IPL 2026: ஆர்சிபி ரசிகர்கள் குஷி.. சின்னசாமி மைதானத்துக்கு பச்சை கொடி காட்டிய கர்நாடக அரசு!

பெங்களூரு: 2026 ஐபிஎல் கிரிக்கெட் தொடரில் ராயல் சேலஞ்சர்ஸ் பெங்களூரு அணி தனது உள்ளூர் போட்டிகளை பெங்களூருவில் உள்ள புகழ்பெற்ற சின்னசாமி மைதானத்தில் விளையாட அதிகாரப்பூர்வ அனுமதியைப் பெற்றுள்ளது. பாதுகாப்பு தணிக்கைகள், மைதானத்தின் கட்டமைப்பு மதிப்பீடுகள் மற்றும் கூட்டத்தை நிர்வகிப்பதற்கான நடவடிக்கைகளை முழுமையாக ஆய்வு செய்த பிறகே இந்த அனுமதி வழங்கப்பட்டுள்ளது. இது பெங்களூரு கிரிக்கெட் ரசிகர்களுக்கு மிகப்பெரிய நற்செய்தியாக அமைந்துள்ளது.

நிபுணர் குழுவின் பரிந்துரைகளின் அடிப்படையில் கர்நாடக அரசு அளித்துள்ள இந்த சிறப்பு அனுமதியின் மூலம், ஆர்சிபி அணி தனது 5 உள்ளூர் லீக் போட்டிகளை சின்னசாமி மைதானத்தில் விளையாடவுள்ளது. அதுமட்டுமின்றி, ஐபிஎல் 2026 தொடரின் 2வது குவாலிஃபயர் மற்றும் இறுதிப்போட்டி ஆகிய மிக முக்கிய நாக் அவுட் போட்டிகளும் இதே மைதானத்தில் நடைபெறவுள்ளது. இதனால் இந்த ஆண்டு தொடருக்கான எதிர்பார்ப்பு பலமடங்கு அதிகரித்துள்ளது.

மைதானத்தில் முன்னர் இருந்த பாதுகாப்பு குறைபாடுகளை சரிசெய்ய கர்நாடக மாநில கிரிக்கெட் சங்கம் பல பிரம்மாண்ட புதுப்பிப்பு பணிகளை மேற்கொண்டுள்ளது. புதிய நுழைவு வாயில்கள், நடைபாதைகளை விரிவுபடுத்துதல், பிரத்யேக அவசர கால வெளியேறும் வழிகள் என பல மேம்பாட்டு பணிகள் செய்யப்பட்டுள்ளன. இருப்பினும், கூட்ட நெரிசலைத் தவிர்க்கவும், உயர்தர பாதுகாப்பை உறுதி செய்யவும் பார்வையாளர்களின் எண்ணிக்கை 30,000 முதல் 35,000 வரை மட்டுமே அனுமதிக்கப்படும் என்ற கடுமையான நிபந்தனையுடன் இந்த அனுமதி வழங்கப்பட்டுள்ளது. இந்த விதிமுறைகள் தீவிரமாக கண்காணிக்கப்படும் எனவும் அரசு தரப்பில் தெரிவிக்கப்பட்டுள்ளது.

பல மாதங்களாக இருந்த குழப்பங்களுக்கு முற்றுப்புள்ளி வைக்கப்பட்டுள்ளதால் ஆர்சிபி ரசிகர்கள் உற்சாகத்தில் உள்ளனர். நடப்பு சாம்பியனான ஆர்சிபி அணி தனது அனைத்து உள்ளூர் போட்டிகளையும் பெங்களூருவில் விளையாடாது. 5 போட்டிகள் மட்டுமே இங்கு நடைபெறும் நிலையில், மீதமுள்ள 2 உள்ளூர் போட்டிகளை ராய்ப்பூரில் உள்ள வீர் நாராயண் சிங் மைதானத்தில் விளையாடவுள்ளது. ஆர்சிபி அணி இந்த சீசனின் முதல் ஆட்டத்தில் சன்ரைசர்ஸ் ஐதராபாத் அணியை எதிர்கொள்ளவுள்ளது குறிப்பிடத்தக்கது.