6 பந்தில் 6 சிக்சர்.. பிரவீஸ், ரூதர்ஃபோர்ட் ஜோடி அதிரடி ஆட்டம்.. SA 20 தொடரில் MI-யை வீழ்த்திய கங்குலி படை

SA 20 தொடரில் எம்ஐ கேப் டவுன் அணிக்கு எதிராக அபாரமாக விளையாடிய பிரிட்டோரியா கேபிடல்ஸ், 85 ரன்கள் வித்தியாசத்தில் மிகப்பெரிய வெற்றியைப் பதிவு செய்து, நடப்புப் போட்டியில் தனது முதல் வெற்றியை போனஸ் புள்ளிகளுடன் சுவைத்தது.

போட்டியில் முதலில் பேட் செய்த பிரிட்டோரியா கேபிடல்ஸ் அணி, நிர்ணயிக்கப்பட்ட ஓவர்களில் 5 விக்கெட் இழப்புக்கு 220 ரன்கள் என்ற இமாலய இலக்கை நிர்ணயித்தது. விஹான் லப் (36 பந்துகளில் 60 ரன்கள்; 7 பவுண்டரிகள், 2 சிக்ஸர்கள்) மற்றும் ஷாய் ஹோப் (30 பந்துகளில் 45 ரன்கள்; 3 பவுண்டரிகள், 2 சிக்ஸர்கள்) ஆகியோர் சிறப்பான தொடக்கத்தை அளித்தனர்.

கடைசி கட்டத்தில், டெவால்ட் பிரெவிஸ் (13 பந்துகளில் 1 பவுண்டரி, 4 சிக்ஸர்களுடன் 36* ரன்கள்) மற்றும் ஷெர்ஃபேன் ரூதர்ஃபோர்டு (15 பந்துகளில் 6 சிக்ஸர்களுடன் 47* ரன்கள்) ஆகியோர் இணைந்து, வெறும் 27 பந்துகளில் 86 ரன்கள் சேர்த்து ஆறாவது விக்கெட்டுக்கு அசைக்க முடியாத கூட்டணியை அமைத்தனர். குறிப்பாக, இருவரும் தொடர்ச்சியாக ஆறு சிக்ஸர்களை விளாசி, கடைசி மூன்று ஓவர்களில் மட்டும் 72 ரன்களைக் குவித்தனர்.

இந்த மெஹா இலக்கைத் துரத்திய எம்ஐ கேப் டவுன் அணி, பிரிட்டோரியா பந்துவீச்சாளர்களிடம் தாக்குப்பிடிக்க முடியாமல் 14.2 ஓவர்களிலேயே வெறும் 135 ரன்களுக்கு அனைத்து விக்கெட்டுகளையும் இழந்தது. ஷெர்ஃபேன் ரூதர்ஃபோர்டு தனது பந்துவீச்சிலும் மிரட்டி, வெறும் 3 ஓவர்களில் 24 ரன்கள் மட்டுமே கொடுத்து 4 விக்கெட்டுகளை வீழ்த்தினார்.

தென்னாப்பிரிக்க சுழற்பந்து வீச்சாளர் கேஷவ் மகாராஜ் 4 ஓவர்களில் 28 ரன்கள் விட்டுக்கொடுத்து 3 விக்கெட்டுகளைக் கைப்பற்றினார். டிமால் மில்ஸ், லிசாட் வில்லியம்ஸ் மற்றும் ப்ரைஸ் பார்சன்ஸ் ஆகியோர் தலா ஒரு விக்கெட்டை வீழ்த்தி வெற்றிக்கு உதவினர்.

எம்ஐ கேப் டவுன் அணியின் ரஸ்ஸி வான் டெர் டஸ்ஸன் (28), ரியான் ரிக்கிள்டன் (33), ரீசா ஹென்றிக்ஸ் (18) மற்றும் நிக்கோலஸ் பூரன் (6 பந்துகளில் 25 ரன்கள்; 4 சிக்ஸர்கள்) என முதல் நான்கு பேட்ஸ்மேன்களும் நல்ல தொடக்கத்தைப் பெற்றும், அதை பெரிய ஸ்கோராக மாற்றத் தவறினர். காயம் காரணமாக நீண்ட இடைவெளிக்குப் பிறகு களமிறங்கிய வேகப்பந்து வீச்சாளர் ககிசோ ரபாடா, நான்கு ஓவர்களில் 48 ரன்களை விட்டுக்கொடுத்து 2 விக்கெட்டுகளை மட்டுமே வீழ்த்தி அதிக ரன்களைக் கொடுத்தார்.

புதன்கிழமை நடைபெற்ற மற்றுமொரு போட்டியில், பாருல் ராயல்ஸ் த்ரில் வெற்றி பெற்றது. கேப்டன் டேவிட் மில்லர், 38 பந்துகளில் 7 பவுண்டரிகள் மற்றும் 5 சிக்ஸர்களுடன் 71 ரன்கள் விளாசி ஆட்டமிழக்காமல் இருந்தார். இதன் மூலம், இரண்டு முறை சாம்பியனான சன்ரைசர்ஸ் ஈஸ்டர்ன் கேப் அணியை 5 விக்கெட் வித்தியாசத்தில், இரண்டு பந்துகள் மீதமிருக்க பாருல் ராயல்ஸ் வீழ்த்தியது.