‘சஞ்சு சாம்சன் தோனியாக மாற வேண்டிய அவசியமில்லை’.. மல்லுக்கு நின்ற கம்பீர்.. பகிர்ந்த சசி தரூர்

மும்பை: இந்திய அணி 3 ஆவது முறையாக டி20 உலகக்கோப்பையை வென்று வரலாற்றுச் சாதனை படைத்துள்ள நிலையில், தொடர் நாயகன் விருது வென்ற சஞ்சு சாம்சனுக்குப் பாராட்டுகள் குவிந்து வருகின்றன. இந்த நிலையில், காங்கிரஸ் எம்.பி சசி தரூர், சஞ்சு சாம்சனை 'அடுத்த எம்.எஸ் தோனி' என்று தான் ஒருமுறை கூறியதையும், அதற்கு தற்போதைய தலைமைப் பயிற்சியாளர் கௌதம் கம்பீர் அளித்த பதிலையும் நினைவு கூர்ந்துள்ளார்.

இது குறித்துப் பேசிய சசி தரூர், "சஞ்சு சாம்சனை நான் முதன்முதலில் சந்திக்கும் போது அவருக்கு 14 வயது. சிறந்த விக்கெட் கீப்பிங் மற்றும் பேட்டிங் திறமையுடன் காணப்பட்ட அந்தச் சிறுவனைப் பார்த்து, நீ தான் அடுத்த தோனி என்று நான் கூறினேன். அவர் இன்று அடைந்துள்ள உச்சத்தைப் பார்க்கும்போது எனக்கு மிகவும் பெருமையாக இருக்கிறது" என்று நெகிழ்ச்சியுடன் தெரிவித்தார்.

ஆனால், பல ஆண்டுகளுக்கு முன்பு கௌதம் கம்பீர் தனது இந்த கருத்தைத் திருத்தியதாக சசி தரூர் குறிப்பிட்டார். "சஞ்சு சாம்சன் மற்றொரு தோனியாக மாற வேண்டிய அவசியமில்லை, அவர் தனக்கான தனித்துவமான அடையாளத்தை உருவாக்குவார். அவர் இணையற்ற ஒரே ஒரு சஞ்சு சாம்சனாகவே இருப்பார் என்று கம்பீர் என்னிடம் கூறினார். இன்று கம்பீர் சொன்னது போலவே சாம்சன் தன்னை நிரூபித்துக் காட்டியுள்ளார்" என்று சசி தரூர் பாராட்டினார்.

இந்திய அணியின் தலைமைப் பயிற்சியாளராக ஆவதற்கு முன்பே, 2020 ஆம் ஆண்டில் சாம்சனை இந்தியாவின் சிறந்த இளம் விக்கெட் கீப்பர் பேட்ஸ்மேன் என கம்பீர் புகழ்ந்திருந்தார் என்பது குறிப்பிடத்தக்கது. டி20 உலகக்கோப்பைக்கு முன்பாக மோசமான ஃபார்மில் இருந்த சாம்சன், சூப்பர் 8 சுற்றில் ஜிம்பாப்வே அணிக்கு எதிரான வாழ்வா சாவா போட்டியில் களமிறங்கிச் சிறப்பான ஆட்டத்தை வெளிப்படுத்தினார்.

அதனைத் தொடர்ந்து வெஸ்ட் இண்டீஸ், இங்கிலாந்து மற்றும் நியூசிலாந்து அணிகளுக்கு எதிரான போட்டிகளில் தொடர்ந்து 3 அரைசதங்கள் விளாசி இந்திய அணி கோப்பையைத் தக்கவைக்க முக்கியக் காரணமாகத் திகழ்ந்தார். ராஜஸ்தான் ராயல்ஸ் அணியின் கேப்டனாகவும் பல ஆண்டுகள் சிறப்பாகச் செயல்பட்ட சஞ்சு சாம்சன், அமைதியாகவும் ஆரவாரமின்றியும் தனது திறமையை நிரூபித்து இந்திய அணியின் தவிர்க்க முடியாத வீரராக தற்போது உருவெடுத்துள்ளார்.