‘மனைவி, அம்மாவை ஜிம்பாப்வே கூட்டிட்டு போறேன்.. டீம்ல சேர்த்துக்குங்க’.. சாம்சன் போல அஸ்வின் நையாண்டி

சென்னை: ஜிம்பாப்வே தொடருக்கான இந்திய டி20 அணியில் இருந்து விக்கெட் கீப்பர் பேட்ஸ்மேன் சஞ்சு சாம்சன் திடீரென நீக்கப்பட்டதை வைத்து ரவிச்சந்திரன் அஸ்வின் வெளியிட்ட நையாண்டி வீடியோ சமூக வலைதளங்களில் வேகமாக பரவி வருகிறது. இந்த யூட்யூப் வீடியோவில் செய்தியாளர் விமல் குமார் தேர்வுக்குழு தலைவராகவும், அஸ்வின் சஞ்சு சாம்சனாகவும் நடித்து இருந்தனர். அதில் தேர்வுக் குழுவை நையாண்டி செய்வது போல அஸ்வின் பேசி இருந்தார்.

அதில் சஞ்சு சாம்சன் தன் வாய்ப்புக்காக தேர்வுக் குழுவிடம் பேசுவது போல நடித்துக் காட்டிய அஸ்வின், "எனக்கு எந்த ஓய்வும் தேவையில்லை. வேண்டுமானால் என் அம்மா, அப்பா மற்றும் மனைவியையும் ஜிம்பாப்வேக்கு கூட்டிட்டு போறேன். நான் இதுவரை புலவாயோ சென்றதே இல்லை. 1999 உலகக் கோப்பையில் ஜிம்பாப்வேயிடம் இந்தியா தோற்றதற்கு பழிவாங்க வேண்டும். என்னை தயவுசெய்து கூட்டிட்டு போங்க " என்று சாம்சன் கெஞ்சுவது போல் நையாண்டி செய்துள்ளார்.

அஸ்வினின் இந்த நகைச்சுவைக்கு பின்னால் கடுமையான விமர்சனம் ஒளிந்துள்ளது. 2026 டி20 உலகக் கோப்பையில் அரை இறுதி மற்றும் இறுதிப் போட்டிகளில் அரைசதம் அடித்து ஆட்டத்தை வென்று தந்து, தொடர் நாயகன் விருது வென்றவர் சஞ்சு சாம்சன். ஆனால், அயர்லாந்து மற்றும் இங்கிலாந்தில் வெறும் 3 போட்டிகளில் 6 ரன்கள் மட்டுமே எடுத்தார் என்பதற்காக ஜிம்பாப்வே தொடரில் இருந்து அவர் அதிரடியாக நீக்கப்பட்டுள்ளார்.

அபிஷேக் சர்மா, இஷான் கிஷன் மற்றும் வைபவ் சூர்யவன்ஷி போன்றோருக்கு தொடர்ந்து வாய்ப்பளிக்கப்பட்ட நிலையில், சஞ்சு சாம்சனுக்கு மட்டும் 'ஓய்வு' அளிக்கப்பட்டுள்ளது பெரும் குளறுபடி ஆகும். இதுகுறித்து தலைமை பயிற்சியாளர் கௌதம் கம்பீர் கூறும்போது, ஃபார்ம் அடிப்படையில் மட்டுமே சஞ்சு சாம்சன் நீக்கப்பட்டார் என்றார்.

ஆனால் இதை கடுமையாக விமர்சித்த அஸ்வின், "சஞ்சு சாம்சனுக்கு திருவனந்தபுரத்தில் அழகான வீடு இருக்கிறது, அங்கு அவர் ஓய்வெடுக்கலாம். டி20 போட்டிகளில் மட்டுமே விளையாடும் அவருக்கு ஏன் ஓய்வு? டெஸ்ட் போட்டிகளில் சாய் சுதர்சனை 4 போட்டிகளை வைத்து எடைபோடக் கூடாது எனும்போது, சாம்சனுக்கு ஏன் இன்னும் 2 வாய்ப்புகள் தரக்கூடாது? இத்தகைய பாரபட்சம் வீரர்களிடையே பாதுகாப்பற்ற தன்மையை உருவாக்கி, அவர்களை சுயநலமாக விளையாட வைத்துவிடும். இது அணிக்கு ஆபத்தாகப் போய் முடியும்" என தேர்வுக்குழுவின் முரண்பாடான முடிவுகளை விளாசியுள்ளார் அஸ்வின்.

IND vs ENG: கம்பீர் செய்த செயல்.. லைவ் மேட்ச்சிலேயே ஆவேசமான தினேஷ் கார்த்திக்.. என்ன நடந்தது?

சஞ்சு சாம்சனின் நீக்கம் இந்திய கிரிக்கெட் ரசிகர்களிடையே பெரும் கொந்தளிப்பை ஏற்படுத்தியுள்ள நிலையில், அஸ்வினின் இந்த வீடியோ தற்போது சமூக வலைதளங்களில் காட்டுத்தீயாக பரவி வருகிறது..