நீயெல்லாம் மனுசனே இல்லை.. உடைந்த விரலுடன் ரிஷப் பண்ட் செய்த செயல்.. மைதானமே எழுந்து நின்று ஆரவாரம்

மான்செஸ்டர்: இங்கிலாந்துக்கு எதிரான நான்காவது டெஸ்ட் போட்டியின் போது, இந்திய அணியின் விக்கெட் கீப்பர் பேட்ஸ்மேனான ரிஷப் பண்ட், கால் விரலில் எலும்பு முறிவு ஏற்பட்ட போதிலும், நாட்டிற்காக மீண்டும் பேட்டிங் செய்ய களமிறங்கிய சம்பவம் கிரிக்கெட் உலகில் பெரும் நெகிழ்ச்சியை ஏற்படுத்தியுள்ளது. அவரின் இந்த அசைக்க முடியாத தேசப்பற்று மற்றும் அர்ப்பணிப்பு, சமூக வலைதளங்களில் ரசிகர்களின் பாராட்டுகளைப் பெற்று வருகிறது.

மான்செஸ்டர் ஓல்ட் டிராஃபோர்ட் மைதானத்தில் நடைபெற்று வரும் இந்த டெஸ்ட் போட்டியின் முதல் நாள் ஆட்டத்தின் போது, கிறிஸ் வோக்ஸ் வீசிய யார்க்கர் பந்தை ரிவர்ஸ் ஸ்வீப் செய்ய முயன்றார் பண்ட். ஆனால், பந்து குறிதவறி, அவரது வலது கால் விரலை பலமாக தாக்கியது. வலியால் துடித்த அவர், களத்திலேயே சுருண்டு விழுந்தார். உடனடியாக ரத்தம் கசியத் தொடங்கி, கால் வீங்கியதால், அவரால் எழுந்து நிற்கக் கூட முடியவில்லை.

மருத்துவக் குழுவினர் விரைந்து வந்து முதலுதவி அளித்த பின்னர், கோல்ஃப் வண்டி மூலம் மைதானத்தில் இருந்து அவர் வெளியே அழைத்துச் செல்லப்பட்டார். மருத்துவமனையில் எடுக்கப்பட்ட ஸ்கேன் பரிசோதனையில், அவரது கால் விரலில் எலும்பு முறிவு ஏற்பட்டிருப்பது உறுதி செய்யப்பட்டது. இதனால், அவர் குறைந்தது ஆறு வாரங்கள் ஓய்வில் இருக்க வேண்டும் என அறிவுறுத்தப்பட்டார். இதன் காரணமாக, இந்த டெஸ்ட் தொடரில் இருந்தே அவர் விலகும் சூழல் உருவானது.

இந்நிலையில், போட்டியின் இரண்டாம் நாளில், இந்திய அணி அடுத்தடுத்து விக்கெட்டுகளை இழந்து தடுமாறியபோது, யாரும் சற்றும் எதிர்பாராத வகையில், ரிஷப் பண்ட் மீண்டும் பேட்டிங் செய்ய வந்தார். வலி நிவாரணிகளை எடுத்துக்கொண்டு, உடைந்த கால் விரலின் வலியையும் பொருட்படுத்தாமல், அணியின் நலனுக்காக அவர் களத்திற்குள் நுழைந்தபோது, மைதானத்தில் இருந்த ஒட்டுமொத்த ரசிகர்களும், சக வீரர்களும் எழுந்து நின்று கரகோஷம் எழுப்பி அவருக்கு மாபெரும் வரவேற்பு அளித்தனர்.

இந்த நெகிழ்ச்சியான காட்சியைக் கண்ட ரசிகர்கள், சமூக ஊடகங்களில் உணர்ச்சிப்பூர்வமான பதிவுகளை வெளியிட்டு வருகின்றனர். "உண்மையான போராளி" என்றும், "தேசத்திற்காக எதையும் செய்யத் துணிந்தவர்" என்றும் பலரும் புகழ்ந்து வருகின்றனர். X தளத்தில் ஒரு ரசிகர், "ரிஷப் பண்ட்டின் இந்த அர்ப்பணிப்பைப் பார்க்கும்போது கண்கள் கலங்குகின்றன. உங்களைப் போன்ற ஒரு வீரர் இந்திய அணிக்கு கிடைத்தது வரம்" என்று பதிவிட்டுள்ளார்.

கார் விபத்தில் இருந்து மீண்டு வந்து, மீண்டும் கிரிக்கெட் ஆடுவதே மிகப்பெரிய சவால். இந்நிலையில், தற்போது உடைந்த விரலுடன் களமிறங்கி, தனது மன உறுதியையும், துணிச்சலையும் ரிஷப் பண்ட் மீண்டும் நிரூபித்துள்ளார். "ஸ்பைடர்மேன்" என்று செல்லமாக அழைக்கப்படும் அவர், ஒரு நிஜ வாழ்க்கை சூப்பர் ஹீரோ என்பதை இந்த சம்பவம் மீண்டும் ஒருமுறை அழுத்தமாக பதிவு செய்துள்ளது.