இளம் வீரர் செய்த காரியம்.. அடுத்த பிராவோ.. புகழ்ந்து தள்ளிய பிளெம்மிங்.. வியந்து போன தோனி!

முதல் போட்டி

2020 ஐபிஎல் தொடரின் முதல் போட்டியில் சென்னை சூப்பர் கிங்ஸ் - மும்பை இந்தியன்ஸ் அணிகள் மோதின. இந்தப் போட்டிக்கு செல்லும் முன்பு வரை சிஎஸ்கே அணியில் என்னென்ன பலவீனம் உள்ளது என்பது பற்றியே முன்னாள் வீரர்கள், விமர்சகர்கள் பேசி வந்தனர்.

சிஎஸ்கே சிக்கல்

சிஎஸ்கே அணியில் ரெய்னா, ஹர்பஜன் சிங் விலகியது பெரும் சிக்கலை ஏற்படுத்திய நிலையில், அனுபவ ஆல் - ரவுண்டர் பிராவோ காயத்தால் முழு உடற்தகுதியுடன் ஆட முடியாத நிலையில் இருந்தார். அவருக்கு மாற்றாக யாரை தேர்வு செய்வது என்ற குழப்பம் இருந்தது.

சாம் கர்ரன் தேர்வு

இந்த நிலையில் தான் இளம் வேகப் பந்துவீச்சு ஆல் - ரவுண்டர் சாம் கர்ரன் தேர்வு செய்யப்பட்டார். அவரது வயது 22 தான். அவர் இங்கிலாந்து - ஆஸ்திரேலியா ஒருநாள் மற்றும் டி20 தொடர் முடிந்தா கையோடு ஐபிஎல் தொடரில் பங்கேற்க வந்தார்.

அசத்தல் பந்துவீச்சு

முதல் போட்டியில் அவரது பந்துவீச்சு அபாரமாக இருந்தது. 4 ஓவர்கள் வீசி 28 ரன்கள் கொடுத்து 1 விக்கெட் வீழ்த்தினார். தீபக் சாஹர், லுங்கி நிகிடியை விட குறைவான ரன்களே கொடுத்து இருந்தார். அவரது செயல்பாடு அப்போதே கவனத்தை ஈர்த்தது.

மிரட்டல் பேட்டிங்

அடுத்து சேஸிங்கில் சிஎஸ்கே அணியின் ரன் விகிதத்தை உயர்த்த அதிரடியாக ஆடுமாறு கூறி அனுப்பப்பட்டார் சாம் கர்ரன். கேப்டன் தோனி சொன்னதை அப்படியே செய்தார். 6 பந்துகளில் 18 ரன்கள் குவித்தார். 1 ஃபோர், 2 சிக்ஸ் அதில் அடங்கும்.

பயண அலுப்பு

18 ரன்கள் என்றாலும் அது சிஎஸ்கே அணியை அழுத்தம் இல்லாமல் சேஸிங்கை முடிக்க பெரிய அளவில் உதவியது. சாம் கர்ரன் இந்த சிறப்பான செயல்பாட்டை தன் பயண அலுப்பு, புதிய இடத்துக்கு ஏற்ப தன்னை மாற்றிக் கொள்வது என பல விஷயங்களுக்கு நடுவே செய்து காட்டியுள்ளார்.

வியந்து போன தோனி

சாம் கர்ரன் சிஎஸ்கே அணிக்காக முழுமையாக அர்ப்பணித்து ஆடியது கேப்டன் தோனியை வியப்புக்கு உள்ளாக்கி இருப்பதாக பிளெம்மிங் கூறி உள்ளார். குறிப்பாக பிராவோ இடத்தை அவர் நிரப்பியது சிஎஸ்கே அணியை பலமான அணியாக மாற்றி இருப்பதும் தோனிக்கு நிம்மதி அளித்துள்ளது.

பிளெம்மிங் பாராட்டு

பயிற்சியாளர் பிளெம்மிங் கூறுகையில், பிராவோ இல்லாதது பெரிய இழப்பாகும். சாம் கர்ரன் நீண்ட தூரம் சென்று அவரது இடத்தை நிரப்பி இருக்கிறார். முக்கியமான நேரத்தில் அவர் அணிக்கு உதவியது கேப்டனின் நம்பிக்கையை பெற்றுள்ளது என்றார்.

பிராவோ இடத்தை பிடித்தார்

சிஎஸ்கே அணி சாம் கர்ரனை தங்கள் அணியில் தொடர்ந்து தக்க வைக்க முடிவு செய்துள்ளதாக கூறப்படுகிறது. கிட்டத்தட்ட பிராவோ இடத்தை நிரப்ப சாம் கர்ரன் தேர்வு செய்யப்பட்டுள்ளார். அதை இந்த சீசனின் முதல் போட்டியிலேயே செய்தும் காட்டி உள்ளார் அந்த இளம் வீரர்.