"சஞ்சு சாம்சனுக்கு பயம் வந்துவிட்டது அதனால்தான்..".. இந்திய அணிக்குள் நடப்பதை உடைத்த ஹனுமா விஹாரி

லக்னோ: சர்வதேச டி20 போட்டிகளில் நட்சத்திர வீரர் சஞ்சு சாம்சன் தொடர்ச்சியாக சொதப்பி வருவதற்கு, அவருக்கு ஏற்பட்டுள்ள பயமே காரணம் என்று இந்திய வீரர் ஹனுமா விஹாரி வெளிப்படையாகத் தெரிவித்துள்ளார். வெஸ்ட் இண்டீஸ் அணிக்கு எதிரான முதல் டி20 போட்டியில் கேப்டன் ஸ்ரேயாஸ் ஐயர் 43 பந்துகளில் 102 ரன்கள் விளாச, இந்திய அணி 8 விக்கெட் வித்தியாசத்தில் அபார வெற்றி பெற்றது. ஆனால் தொடக்க ஆட்டக்காரராக களமிறங்கிய சஞ்சு சாம்சன் வெறும் 11 ரன்களில் ஆட்டமிழந்து ஏமாற்றம் அளித்தார். முன்னதாக நடைபெற்ற ஆசிய விளையாட்டுப் போட்டிகளிலும் கூட அவர் 9, 7, 2 ரன்கள் மட்டுமே எடுத்துத் தடுமாறினார்.

சஞ்சு சாம்சனுக்கு தொடர்ந்து வழங்கப்படும் வாய்ப்புகள் குறித்து தனது இணையப் பக்கத்தில் பேசிய ஹனுமா விஹாரி, "சஞ்சு சாம்சனுக்கு இன்னும் எத்தனை போட்டிகளுக்குத்தான் வாய்ப்பு வழங்கப் போகிறார்கள் என்பதுதான் மிகப்பெரிய கேள்வி. நானும் சாம்சனின் தீவிர ரசிகன்தான். அவர் தொடர்ந்து ஆட வேண்டும் என்றே நினைக்கிறேன். ஆனால் தற்போது அவருக்குள் ஒருவித பாதுகாப்பற்ற பயமும் தயக்கமும் வந்துவிட்டது.

தனது இடத்தைப் பிடிக்க மற்றொரு வீரர் பின்னாலேயே இருக்கும்போது, அந்த அழுத்தத்தால் தன்னால் சரியாக ஆட முடிவதில்லை என்று சஞ்சு சாம்சனே முன்பு ஒப்புக்கொண்டுள்ளார். இதற்கு முன்பு நியூசிலாந்து தொடரில் இஷான் கிஷன் அணிக்கு திரும்பிய போது சாம்சன் அழுத்தத்தில் சொதப்பினார். தற்போது 15 வயது வீரர் வைபவ் சூர்யவன்ஷி பெஞ்சில் காத்திருக்கிறார். அந்த அழுத்தமே சாம்சனைத் துரத்துகிறது.

கேமராமேன் செய்த அந்த ஒரு ஜூம்.. ஆஸ்திரேலியாவின் தில்லுமுல்லு அம்பலமானது எப்படி? வெளியான உண்மை

இந்திய அணிக்காக ஆடும்போது அழுத்தத்தைக் கையாள்வது மிகவும் அவசியம். ஆனால் போட்டி பயம் காரணமாக சஞ்சு சாம்சன் தனது இயல்பான ஆட்டத்தை இழந்து தவிக்கிறார்" என்று ஹனுமா விஹாரி தெரிவித்தார். வெள்ளிக்கிழமை ராஞ்சியில் இந்தியா - வெஸ்ட் இண்டீஸ் அணிகளுக்கு இடையே 2-வது டி20 போட்டி நடைபெறவுள்ள நிலையில், சஞ்சு சாம்சன் தனது ஆட்டத்தை மீட்டெடுப்பாரா அல்லது வைபவ் சூர்யவன்ஷிக்கு வாய்ப்பு கிடைக்குமா என்ற எதிர்பார்ப்பு ரசிகர்களிடையே அதிகரித்துள்ளது.