RCB: உயிரிழந்த ரசிகர்களுக்காக 11 இருக்கைகள் காலியாக விடப்படும்.. நினைவு சின்னம் அமைக்க ஏற்பாடு

பெங்களூரு எம்.சின்னசாமி மைதானத்திற்கு வெளியே நடந்த கூட்ட நெரிசல் சம்பவத்தில் உயிரிழந்த 11 பேரை கௌரவிக்கும் வகையில், ஆர்சிபி மற்றும் கர்நாடக மாநில கிரிக்கெட் சங்கம் (KSCA) இணைந்து ஒரு நினைவுப் பலகையையும், நிரந்தர இருக்கைகளையும் அமைக்கவுள்ளன. கடந்த ஆண்டு, ஆர்சிபி தனது முதல் ஐபிஎல் பட்டத்தை வென்றதை கொண்டாடியபோது இந்த துயர சம்பவம் நிகழ்ந்தது.

இந்த நிலையில், மைதானத்தின் உள்நுழைவுப் பகுதியில் நினைவுப் பலகை நிறுவப்பட்டுள்ளது. மேலும், உயிர் நீத்தவர்களின் நினைவாக 11 இருக்கைகள் நிரந்தரமாக ஒதுக்கப்பட்டுள்ளன. இவை ஐ.பி.எல். அல்லது சர்வதேசப் போட்டிகளுக்கு விற்பனை செய்யப்படாது. மரியாதையின் அடையாளமாக அந்தப் பகுதி தனிமைப்படுத்தப்பட்டு இருக்கும்.

கே.எஸ்.சி.ஏ. தலைவர் வெங்கடேஷ் பிரசாத் நினைவுப் பலகை அமைக்கப்பட்டதை உறுதிப்படுத்தினார். இருப்பினும், இருக்கைகளை ஒதுக்கும் திட்டம் குறித்து அவர் வெளிப்படையாகக் கூறவில்லை. இந்த துயரமான சம்பவத்தைப் பற்றி சிந்திப்பதே வேதனையாக இருப்பதாக பிரசாத் தெரிவித்தார். "நிர்வாகக் குழு மற்றும் முக்கியப் பங்குதாரர்களுடன் நீண்ட நாட்களாக இந்த நினைவுச் சின்னம் குறித்து விவாதித்து வந்தோம்.

சூர்யகுமார் கிடையாது..இந்திய அணியின் அடுத்த டி20 உலககோப்பை கேப்டனாக வர இவருக்கு தான் வாய்ப்பு- ஆகாஷ்

அந்த 11 பேரின் நினைவைப் போற்றுவது முக்கியம் என்று நாங்கள் ஒருமனதாக உணர்ந்தோம். எந்த வலியையும் புதுப்பிக்க விரும்பவில்லை; மாறாக, அவர்களை நினைவுகூர விரும்புகிறோம். அதனால்தான் எதிர்பாராத விதமாக வாழ்ந்த கிரிக்கெட் ரசிகர்களின் நினைவாக ஒரு நினைவுக் கல்லை வைக்க முடிவு செய்தோம்," என்று அவர் கூறினார்.

மைதானத்தில் நடைபெறவிருக்கும் போட்டிகளுக்கு முன்னதாக, உயிரிழந்தவர்களின் பெயர்கள் மைதானத்திற்குள் திரையில் காட்டப்பட்டு, ஒரு நிமிட மௌன அஞ்சலி செலுத்தப்படும். ஐ.பி.எல். 2026 சீசன் வருகிற மார்ச் 28 அன்று நடப்புச் சாம்பியன் ஆர்.சி.பி. சன்ரைசர்ஸ் ஹைதராபாத்தை எதிர்கொள்ளும் போட்டியுடன் தொடங்கவுள்ளது.

இதற்கிடையில், பொது நிகழ்ச்சிகளை நடத்துவதற்கான மைதானத்தின் பாதுகாப்பு மற்றும் தயார்நிலையை உறுதி செய்யும் நோக்கில், கடந்த திங்கட்கிழமை ஒத்திகை நடத்தப்பட்டது. வரும் வியாழக்கிழமை சுமார் 500 தன்னார்வலர்களுடன் போட்டி நடக்கும் சூழலை உருவாக்கும் ஒரு விரிவான ஒத்திகை நடத்தவும் திட்டமிடப்பட்டுள்ளது.

ஐபிஎல் கோப்பையை ஆர்சிபி வென்றதை என்னால் நம்ப முடியவில்லை.. விராட் கோலி கருத்து

கர்நாடக அரசு நியமித்த நிபுணர் குழு, மைதானத்தை முழுமையாக ஆய்வு செய்த பிறகு, கடந்த வாரம் ஐபிஎல் 2026 போட்டிகளை நடத்த எம்.சின்னசாமி மைதானத்திற்கு அனுமதி அளித்தது. ஆர்.சி.பி. இந்த சீசனில் தனது ஏழு சொந்த ஆட்டங்களில் ஐந்தை சின்னசாமி மைதானத்திலும், எஞ்சிய இரண்டை ராய்ப்பூரில் உள்ள ஷஹீத் வீர் நாராயண் சிங் சர்வதேச கிரிக்கெட் ஸ்டேடியத்திலும் விளையாடவுள்ளது.