"பசியில் இருப்பவனுக்கு பழைய சோறும் பாயாசம்".. ஜிம்பாப்வே வெற்றியை ஜாலியாக பாராட்டிய சடகோபன் ரமேஷ்

சென்னை: இங்கிலாந்து மற்றும் அயர்லாந்து தொடர்களில் தொடர் தோல்விகளைச் சந்தித்த இந்திய அணி, ஜிம்பாப்வேக்கு எதிரான முதல் டி20 போட்டியில் 7 விக்கெட் வித்தியாசத்தில் அபார வெற்றி பெற்று வெற்றிப் பாதைக்குத் திரும்பியுள்ளது. இந்த ஆறுதல் வெற்றியை இந்திய முன்னாள் வீரர் சடகோபன் ரமேஷ் தனது பாணியில், "பழைய சோறு, பாயாசம்" என ஒப்பிட்டு ஜாலியாகப் பாராட்டியுள்ளார்.

முன்னதாக அயர்லாந்து மற்றும் இங்கிலாந்து அணிகளுக்கு எதிராக ஏழு போட்டிகளில் ஆடிய இந்திய அணி அதில் ஒரு வெற்றி கூட பெறவில்லை. ஆறு தோல்விகளை மட்டுமே சந்தித்தது. மழையால் ஒரு போட்டி ரத்து ஆனது. அதனால் கடும் அழுத்தத்தில் இருந்த இந்திய அணி ஜிம்பாப்வே அணிக்கு எதிரான டி20 தொடரின் முதல் போட்டியில் வெற்றி பெற்று இருக்கிறது.

இந்தப் போட்டி குறித்து பேசிய சடகோபன் ரமேஷ், "அப்பாடா! ரொம்ப நாட்களுக்குப் பிறகு இந்திய அணி ஒரு டி20 போட்டியில் வெற்றி பெற்றதைப் பார்த்து நிம்மதியாகப் பெருமூச்சு விட்டுக்கொள்ளலாம். 'ஜிம்பாப்வே அணியை வீழ்த்துவதில் என்ன பெருமை இருக்கிறது?' என்று சிலர் கேட்கலாம். ஆனால், கடுமையான பசியில் இருப்பவனுக்குப் பழைய சோறு கூட பாயாசம் போலத் தான் தெரியும். அந்த வகையில், தொடர் தோல்விகளுக்கு நடுவே கிடைத்த இந்தச் சிறிய வெற்றி கூட பாயாசம் போலத் தான் இனிக்கும். இந்திய அணிக்கு எனது வாழ்த்துகள்" என்று நகைச்சுவையாகக் கூறினார்.

கேப்டன் ஸ்ரேயாஸ் ஐயர் குறித்துப் பேசிய அவர், "ஸ்ரேயாஸ் ஐயருக்கு எனது வாழ்த்துகள். பாவம், கேப்டனாகப் பொறுப்பேற்றதில் இருந்தே அவருக்குத் தோல்விகளாகவே அமைந்தது. 'யாருடன் ஜெயித்தால் என்ன, ஒரு வெற்றி கிடைத்தால் போதும்' என்ற நிலையில் இருந்தவருக்கு, இறுதியாக முதல் வெற்றி கிடைத்துள்ளது" என்றார்.

"ராஜஸ்தானை விட்டு சிஎஸ்கே வந்தது பெரிய ரிஸ்க்".. தோனி கூறிய அந்த வார்த்தை.. மவுனம் கலைத்த சாம்சன்

மேலும், இந்திய அணியின் தற்காலிக பயிற்சியாளர் வி.வி.எஸ். லக்ஷ்மனைப் பாராட்டிய சடகோபன் ரமேஷ், "லக்ஷ்மன் பயிற்சியாளராக வரும் தொடர்களில் இந்திய அணி எப்போதும் சிறப்பாக விளையாடுகிறது. எதிரணியைச் சுருட்டி வெற்றி பெறுகிறது. சிறிய எதிரணியாக இருந்தாலும் சரி, பெரிய அணியாக இருந்தாலும் சரி, தற்போதைய சூழலில் இந்திய அணிக்கு வெற்றி தான் முக்கியம். சிறியதோ பெரியதோ, ஜெயிப்பது தான் நமது வேலை என்பதால் தொடர்ந்து சிறப்பாக விளையாடி வெற்றிகளைக் குவிக்க வேண்டும்" என்று கூறினார்.