CSK எதிராக டிம் டேவிட் அடித்த சிக்சர்.. மைதானத்திற்கு வெளியே விழுந்த பந்தை எடுத்த ஆர்சிபி ரசிகர்கள்

பெங்களூரு: ஐபிஎல் 2026 சீசனில் டிம் டேவிட்டின் அதிரடியால் ஆர்சிபி அணி சென்னை சூப்பர் கிங்ஸ் அணிக்கு எதிராக 3 விக்கெட்டுக்கு 250 ரன்கள் குவித்து புதிய சாதனை படைத்தது. இது சிஎஸ்கேவுக்கு எதிரான ஐபிஎல் வரலாற்றின் அதிகபட்ச ஸ்கோர் ஆகும். பதிலுக்கு, சிஎஸ்கே 207 ரன்களுக்குச் சுருண்டு, தனது மூன்றாவது தொடர் தோல்வியை சந்தித்தது. இப்போட்டியில் புவனேஷ்வர் குமார் தனது 200வது ஐபிஎல் விக்கெட்டையும் கைப்பற்றி மைல்கல் அடைந்தார்.

ஞாயிற்றுக்கிழமை இரவு சின்னசாமி மைதானத்தில் டிம் டேவிட் சிஎஸ்கே பந்துவீச்சை துவம்சம் செய்து ரசிகர்களை மகிழ்வித்தார். தேவ்தத் படிக்கல் தனது இரண்டாவது தொடர்ச்சியான அரைசதம் அடித்தார். டேவிட் மற்றும் ஆர்சிபி கேப்டன் ரஜத் படிதார் நான்காவது விக்கெட்டுக்கு 99 ரன்கள் சேர்த்தனர். டேவிட் ஜேமி ஓவர்ட்டன் பந்தில் அடித்த பிரம்மாண்ட சிக்ஸர் சின்னசாமி மைதானத்தின் கூரையைத் தாண்டி வெளியே சாலையில் விழுந்தது.

சிக்ஸர் அடித்ததும் டேவிட் நடுவர் சைகையைப் போலவே இரு கைகளையும் உயர்த்தி, பந்திற்கு 'பை-பை' காட்டினார்.மைதானத்திற்கு உள்ளேயும் வெளியேயும் ரசிகர்கள் கொண்டாட்டத்தில் மூழ்கினர். டேவிட் அடித்த பந்தைக் கண்டெடுத்துக் கொண்டாடும் ரசிகர்களின் வீடியோ சமூக வலைத்தளங்களில் வைரலானது. இது ஒரு அரிய நினைவுப் பரிசாக மாறிய நிலையில், ரசிகர்கள் அதை ஆர்வத்துடன் கொண்டாடினர். இந்த உற்சாகம் சமூக வலைத்தளங்களிலும் எதிரொலித்தது.

ஆர்சிபி நிர்ணயித்த கடின இலக்கை துரத்திய சிஎஸ்கே தனது பேட்டிங் சரிவை சந்தித்தது. 19.4 ஓவர்களில் 207 ரன்களுக்கு சுருண்டு, தோல்வியைத் தழுவியது. சஞ்சு சாம்சன், கேப்டன் ருதுராஜ் கெய்க்வாட், ஆயுஷ் மாத்ரே ஆகியோர் வெறும் 30 ரன்களுக்குள் தங்களது விக்கெட்டை இழந்ததால் சிஎஸ்கே-வின் வெற்றி இலக்கு ஆரம்பத்திலேயே தடைபட்டது.

பவர் பிளேவில் ஜேக்கப் டஃபி சஞ்சு சாம்சன் மற்றும் ருதுராஜ் கெய்க்வாட் ஆகிய முக்கிய வீரர்களை அவுட் செய்து சிஎஸ்கேவுக்கு அதிர்ச்சி அளித்தார். தேவ்தத் படிக்கல் முதல் ஸ்லிப்பில் அற்புதமான கேட்சுகளைப் பிடித்தார். பேட்டிங்கில் சாம்சனின் தடுமாற்றம் தொடர்ந்தது. ஆயுஷ் மாத்ரே ஆட்டமிழந்தபோது, புவனேஷ்வர் குமார் தனது 200வது ஐபிஎல் விக்கெட்டைப் பதிவு செய்து மைல்கல் அடைந்தார்.

சர்ஃபராஸ் கான் 25 பந்துகளில் அதிரடியாக அரை சதம் அடித்து சிறிது போராட்டத்தைக் காட்டினாலும், ஆர்சிபியின் கடின இலக்கை எட்ட முடியவில்லை. பின்னர், க்ருனால் பாண்டியா மற்றும் புவனேஷ்வர் குமார் இணைந்து பிரஷாந்த் வீரரை ஆட்டமிழக்க செய்து, சிஎஸ்கேவின் தோல்வியை உறுதி செய்தனர். இதனால், இறுதியில் பெரிய சவாலின்றிப் போட்டி முடிவுக்கு வந்தது.