விழுந்த டோணி.. எழுந்த கோஹ்லி.. கிரிக்கெட் உலகைக் கலக்கிய 2015

டோணியின் தொடர் தோல்வி

இந்த ஆண்டு நடந்த ஒரு நாள் போட்டித் தொடர்களிலும், டுவென்டி 20 தொடர்களிலும் இந்திய அணிக்கு பெரும் ஏமாற்றமே காத்திருந்தது. டோணி தலைமையில் தொடர் தோல்விகளே நமக்குக் கிடைத்தன.

ஜனவரியில் செம அடி

ஜனவரி மாதத்தில் ஆஸ்திரேலியாவில் நடந்த முத்தரப்பு ஒரு நாள் தொடரில் இந்தியாவுக்கு ஒரு வெற்றி கூட கிடைக்கவில்லை. உலகக் கோப்பைப் போட்டியிலும் அரை இறுதி வரை வந்து தோல்வியுற்றுத் திரும்பி ஏமாற்றியது.

வங்கதேசத்துடன் மோசமான தோல்வி

உலகக் கோப்பைத் தோல்வித் துயரத்திலிருந்து திரும்பிய கையோடு வங்கதேசம் போய் டோணி அன் கோ ஒரு நாள் தொடரை 1-2 என்ற கணக்கில் இழந்து திரும்பியது ரசிகர்களை அதிர வைத்தது.

தென் ஆப்பிரிக்காவிடம் அடி

அதேபோல தென் ஆப்பிரிக்காவுடன் நடந்த ஒரு நாள் தொடரையும் டோணி தலைமையிலான இந்திய அணி இழந்தது ரசிகர்களை ரொம்பவே வெறுப்படித்தது.

ஒரு வெற்றி கூட பெறாத டோணி

வெற்றிக் கேப்டனாக அறியப்படும் டோணிக்கு, இந்த ஆண்டு ஒரு தொடரில் கூட வெற்றி கிடைக்கவில்லை என்பது மிகப் பெரிய சோகமாக அமைந்தது.

ஏறி வந்த கோஹ்லி

டோணி நிலை இப்படி இருக்க மறுபக்கம் விராத் கோஹ்லி டெஸ்ட் கேப்டனாக இந்த ஆண்டு இரண்டு முறை சந்தோஷப்பட்டார்.

இலங்கையில் அதிரடி

இலங்கையில் நடந்த டெஸ்ட் தொடரை இந்தியா கோஹ்லி தலைமையில் வென்று வரலாறு படைத்தது. இந்த வெற்றியானது 22 வருடங்களுக்குப் பிறகு இலங்கையில் இந்தியாவுக்குக் கிடைத்ததாகும்.

தென் ஆப்பிரிக்காவுக்கு செம அடி

அடுத்து இந்தியாவில் தென் ஆப்பிரிக்காவுக்கு எதிராக நடந்த டெஸ்ட் தொடரையும் கோஹ்லி தலைமையிலான அணி வென்றது. 3-0 என்ற கணக்கில் தென் ஆப்பிரிக்காவை வெளுத்து வாங்கியது இந்தியா.

இப்படி டோணிக்கு அஸ்தமனத்தையும், கோஹ்லிக்கு புதிய வெளிச்சத்தையும் கொடுத்த ஆண்டாக 2015 அமைந்தது என்பதில் சந்தேகம் இல்லை.