RCB vs SRH: 9 விக்கெட் போனாலும் ஆர்சிபி-யை கதறவிட்ட இஷான், அனிக்கேட்.. 200+ ஸ்ட்ரைக் ரேட்டில் அதிரடி

பெங்களூர்: 2026 ஐபிஎல் தொடரின் முதல் போட்டியிலேயே ரன் மழை பொழிந்து ரசிகர்களை உற்சாகத்தில் ஆழ்த்தியது சன்ரைசர்ஸ் ஐதராபாத் அணி. பெங்களூரு சின்னசாமி மைதானத்தில் நடைபெற்ற இந்தப் போட்டியில், டாஸ் வென்ற ராயல் சேலஞ்சர்ஸ் பெங்களூரு அணி முதலில் பந்துவீச்சைத் தேர்வு செய்தது. இதன்படி முதலில் களமிறங்கிய ஐதராபாத் அணி, நிர்ணயிக்கப்பட்ட 20 ஓவர்களில் 9 விக்கெட் இழப்புக்கு 201 ரன்கள் குவித்தது.

சன்ரைசர்ஸ் ஐதராபாத் அணிக்கு ஆரம்பமே பெரும் அதிர்ச்சியாக அமைந்தது. ஆர்சிபி அணியின் அறிமுக வேகப்பந்து வீச்சாளர் ஜேக்கப் டஃபி தனது அனல் பறக்கும் பந்துவீச்சால் ஐதராபாத் அணியின் டாப் ஆர்டரை நிலைகுலையச் செய்தார். அதிரடி வீரர்கள் அபிஷேக் சர்மா 7 ரன்களிலும், டிராவிஸ் ஹெட் 11 ரன்களிலும் டஃபி வீசிய பந்தில் ஆட்டமிழந்தனர். அதன் பிறகு வந்த நிதிஷ் குமார் ரெட்டியும் 1 ரன்னில் வெளியேற, ஐதராபாத் அணி 29 ரன்களுக்கு 3 விக்கெட்டுகளை இழந்து தவித்தது.

கேப்டன் இஷான் கிஷன் அதிரடி

விக்கெட்டுகள் ஒருபுறம் விழுந்தாலும், மறுபுறம் கேப்டன் பொறுப்பை ஏற்ற இஷான் கிஷன் ஆர்சிபி பந்துவீச்சாளர்களைத் துவம்சம் செய்தார். மைதானத்தின் நாலாபுறமும் சிக்ஸர்களையும், பவுண்டரிகளையும் பறக்கவிட்ட அவர், வெறும் 38 பந்துகளில் 80 ரன்களைக் குவித்தார். இதில் 8 பவுண்டரிகள் மற்றும் 5 சிக்ஸர்கள் அடங்கும். இவரது ஸ்ட்ரைக் ரேட் 210.53 ஆகும். இவருக்குப் பக்கபலமாக விளையாடிய ஹென்ரிச் கிளாசென் 22 பந்துகளில் 31 ரன்கள் எடுத்து அவுட் ஆனார்.

அனிக்கேட் வர்மாவின் 'மின்னல்' வேகம்

நடு வரிசையில் வந்த அனிக்கேட் வர்மா, இஷான் கிஷனுக்கே சவால் விடும் வகையில் அதிரடி காட்டினார். ஆர்சிபி பந்துவீச்சாளர்களைக் கதறவிட்ட அவர், வெறும் 18 பந்துகளில் 43 ரன்களை விளாசினார். இதில் 4 மெகா சிக்ஸர்கள் மற்றும் 3 பவுண்டரிகள் அடங்கும். 238.89 என்ற மலைக்க வைக்கும் ஸ்ட்ரைக் ரேட்டில் அவர் விளையாடிய விதம் ரசிகர்களை வியப்பில் ஆழ்த்தியது. இவரது அதிரடியால்தான் ஐதராபாத் அணி 200 ரன்களைக் கடந்தது.

RCB vs SRH: கையில் கருப்புப்பட்டை அணிந்து வந்த ஆர்சிபி வீரர்கள்.. நெகிழ வைத்த சம்பவம்..என்ன நடந்தது?

ஆர்சிபி பந்துவீச்சு

ஆர்சிபி தரப்பில் அறிமுக வீரர் ஜேக்கப் டஃபி அபாரமாகப் பந்துவீசி 4 ஓவர்களில் 22 ரன்கள் மட்டுமே கொடுத்து 3 விக்கெட்டுகளை வீழ்த்தினார். ரொமாரியோ ஷெப்பர்ட் 3 விக்கெட்டுகளை எடுத்தாலும், 4 ஓவர்களில் 54 ரன்களை வாரி வழங்கினார். புவனேஷ்வர் குமார், அபிநந்தன் சிங் மற்றும் சுயாஷ் சர்மா ஆகியோர் தலா 1 விக்கெட்டை வீழ்த்தினர். சன்ரைசர்ஸ் ஐதராபாத் அணி 20 ஓவர் முடிவில் 201 ரன்கள் எடுத்தது. ஆர்சிபி அணி வெற்றி பெற 202 ரன்கள் தேவை என்ற கடினமான இலக்கு நிர்ணயிக்கப்பட்டது.