IND vs IRE: இந்திய அணி தோல்விக்கு பல காரணம் இருக்கு.. ஆனால் நீங்க இவரை தான் நீக்குவிங்க-ஆகாஷ் சோப்ரா

மும்பை: அயர்லாந்துக்கு எதிரான தொடரை 2-0 என்ற கணக்கில் இந்திய அணி இழந்ததைத் தொடர்ந்து, பிளேயிங் லெவனில் சஞ்சு சாம்சனின் இடம் குறித்து முன்னாள் இந்திய வீரர் ஆகாஷ் சோப்ரா கவலை தெரிவித்துள்ளார். நடப்பு டி20 உலக சாம்பியனான இந்திய அணி தொடர்ந்து 16 டி20 தொடரை வென்ற நிலையில், தற்போது அந்த பயணம் முடிவுக்கு வந்துள்ளது.

இந்த சூழலில் அணியில் இருந்து யாரையாவது நீக்க வேண்டும் என்றால், பொதுவாக கேரளாவைச் சேர்ந்த விக்கெட் கீப்பர்-பேட்டரான சாம்சன் தான் முதலில் நீக்கப்படுகிறார் என்று ஆகாஷ் சோப்ரா சாடினார். பெல்ஃபாஸ்டில் நடைபெற்ற இரண்டாவது டி20 போட்டியில் இந்தியா ஒரு ரன் வித்தியாசத்தில் தோல்வியடைந்து, இரண்டு போட்டிகள் கொண்ட தொடரை இழந்தது. சாம்சன் முதல் போட்டியில் ஐந்து ரன்கள் எடுத்த நிலையில், இரண்டாவது போட்டியில் ரன் ஏதும் எடுக்காமல் முதல் பந்திலேயே ஆட்டமிழந்தார்.

சாம்சன் இடத்திற்கு தான் ஆபத்து

இது குறித்துப் பேசிய முன்னாள் இந்திய தொடக்க வீரர் ஆகாஷ் சோப்ரா, சாம்சனின் அடுத்தடுத்த தோல்விகள் அவரது இடத்தை கேள்விகுறியாக்கியுள்ளதாகக் கூறினார். "சஞ்சு முதல் பந்திலேயே ஆட்டமிழந்தார். இப்போது நான் சஞ்சுவைப் பற்றி கொஞ்சம் கவலைப்படத் தொடங்கியுள்ளேன், ஏனென்றால் முதலில் பாதிப்புக்குள்ளாவது அவர்தான். யாரையாவது அணியில் இருந்து வெளியேற்ற வேண்டும் என்றால், முதலில் நீக்கப்படுவது சஞ்சு தான்.

WTC புள்ளிப்பட்டியலில் இந்தியாவுக்கு அடிச்ச லக்! வெஸ்ட் இண்டீஸ் வரலாற்று வெற்றி! சரிந்த இலங்கை

எனவே அவர் ரன்கள் குவிப்பார் என்று நான் மனதிற்குள் நம்பினேன், குறிப்பாக முதல் போட்டியில் அவுட் ஆன பிறகு இரண்டாவது போட்டியில் சிறப்பாக விளையாடுவார் என எதிர்பார்த்தேன்," என்று அவர் கூறினார். அபிஷேக் சர்மா மற்றும் இஷான் கிஷன் ஆகியோரும் குறைந்த ரன்களுக்கு ஆட்டமிழந்ததைச் சுட்டிக்காட்டிய சோப்ரா, ஸ்ரேயாஸ் ஐயர் சமீபகாலமாக ஃபார்மில் இல்லை என்றும் குறிப்பிட்டார்.

ஸ்ரேயாஸ் தொடர்ந்து ஃபார்மில் இல்லை

"ஜெய் முந்த்ரா சிறப்பாக பந்துவீசுகிறார். அபிஷேக் சர்மா 0 ரன்களில் ஆட்டமிழந்தார், இஷான் கிஷன் ரன் அவுட் ஆனார். கடந்த இரண்டு அல்லது மூன்று போட்டிகளில், ஒருநாள் தொடராக இருந்தாலும் சரி, இங்கும் சரி, ஸ்ரேயாஸ் ஐயர் ரன்கள் எடுக்கவில்லை, அவரும் அதே வழியில் தான் ஆட்டமிழந்து வருகிறார்," என்று அவர் விளக்கினார்.இந்திய அணி 35 ரன்களுக்கு 4 விக்கெட்டுகளை இழந்து தடுமாறிய போது, பேட்டிங் வரிசையில் செய்யப்பட்ட மாற்றங்கள் குறித்தும், இந்த போட்டியில் எப்படி தோற்றோம் என்று நிர்வாகம் யோசித்துக் கொண்டிருக்கும் என்றும் சோப்ரா கூறினார்.

IND vs IRE: வெட்கக்கேடான சாதனை படைத்த சாம்சன், அபிஷேக்.. ஜோடியாக போட்ட கோழி முட்டை

"அணி மிகவும் இக்கட்டான நிலையில் இருப்பதை நீங்கள் உணர்கிறீர்கள். திடீரென்று அக்சர் படேலை பேட்டிங் வரிசையில் முன்னிறுத்தி, சிவம் துபேவை பின்னுக்குத் தள்ளி, சூர்யான்ஷ் ஷெட்கே மீது எதிர்பார்ப்புகளை வைத்தீர்கள், ஆனால் போட்டியில் தோற்றுவிட்டீர்கள். அது எப்படி நடந்தது என்று நீங்கள் யோசிக்கிறீர்கள்," என்று அவர் குறிப்பிட்டார்.

அயர்லாந்துக்கு எதிரான இரண்டாவது டி20 போட்டியில் 155 ரன்கள் என்ற இலக்கை துரத்திய இந்திய அணியில் திலக் வர்மா (46 பந்துகளில் 55 ரன்கள்) மட்டுமே குறிப்பிடத்தக்க பங்களிப்பை அளித்தார். சஞ்சு சாம்சனைப் போலவே அபிஷேக் சர்மாவும் ரன் ஏதும் எடுக்காமல் ஆட்டமிழந்தார். இஷான் கிஷன் (11 பந்துகளில் 12) மற்றும் ஸ்ரேயாஸ் ஐயர் (7 பந்துகளில் 10) ஆகியோரும் சோபிக்கவில்லை.

வைபவ் சூர்யவன்ஷி அறிமுகம் விரைவில்

ஒரு போட்டியில் கூட தோற்கக் கூடாத அணிக்கு எதிராக இந்தியா அடுத்தடுத்து தோல்விகளைச் சந்தித்துள்ளது என்று ஆகாஷ் சோப்ரா கவலை தெரிவித்தார். "ஹர்ஷித் ராணா பவுண்டரிகளும் சிக்ஸர்களும் அடித்து போட்டியை பரபரப்பானதாக மாற்றியதாலும், பிரின்ஸ் யாதவ் கடைசி பந்தில் சிக்ஸர் அடித்ததாலும் நாம் ஒரு ரன் வித்தியாசத்தில் தான் தோற்றோம் என்று கூறலாம். ஆனால் அந்த ஒரு ரன் தோல்வியை மறந்துவிடுங்கள். ஒரு போட்டியில் கூட நீங்கள் தோற்கக் கூடாத ஒரு அணியிடம் இரண்டு போட்டிகளில் தோற்றுள்ளீர்கள் என்பதே உண்மை," என்றார்.

இந்தியாவின் பேட்டிங் சரிவுக்குப் பிறகு வைபவ் சூர்யவன்ஷி சர்வதேச போட்டிகளில் அறிமுகமாகலாம் என்று சோப்ரா கணித்துள்ளார். "இன்னும் 20 வருடங்கள் கழித்து, அயர்லாந்துக்கு எதிராக இந்தியா எப்பொழுது தொடரை முழுமையாக இழந்தது என்ற கேள்வி எழும்போது, அது 2026-ல் நடந்தது என்று கூறுவீர்கள். பேட்டிங் செயல்பாடு இப்படி இருந்தால் மாற்றங்களைச் செய்ய வேண்டியிருக்கும் என்பதால், வைபவ் சூர்யவன்ஷி சர்வதேச போட்டியில் அறிமுகமாவதற்கு மிக அருகில் இருப்பதாகத் தோன்றுகிறது," என்று சோப்ரா தெரிவித்தார்.

IND Vs IRE: ஒரு தலைமுறையையே மாற்றும் வெற்றி இது.. எங்களையும் இனி மதிப்பாங்க.. அயர்லாந்து கேப்டன் லார்கன்

இந்தியா இந்தத் தொடரை வென்றிருந்தால், சில பேட்டர்கள் ரன் குவிக்காவிட்டாலும் வைபவ் சூர்யவன்ஷி தனது வாய்ப்புக்காகக் காத்திருக்க வேண்டியிருந்திருக்கும் என்று சோப்ரா சுட்டிக்காட்டினார். இருப்பினும், அயர்லாந்துக்கு எதிரான தொடர் தோல்விக்குப் பிறகு மாற்றங்கள் தேவை என்று அணி நிர்வாகம் உணரும் என்று அவர் நினைக்கிறார்.