SA vs AFG: 3 பந்தில் 3 சிக்ஸர் அடித்தும்.. கடைசி பந்தில் நிகழ்ந்த சோகம்.. நொறுங்கிப்போன குர்பாஸ்

அகமதாபாத்: 2026 டி20 உலகக்கோப்பை தொடரில் தென்னாப்பிரிக்காவுக்கு எதிரான ஆட்டத்தில் வெற்றிக்கு மிக அருகில் சென்று, இரண்டு சூப்பர் ஓவர்கள் வரை போராடித் தோல்வியடைந்த ஆப்கானிஸ்தான் அணியின் நட்சத்திர வீரர் ரஹ்மானுல்லா குர்பாஸ், போட்டிக்குப் பின் தனது மனவேதனையை வெளிப்படுத்தியுள்ளார்.

2026 டி20 உலகக்கோப்பையில் தென்னாப்பிரிக்கா மற்றும் ஆப்கானிஸ்தான் அணிகள் மோதிய ஆட்டம் ரசிகர்களுக்கு ஒரு திரில்லர் திரைப்படத்தைப் போல அமைந்தது. வெற்றி யாருக்கு என்பதை நிர்ணயிக்க இரண்டு முறை சூப்பர் ஓவர் முறை கடைபிடிக்கப்பட்டதுதான் இந்த ஆட்டத்தின் உச்சக்கட்ட பரபரப்பு.

தனி ஆளாகப் போராடிய குர்பாஸ்

முதலில் பேட்டிங் செய்த தென்னாப்பிரிக்கா 20 ஓவர்களில் 187 ரன்கள் குவித்தது. இலக்கை விரட்டிய ஆப்கானிஸ்தான் அணியில் ரஹ்மானுல்லா குர்பாஸ் அதிரடியாக விளையாடினார். வெறும் 42 பந்துகளில் 7 சிக்ஸர்கள், 4 பவுண்டரிகள் என விளாசிய அவர் 84 ரன்கள் குவித்தார். ஆட்டம் சமனில் முடிந்ததால் சூப்பர் ஓவருக்குச் சென்றது.

முதல் சூப்பர் ஓவரும் சமனில் முடிய, இரண்டாவது சூப்பர் ஓவர் வீசப்பட்டது. இதில் ஆப்கானிஸ்தான் வெற்றி பெற 24 ரன்கள் தேவைப்பட்டது. கேசவ் மகராஜ் வீசிய இந்த ஓவரில் ஸ்ட்ரைக்கில் இருந்த குர்பாஸ், ஹாட்ரிக் சிக்ஸர்களைப் பறக்கவிட்டு மைதானத்தை அதிர வைத்தார். ஆப்கானிஸ்தான் வெற்றி பெறும் என அனைவரும் நினைத்த வேளையில், கடைசி பந்தில் 6 ரன்கள் தேவைப்பட்டது.

கடைசி பந்தில் சோகம்

வெற்றிக்கு 6 ரன்களும், டிராவிற்கு 4 ரன்களும் தேவை என்ற நிலையில், குர்பாஸ் அடித்த பந்து டேவிட் மில்லர் கைகளில் தஞ்சமடைந்தது. இதனால் இரண்டாவது சூப்பர் ஓவரில் 4 ரன்கள் வித்தியாசத்தில் தென்னாப்பிரிக்கா திரில் வெற்றி பெற்றது. வெற்றி கைக்கு எட்டியும் அது நழுவிப் போனதால் குர்பாஸ் மைதானத்திலேயே தலையில் கைவைத்தபடி சோகத்தில் மூழ்கினார்.

இதயம் நொறுங்கிய பதிவு

நாட்டிற்காக ஒரு வரலாற்று வெற்றியைத் தேடித்தர முடியாமல் போனது குறித்து குர்பாஸ் தனது இன்ஸ்டாகிராம் பக்கத்தில் உருக்கமான பதிவு ஒன்றை வெளியிட்டுள்ளார். அதில், "ஒவ்வொரு போட்டியும் நமக்கு எதையாவது கற்றுத் தருகிறது. இன்று நாங்கள் எங்களால் முடிந்த அனைத்தையும் கொடுத்தோம். கடைசி நொடி வரை போராடினோம். ஆனால் துரதிர்ஷ்டவசமாக இது எங்களுக்கான நாளாக அமையவில்லை. இருப்பினும் உங்கள் அன்பும் ஆதரவும் எங்களுக்கு ஆறுதலாக இருக்கிறது."

"எங்கள் வெற்றியிலும் தோல்வியிலும் துணை நிற்கும் ஒவ்வொருவருக்கும் நன்றி. நாங்கள் இதிலிருந்து பாடம் கற்றுக்கொண்டு, முன்பை விட வலிமையுடன் மீண்டு வருவோம்" என்று பதிவிட்டுள்ளார்.

அடுத்த சுற்று வாய்ப்பு?

ரஷீத் கான் தலைமையிலான ஆப்கானிஸ்தான் அணிக்கு இது தொடர்ச்சியான இரண்டாவது தோல்வியாகும். ஏற்கனவே நியூசிலாந்து அணியிடம் தோல்வியடைந்த நிலையில், தற்போது தென்னாப்பிரிக்காவிடமும் தோல்வியைத் தழுவியுள்ளது. இதனால் அந்த அணியின் அடுத்த சுற்று வாய்ப்பு மங்கத் தொடங்கியுள்ளது. ஆப்கானிஸ்தான் தனது அடுத்த போட்டியில் பிப்ரவரி 16ஆம் தேதி டெல்லியில் ஐக்கிய அரபு அமீரக அணியை எதிர்கொள்ள உள்ளது.