனில் படிதார் மிகச்சிறந்த பார்மில் இருந்தார். எம்.எஸ். தோனி மற்றும் ரோகித் சர்மாவுக்குப் பிறகு, ஐபிஎல் வரலாற்றில் அடுத்தடுத்த சீசன்களில் கோப்பையை வென்ற மூன்றாவது கேப்டன் என்ற பெருமையைப் பெற்றார். 33 வயதான இவர், 14 இன்னிங்ஸ்களில் மொத்தம் 501 ரன்களைக் குவித்துள்ளார். 192.69 என்ற அதிரடியான ஸ்டிரைக் ரேட்டில் பேட்டிங் செய்த போதிலும், தேசிய அணியில் அவருக்கு வாய்ப்பு கிடைக்கவில்லை என்பது குறிப்பிடத்தக்கது.

இந்தத் தேர்வு குறித்து தனது அதிருப்தியை எக்ஸ் (X) தளத்தில் ஹர்பஜன் சிங், "இந்திய அணியில் ரஜத் படிதார் இல்லாதது வருத்தமளிக்கிறது. அவர் இன்னும் என்ன செய்ய வேண்டும்? 501 ரன்கள், கிட்டத்தட்ட 200 ஸ்டிரைக் ரேட். இது நியாயமற்றது. இந்தியாவின் மிகச்சிறந்த மிடில் ஆர்டர் பேட்ஸ்மேன் இவர்தான், நல்ல தொழில்நுட்பத்தைக் கொண்ட நபர்" என்று பதிவிட்டுள்ளார்.

சூர்யகுமார் கேப்டன் பதவியிலிருந்து நீக்கப்பட்டதற்கு அஸ்வின் கண்டனம்.. தவறான முடிவு என கருத்து

படிதாருக்கு வாய்ப்பு மறுக்கப்பட்ட நிலையில், நீண்ட இடைவெளிக்குப் பிறகு ஸ்ரேயாஸ் ஐயர் அணியில் திரும்பியுள்ளார். மேலும், சூரியகுமார் யாதவிடமிருந்து கேப்டன் பதவியைப் பெற்றுள்ளார். அதேபோல், அதிரடி தொடக்க ஆட்டக்காரர் வைபவ் சூர்யவன்ஷி மற்றும் வேகப்பந்து வீச்சாளர் பிரின்ஸ் யாதவ் ஆகியோர் முதன்முறையாகத் டி20 அணியில் சேர்க்கப்பட்டுள்ளனர்.

இந்தத் தேர்வுக் குழுவின் முடிவு குறித்து இந்தியத் தலைமை தேர்வாளர் அஜித் அகர்கர் விளக்கமளித்துள்ளார். அணியில் 15 பேரை மட்டுமே தேர்வு செய்ய முடியும் என்பதால், தகுதியுள்ள வீரர்களுக்கு வாய்ப்பு வழங்க இயலாத சூழல் உருவாவதாக அவர் குறிப்பிட்டார். இது குறித்து பேசிய அவர், "எப்போதும் சிலர் வெளியே இருக்கத்தான் செய்வார்கள், ஆனால் 15 பேரை மட்டுமே நம்மால் எடுக்க முடியும். நாங்கள் இந்தத் தேர்வு குறித்த குழுவில் திருப்தியாக உள்ளோம்" என்றார்.

உலககோப்பை வென்ற கேப்டன் சூர்யகுமாரை நீக்குவது சுலபமாக இல்லை.. எதிர்காலத்தை நோக்கி முடிவு- அகர்கர்

தனது டி20 பயணத்தில் 106 இன்னிங்ஸ்களில் இருந்து 3389 ரன்களை படிதார் சேர்த்துள்ளார். 35.30 சராசரி மற்றும் 160.08 ஸ்டிரைக் ரேட் வைத்திருக்கும் இவர், தற்போது மத்திய பிரதேச பிரீமியர் லீக் 2026-ல் குவாலியர் சீட்டாஸ் அணிக்காக விளையாடி வருகிறார்.