"எல்லாரும் வாள் வீசுவோம் வாங்க".. ரவீந்திர ஜடேஜாவை வம்புக்கு இழுத்த ரிஷப் பண்ட், சர்பராஸ் கான்

காலே: இலங்கைக்கு எதிரான முதல் டெஸ்ட் போட்டியின் போது, இந்திய அணியின் ஆல்-ரவுண்டர் ரவீந்திர ஜடேஜாவை விக்கெட் கீப்பர் ரிஷப் பண்ட் மற்றும் சர்பராஸ் கான் ஆகியோர் ஜாலியாக வம்புக்கு இழுத்த வீடியோ சமூக வலைதளங்களில் பரவி வருகிறது. ஸ்டம்ப் மைக்கில் பதிவான இவர்களின் கலகலப்பான உரையாடலைக் கேட்டு ரசிகர்கள் பலரும் சிரிப்பலையில் ஆழ்ந்துள்ளனர்.

பொதுவாக மைதானத்தில் பேட்டிங் செய்வது மட்டுமின்றி, விக்கெட்டின் பின்னால் நின்று கொண்டு சக வீரர்களுடன் நகைச்சுவையாகப் பேசுவதிலும், எதிரணி வீரர்களைக் குழப்புவதிலும் ரிஷப் பண்ட் எப்போதும் கில்லாடி. அவரது குரல் பலமுறை ஸ்டம்ப் மைக்கில் பதிவாகி பரவியுள்ளது. அதேபோல, காலே மைதானத்தில் இலங்கை அணிக்கு எதிராக நடந்து வரும் இப்போட்டியின் மூன்றாவது நாளிலும் ஒரு சுவாரசிய சம்பவம் நடந்துள்ளது.

இந்தியா தனது முதல் இன்னிங்ஸில் 462 ரன்கள் எடுத்ததைத் தொடர்ந்து இலங்கை பேட்டிங் செய்தது. அப்போது சோனல் தினுஷா மற்றும் நிரோஷன் டிக்வெல்லா ஜோடி வலுவான பார்ட்னர்ஷிப் அமைத்து விளையாடிக் கொண்டிருந்தது. விக்கெட்டுகளை வீழ்த்த இந்திய அணி போராடியது. அந்த இக்கட்டான சூழ்நிலையிலும், மைதானத்தில் நிலவிய பதற்றத்தைக் குறைக்க சர்பராஸ் கானும் ரிஷப் பண்ட்டும் இணைந்து ஜடேஜாவை சீண்டத் தொடங்கினர்.

அப்போது ஜடேஜாவைப் பார்த்து சர்பராஸ் கான், "இது நீண்ட ஆட்டம் ஜட்டு பாய், நாம் அனைவரும் விக்கெட்டுகளைப் பகிர்ந்து கொள்வோம்" என்றார். சர்பராஸின் இந்த பேச்சைக் கேட்டு உடனடியாகக் களமிறங்கிய ரிஷப் பண்ட், "அப்படிச் செய்தால் இறுதியில் எல்லாரும் வாள் வீசலாம்" என்று ஜடேஜாவின் வாள் வீசும் கொண்டாட்டத்தைக் கிண்டலடித்தார். ரவீந்திர ஜடேஜா விக்கெட் வீழ்த்தினாலோ, அரைசதம் அடித்தாலோ தனது கைகளை வாள் போல சுழற்றி கொண்டாடுவது வழக்கம். இதனை மனதில் வைத்தே பண்ட் அவ்வாறு கூறினார். இந்த கலகலப்பான வீடியோ தற்போது கிரிக்கெட் ரசிகர்களிடையே பரவி வருகிறது.

“இது உண்மை என்றால் கேப்டன்சியை ராஜினாமா செய்கிறேன்”.. பாகிஸ்தான் போட்டிக்கு முன் பதறிய கங்குலி

இந்தப் போட்டியில் இலங்கை அணி முதல் இன்னிங்ஸில் 284 ரன்களுக்கு ஆல் அவுட் ஆனது. இதை அடுத்து இந்திய அணி முதல் இன்னிங்ஸில் 178 ரன்கள் முன்னிலை பெற்றுள்ளது. நான்காவது மற்றும் ஐந்தாவது நாள் ஆட்டம் மட்டுமே உள்ள நிலையில் மழை இல்லாவிட்டால் மட்டுமே இந்தப் போட்டியில் முடிவு தெரியும். இல்லையெனில் போட்டி டிராவில் முடியவே அதிக வாய்ப்பு உள்ளது.

Also Read

ஃபாலோ-ஆன் கொடுக்கவா பார்க்குறீங்க? இந்திய அணியின் திட்டத்தை உடைத்த இலங்கை.. இனி மழையால் சிக்கல்