RCB vs SRH: ஐபிஎல் தொடக்க விழா ரத்து.. பிசிசிஐ எடுத்த அதிரடி முடிவு.. பின்னணி என்ன?

பெங்களூர்: உலகம் முழுவதும் உள்ள கிரிக்கெட் ரசிகர்களால் பெரிதும் எதிர்பார்க்கப்படும் 2026 ஐபிஎல் சீசன் வரும் மார்ச் 28 அன்று தொடங்குகிறது. பெங்களூரு சின்னசாமி மைதானத்தில் நடைபெறும் முதல் போட்டியில் நடப்பு சாம்பியனான ராயல் சேலஞ்சர்ஸ் பெங்களூரு மற்றும் சன்ரைசர்ஸ் ஹைதராபாத் அணிகள் மோதுகின்றன. வழக்கமாக ஐபிஎல் தொடரின் முதல் நாளில் பாலிவுட் நட்சத்திரங்களின் கலைநிகழ்ச்சிகளுடன் பிரம்மாண்ட தொடக்க விழா நடைபெறும். ஆனால், இந்த ஆண்டு தொடக்க விழா ரத்து செய்யப்பட்டுள்ளதாக பிசிசிஐ அறிவித்துள்ளது.

கடந்த 2025 ஜூன் 4 அன்று பெங்களூரு சின்னசாமி மைதானத்தில் ஆர்சிபி அணி கோப்பையை வென்றதைக் கொண்டாடிய போது, அங்கு ஏற்பட்ட அசம்பாவிதத்தில் 11 பேர் உயிரிழந்தனர். இந்தத் துயரமான சம்பவத்திற்கு மரியாதை செலுத்தும் விதமாகவே, இந்த ஆண்டு தொடக்க விழாவை ரத்து செய்ய பிசிசிஐ முடிவு செய்துள்ளது. இது குறித்துப் பேசிய பிசிசிஐ செயலாளர் தேவ்ஜித் சைக்கியா, "கடந்த ஆண்டு ஜூன் 4 அன்று நடந்த சோகமான விபத்தில் உயிரிழந்தவர்களுக்கு மரியாதை செலுத்தும் வகையில், மார்ச் 28 அன்று எந்தவிதமான கலைநிகழ்ச்சிகளோ அல்லது கொண்டாட்டங்களோ நடத்தப்படாது" என்று தெரிவித்துள்ளார்.

இறுதி விழாவிற்கு திட்டம்

தொடக்க விழா ரத்து செய்யப்பட்டாலும், மே 31 அன்று நடைபெற உள்ள ஐபிஎல் இறுதிப் போட்டியின் போது மிகப்பிரம்மாண்டமான கலைநிகழ்ச்சிகளுடன் கூடிய இறுதி விழா நடத்தத் திட்டமிடப்பட்டுள்ளது. இந்த இறுதிப் போட்டியும் பெங்களூரு சின்னசாமி மைதானத்திலேயே நடைபெற அதிக வாய்ப்புகள் உள்ளதாக பிசிசிஐ வட்டாரங்கள் தெரிவிக்கின்றன. கடந்த ஆண்டு கொல்கத்தா ஈடன் கார்டன் மைதானத்தில் நடைபெற்ற தொடக்க விழாவில் ஷாருக்கான் உள்ளிட்ட பல நட்சத்திரங்கள் பங்கேற்றது குறிப்பிடத்தக்கது.

ஆர்சிபி-க்கு புதிய மைதானம்

நடப்பு சாம்பியனான ஆர்சிபி அணி, தனது 7 சொந்த மைதான போட்டிகளில் 5 போட்டிகளை மட்டுமே பெங்களூரு சின்னசாமி மைதானத்தில் விளையாட உள்ளது. கடந்த ஆண்டு நடந்த விபத்திற்குப் பிறகு இந்த மைதானத்தில் போட்டிகளை நடத்தக் கர்நாடக அரசு இப்போதுதான் நிபந்தனைகளுடன் அனுமதி அளித்துள்ளது. இதனால், ஆர்சிபி அணியின் மீதமுள்ள 2 சொந்த மைதான போட்டிகள் ராய்ப்பூரில் உள்ள ஷஹீத் வீர் நாராயண் சிங் சர்வதேச மைதானத்தில் நடைபெறும் என அறிவிக்கப்பட்டுள்ளது.

IPL 2026: ஆரஞ்சு சுனாமி டா.. ஆர்சிபியை கதற விடப் போகும் சன்ரைசர்ஸ் ஹைதராபாத்.. ஆனா பவுலிங்?

இந்த முறை ஐபிஎல் தொடரின் தொடக்கம் ஒரு அமைதியான தொடக்கமாக இருக்கும் என எதிர்பார்க்கப்படுகிறது. அதே சமயம், மைதானத்தில் ரசிகர்களின் ஆரவாரம் மற்றும் அணிகளுக்கு இடையிலான போட்டிக்கு எந்தக் குறையும் இருக்காது. ஆர்சிபி தனது கோப்பையைத் தக்கவைக்குமா அல்லது ஹைதராபாத் பதிலடி கொடுக்குமா என்பதைப் பார்க்க ரசிகர்கள் ஆவலுடன் காத்திருக்கின்றனர்.