சர்பராஸ் கான் எனது மகன் மாதிரி.. அவர் மேல ஒரு கண் வைங்கப்பா.. கிறிஸ் கெயில் புகழாரம்

பலே ஷாட்டுகள்

சர்பராஸ் கானின் நேற்றைய ஆட்டம் ரசிகர்கள் பலரையும் புருவத்தை உயர்த்த செய்துள்ளது. அதிலும் பெடல் ஸ்வீப் எனப்படும் ஷாட்டுகளில் சர்பராஸ் கான் கை தேர்ந்தவாரக உள்ளார். லெக் பக்கம் மட்டுமின்றி, ஆப் சைடிலும், ரிவர்ஸ் ஸ்வீப் மூலமாக சிக்சர் அடிக்க முடியும் என்று சர்பராஸ் கான் காண்பித்தார்.

மகன் போல

சர்பராஸ் கான் பேட்டிங் குறித்து சக ஆட்டக்காரரான அதிரடி வீரர் கிறிஸ் கெயில் கூறியதாவது: சர்பராஸ் கான் எனது மகனை போன்றவர். போட்டிகள் நடைபெறும்போது, எப்போதும், என் உடன் அமர்ந்திருப்பார். செல்போனில் மெசேஜ் மூலம் என்னை அவ்வப்போது, தொடர்பு கொள்வார்.

ஒரு கண் வையுங்கள்

இன்று (நேற்று) சர்பராஸ் கான் ஆடிய விதம் மிகவும் அருமையாக இருந்தது. சர்பராஸ் கான் கண்டிப்பாக சிறந்த எதிர்காலத்தை கொண்டுள்ளார். சர்பராஸ் கான் மீது ஒரு கண் வைத்திருக்க வேண்டியது அவசியம். இவ்வாறு கெயில் தெரிவித்தார்.

ஜூனியர் வீரர்

சமீபத்தில் நிறைவடைந்த 19 வயதுக்குட்பட்டோர் ஜூனியர் உலக கோப்பைக்கான, இந்திய கிரிக்கெட் அணியில் இடம்பிடித்திருந்தவர் சர்பராஸ் கான். மும்பையை பூர்வீகமாக கொண்டவர். கடந்த ஐபிஎல் சீசனின்போதும் பெங்களூருக்காக ஆடிய சர்பராஸ் கான் ஒரு சில போட்டிகளில் விஸ்வரூபத்தை காட்டியிருந்தார். கிறிஸ் கெயிலுக்கு தற்போது 36 வயதாகிறது என்பது குறிப்பிடத்தக்கது.