ரிஷப் பண்ட் பேச்சை கேட்டு சுப்மன் கில் செய்த செயல்.. வீணாய்ப்போன டிஆர்எஸ் ரிவ்யூ.. என்ன நடந்தது?

காலே: இலங்கைக்கு எதிரான முதல் டெஸ்ட் போட்டியின் மூன்றாவது நாளில், இந்திய அணியின் விக்கெட் கீப்பர் ரிஷப் பண்ட்டின் தவறான கணிப்பால் இந்தியா தனது டிஆர்எஸ் வாய்ப்பை வீணடித்தது. பந்துவீச்சாளர் மானவ் சுதார் அவுட் கேட்காத போதும், ரிஷப் பண்ட் கொடுத்த அழுத்தத்தால் கேப்டன் சுப்மன் கில் டிஆர்எஸ் எடுத்தார். அது தவறாக முடிந்தது.

மதிய உணவு இடைவேளைக்குப் பிறகு இந்திய அணி பந்துவீசியபோது இந்த சம்பவம் நடந்தது. மானவ் சுதார் வீசிய ஓவரில், இலங்கை பேட்ஸ்மேன் சோனல் தினுஷா பேட்டிங் செய்து கொண்டிருந்தார். அப்போது பந்து விக்கெட்டின் பின்னால் சென்றபோது, ரிஷப் பண்ட் கேட்ச் கேட்டு பலமாக அப்பீல் செய்தார். ஆனால், பந்து பேட்டில் படவில்லை என்று உணர்ந்த பந்துவீச்சாளர் மானவ் சுதார் எந்தவித அப்பீலும் செய்யவில்லை. எனினும், பண்ட் விடாப்பிடியாக கேப்டன் சுப்மன் கில்லை டிஆர்எஸ் எடுக்குமாறு வற்புறுத்தினார்.

கள அம்பயர் அவுட் தர மறுத்ததால், கேப்டன் கில் வேறு வழியின்றி டிஆர்எஸ் எடுத்தார். மூன்றாவது அம்பயர் வீடியோ பதிவை சோதித்துப் பார்த்தபோது, பந்து பேட்டின் அருகே கடந்து சென்று, பேடில் (pad) மட்டுமே பட்டது உறுதியானது. இதனால் இந்தியாவின் அப்பீல் நிராகரிக்கப்பட்டதுடன், ஒரு டிஆர்எஸ் வாய்ப்பும் வீணானது. பண்ட்டின் பிடிவாதத்தால் இந்தியாவுக்கு இந்த இழப்பு ஏற்பட்டது.

மறுபுறம், இந்தப் போட்டியில் இலங்கை அணி உணவு இடைவேளை வரை 100 ரன்களுக்குள் 5 விக்கெட்டுகளை இழந்து தடுமாறியது. இந்திய பந்துவீச்சில் மானவ் சுதார் 2 விக்கெட்டுகளையும், ஜடேஜா, குல்தீப் யாதவ் மற்றும் முகமது சிராஜ் தலா 1 விக்கெட்டையும் வீழ்த்தினர். ஆனால், அதன் பின் சோனல் தினுஷா மற்றும் நிரோஷன் டிக்வெல்லா அபாரமாக ஆடி அரைசதம் அடித்தனர்.

ஹர்திக் பாண்டியா டிரேடிங் சர்ச்சை.. எவ்ளோ சம்பளம்னு வெளிப்படையா சொல்லுங்க.. கவாஸ்கர் கோரிக்கை

முன்னதாக இந்திய அணி தனது முதல் இன்னிங்ஸில் 462 ரன்கள் குவித்தது குறிப்பிடத்தக்கது. இலங்கை அணியை 250 ரன்னுக்குள் சுருட்டி ஃபாலோ-ஆன் கொடுக்கலாம் என இந்திய அணி திட்டமிட்ட நிலையில், சோனல் - நிரோஷன் அந்த திட்டத்தை உடைத்தனர்.