“ஏற்கனவே பல ரசிகர்களை இழந்துவிட்டனர்”.. பாகிஸ்தான் அணிக்கு நேர்ந்த கதி.. ரமீஸ் ராஜா வார்னிங்

கராச்சி: பாகிஸ்தான் கிரிக்கெட் அணி தங்களது மோசமான செயல்பாடுகளால் தொடர்ந்து ரசிகர்களை இழந்து வருவதாக பாகிஸ்தான் கிரிக்கெட் வாரியத்தின் முன்னாள் தலைவர் ரமீஸ் ராஜா எச்சரித்துள்ளார். கடந்த வாரம் லீட்ஸ் மைதானத்தில் நடந்த இங்கிலாந்து அணிக்கு எதிரான முதலாவது டெஸ்ட் போட்டியில் பாகிஸ்தான் அணி இன்னிங்ஸ் மற்றும் 103 ரன்கள் வித்தியாசத்தில் படுதோல்வி அடைந்தது. இந்நிலையில், லார்ட்ஸ் மைதானத்தில் இரண்டாவது டெஸ்ட் போட்டி வியாழக்கிழமை, ஆகஸ்ட் 27 அன்று தொடங்க உள்ள நிலையில் ரமீஸ் ராஜாவின் இந்தக் கருத்துக்கள் வெளியாகியுள்ளன.

இங்கிலாந்து முன்னாள் கேப்டன்கள் அலஸ்டர் குக் மற்றும் மைக்கேல் வாகன் ஆகியோர் இணைந்து நடத்திய பாட்காஸ்ட் நிகழ்ச்சியில் பேசிய ரமீஸ் ராஜா, "சமூக வலைதளங்களில் பாகிஸ்தான் அணி கடுமையான விமர்சனங்களை எதிர்கொண்டு வருகிறது. அவர்கள் ஏற்கனவே தங்களது கணிசமான ரசிகர்களை இழந்துவிட்டனர். பாகிஸ்தான் அணி ஒவ்வொரு போட்டியிலும் வெல்ல வேண்டும் என்று ரசிகர்கள் எதிர்பார்க்கவில்லை. ஆனால், மைதானத்தில் அவர்களின் போராடும் குணம் மற்றும் நேர்மறையான அணுகுமுறையை ரசிகர்கள் பார்க்க விரும்புகின்றனர். ஒரு அணி ரசிகர்களை இழக்கத் தொடங்கினால், அதன் முதல் தூண் சரிந்துவிட்டது என்று அர்த்தம்" என்று கூறினார்.

தான் பாகிஸ்தான் கிரிக்கெட் வாரியத் தலைவராக இருந்த போது பாகிஸ்தான் கிரிக்கெட்டின் ரசிகர்களுக்கான தளம் மற்றும் பிராண்டை உருவாக்குவதில் தான் அதிக கவனம் செலுத்தியதாகக் குறிப்பிட்ட ரமீஸ் ராஜா, ரசிகர்களின் ஆதரவை இழப்பது எந்தவொரு அணிக்கும் மிகப்பெரிய ஆபத்தாக முடியும் என்று எச்சரித்துள்ளார். ஒரு சிறந்த அணியாக மாற ரசிகர்களின் ஆதரவு இன்றியமையாதது என்றும் அவர் கூறினார்.

டி20 கிரிக்கெட்டில் 650 விக்கெட்டுகளை வீழ்த்தி சாதனை படைத்த வெஸ்ட் இண்டீஸ் ஜாம்பவான் சுனில் நரைன்

முந்தைய இங்கிலாந்து சுற்றுப்பயணங்களுடன் ஒப்பிடும் போது, இந்த முறை பாகிஸ்தான் வீரர்களிடம் ஆட்டோகிராஃப் வாங்க வரும் ரசிகர்களின் எண்ணிக்கை மிகவும் குறைந்துவிட்டதாக வாகன் மற்றும் குக் ஆகியோரும் சுட்டிக்காட்டினர். காயம் காரணமாக முதல் போட்டியில் விளையாடாத கேப்டன் பாபர் அசாம் மீண்டும் அணிக்குத் திரும்பும் பட்சத்தில், அது ரசிகர்களுக்குச் சற்றே நம்பிக்கை அளிக்கும் என எதிர்பார்க்கப்படுகிறது.

Also Read

டி20 ராஜா நான்தான்.. உலகிலேயே அதிக ரன் குவித்த வீரர் என்ற வரலாற்றுச் சாதனை செய்த பொல்லார்ட்