5 மேட்ச் ஆடியவுடன் காயம்.. இவரை எப்படி இந்திய அணியில் செலக்ட் பண்ணீங்க? சடகோபன் ரமேஷ் கேள்வி

சென்னை: இங்கிலாந்துக்கு எதிரான டி20 தொடரில் இந்திய அணி மோசமாக சொதப்பி தொடரை இழந்ததைத் தொடர்ந்து, பிசிசிஐ தேர்வு குழுவின் குளறுபடிகளையும், வீரர்களின் தேர்வு முறையையும் முன்னாள் வீரர் சடகோபன் ரமேஷ் கடுமையாக சாடியுள்ளார். குறிப்பாக, வேகப்பந்து வீச்சாளர் ஹர்ஷித் ரானாவின் தேர்வு குறித்து அவர் அடுக்கடுக்கான கேள்விகளை எழுப்பியுள்ளார்.

சில மாதங்களுக்கு முன்பு முழங்கால் அறுவை சிகிச்சை செய்து கொண்ட ஹர்ஷித் ரானா, அதன் காரணமாக 2026 ஐபிஎல் மற்றும் 2026 டி20 உலகக் கோப்பை தொடர்களை தவறவிட்டார். அதன் பிறகு எவ்வித உள்நாட்டுப் போட்டிகளிலும் விளையாடி தனது உடற்தகுதியை நிரூபிக்காமலேயே, நேரடியாக அயர்லாந்து மற்றும் இங்கிலாந்து சுற்றுப்பயணத்திற்கான இந்திய அணியில் சேர்க்கப்பட்டார்.

தற்போது இங்கிலாந்துக்கு எதிரான 3வது போட்டியில் அவருக்கு தொடைப்பகுதியில் காயம் ஏற்பட்டு, 4வது போட்டியில் இருந்து விலகினார். அதாவது காயத்தில் இருந்து மீண்டு வந்து ஐந்து போட்டிகள் மட்டுமே ஆடிய நிலையில் அவருக்கு மீண்டும் காயம் ஏற்பட்டுள்ளது.

இது குறித்து சடகோபன் ரமேஷ் தனது யூடியூப் பக்கத்தில் பேசுகையில், "அறுவை சிகிச்சைக்குப் பிறகு எங்கும் தனது உடற்தகுதியை நிரூபிக்காத ஹர்ஷித் ரானாவை எப்படி நேரடியாக இந்திய அணிக்கு தேர்வு செய்தீர்கள்? முழங்கால் அறுவை சிகிச்சையில் இருந்து முழுமையாக குணமடையாத போது, அது தொடை அல்லது தசைநார் காயங்களுக்கு வழிவகுக்கும். அவர் 100 சதவீத உடற்தகுதியுடன் அணிக்கு திரும்பவில்லை என்பது இதில் இருந்தே புரிகிறது. வெவ்வேறு வீரர்களுக்கு வெவ்வேறு அளவுகோல்களை தேர்வு குழு பயன்படுத்துகிறது என்பதற்கு இதுவே ஆதாரம்" என ஆதங்கத்துடன் தெரிவித்துள்ளார்.

ஒழுங்கா ஆடாத இந்த பேட்ஸ்மேனை நீக்கி விட்டு சஞ்சு சாம்சனுக்கு வாய்ப்பு கொடுங்க.. பார்த்திவ் கோரிக்கை

மேலும், ஹர்ஷித் ரானாவுக்கு காயம் ஏற்படுவதற்கு முன்பாகவே, ஜிம்பாப்வே தொடரில் இருந்து அவருக்கு ஓய்வு அளிக்கப்பட்டதை சுட்டிக்காட்டிய சடகோபன் ரமேஷ், அவரின் பணிச்சுமையை தொடர்ந்து சமாளிக்க முடியாது என்பது அணி நிர்வாகத்திற்கு முன்பே தெரிந்திருந்தது என்று கூறினார். அதே சமயம், ஹர்ஷித் ரானாவின் திறமை மீது தமக்கு எந்த சந்தேகமும் இல்லை என்றும், அவர் அயர்லாந்து மற்றும் இங்கிலாந்து தொடர்களில் 5 போட்டிகளில் விளையாடி 7 விக்கெட்டுகளை வீழ்த்தியுள்ளார் என்றும் அவர் குறிப்பிட்டுள்ளார்.

IND vs ENG 5வது டி20.. இந்திய அணியில் வைபவ் உட்பட 3 வீரர்கள் நீக்கப்பட வாய்ப்பு.. மீண்டும் சஞ்சு?