SA vs NZ: 30 பந்தில் 55 ரன்.. தென்னாப்பிரிக்காவை காப்பாற்றிய மார்கோ ஜான்சன்.. NZ-க்கு டார்கெட் 170!

கொல்கத்தா: ஈடன் கார்டன் மைதானத்தில் நடைபெற்ற 2026 டி20 உலகக் கோப்பை முதல் அரையிறுதிப் போட்டியில், நியூசிலாந்து அணிக்கு வெற்றி இலக்காக 170 ரன்களை தென்னாப்பிரிக்க அணி நிர்ணயித்தது. தென்னாப்பிரிக்க அணியின் தொடக்க வரிசை பேட்ஸ்மேன்கள் அடுத்தடுத்து ஆட்டமிழந்து ஏமாற்றம் அளித்தாலும், அதிரடியாக விளையாடிய ஆல்ரவுண்டர் மார்கோ ஜான்சன் அணியை சரிவிலிருந்து மீட்டார்.

தடுமாறிய தென்னாப்பிரிக்கா

இந்தப் போட்டியில் டாஸ் வென்ற நியூசிலாந்து அணியின் கேப்டன் மிட்செல் சாண்ட்னர் முதலில் பந்துவீச்சை தேர்வு செய்தார். அதன்படி தென்னாப்பிரிக்க அணி முதலில் பேட்டிங் செய்ய களமிறங்கியது. அந்த அணிக்கு தொடக்கமே அதிர்ச்சியாக அமைந்தது. அதிரடி வீரர் குயின்டன் டி காக் 10 ரன்களிலும், ரியான் ரிக்கல்டன் ரன் ஏதுமின்றியும் கோல் மெக்கன்சி பந்துவீச்சில் ஒரே ஓவரில் ஆட்டமிழந்தனர். பின்னர் வந்த கேப்டன் எய்டன் மார்க்ரம் 18 ரன்களுக்கும், டேவிட் மில்லர் 6 ரன்களுக்கும் ரச்சின் ரவீந்திரா சுழலில் சிக்கி விக்கெட்டை பறிகொடுத்தனர். இதனால் தென்னாப்பிரிக்க அணி 77 ரன்களுக்கு 5 விக்கெட்டுகளை இழந்து தவித்தது.

ஸ்டப்ஸ் - ஜான்சன் கூட்டணி

ஒருபுறம் விக்கெட்டுகள் வீழ்ந்தாலும், நடு வரிசை வீரர் டெவால்ட் பிரெவிஸ் சிறிது நேரம் தாக்குப்பிடித்து 34 ரன்கள் சேர்த்தார். அவர் ஆட்டமிழந்த பிறகு, டிரிஸ்டன் ஸ்டப்ஸ் மற்றும் மார்கோ ஜான்சன் ஆகியோர் ஜோடி சேர்ந்தனர். இந்த ஜோடி மிகவும் பொறுப்பாக விளையாடி அணியின் ஸ்கோரை சரிவில் இருந்து உயர்த்தியது.

விக்கெட் வீழ்ச்சியை தடுத்து நிறுத்திய இவர்கள், நியூசிலாந்து பந்துவீச்சாளர்களை நேர்த்தியாக எதிர்கொண்டனர். ஸ்டப்ஸ் 24 பந்துகளில் 29 ரன்கள் எடுத்து ஆட்டமிழந்தார். இவர்கள் இருவரும் இணைந்து 6வது விக்கெட்டுக்கு முக்கியமான 73 ரன்களை பார்ட்னர்ஷிப்பாக அமைத்தது ஆட்டத்தில் திருப்புமுனையாக அமைந்தது.

மார்கோ ஜான்சன் அதிரடி

ஸ்டப்ஸ் ஆட்டமிழந்த பிறகு மார்கோ ஜான்சன் தனது அதிரடி ஆட்டத்தை வெளிப்படுத்த தொடங்கினார். இறுதி ஓவர்களில் அதிரடியாக விளையாடிய அவர், வெறும் 30 பந்துகளில் 55 ரன்கள் குவித்து அரைசதம் கடந்து இறுதிவரை ஆட்டமிழக்காமல் களத்தில் நின்றார். அவரது இந்த சிறப்பான இன்னிங்ஸில் 5 சிக்ஸர்கள் மற்றும் 2 பவுண்டரிகள் அடங்கும்.

நியூசிலாந்து பந்துவீச்சை பொறுத்தவரை மாட் ஹென்றி, கோல் மெக்கன்சி மற்றும் ரச்சின் ரவீந்திரா ஆகியோர் தலா 2 விக்கெட்டுகளை வீழ்த்தினர். மார்கோ ஜான்சனின் இந்த பொறுப்பான ஆட்டத்தால் தென்னாப்பிரிக்க அணி நிர்ணயிக்கப்பட்ட 20 ஓவர்கள் முடிவில் 8 விக்கெட்டுகள் இழப்பிற்கு 169 ரன்கள் எடுத்தது. இந்த அரையிறுதிப் போட்டியில் 170 ரன்கள் என்ற சவாலான இலக்கு நியூசிலாந்து அணிக்கு நிர்ணயிக்கப்பட்டது.