மகளிர் டி20 உலகக்கோப்பை: இதுவரை யாருமே செய்யல.. உலக சாதனை படைத்த ஷஃபாலி வர்மா!

எட்ஜ்பாஸ்டன்: பாகிஸ்தானுக்கு எதிரான மகளிர் டி20 உலகக் கோப்பை போட்டியில், இந்திய அணியின் தொடக்க ஆட்டக்காரர் ஷஃபாலி வர்மா ஆட்டத்தின் முதல் பந்திலேயே சிக்ஸர் அடித்து வரலாற்று சாதனை படைத்துள்ளார். இதன் மூலம் மகளிர் டி20 உலகக் கோப்பை போட்டி ஒன்றில், தான் எதிர்கொண்ட முதல் பந்திலேயே சிக்ஸர் அடித்த உலகின் முதல் கிரிக்கெட் வீராங்கனை என்ற பெருமையை அவர் பெற்றுள்ளார்.

2026 ஆம் ஆண்டுக்கான உலகக் கோப்பை தொடரில் தனது மற்றும் இந்திய அணியின் ரன் கணக்கை அவர் பிரம்மாண்டமான சிக்ஸர் மூலம் தொடங்கினார்.பாகிஸ்தான் அணி இடது கை சுழற்பந்து வீச்சாளரான சாடியா இக்பாலைக் கொண்டு பந்துவீச்சைத் தொடங்கி ஷஃபாலியை வீழ்த்த திட்டமிட்டது. ஆனால், சாடியா வீசிய முதல் பந்து சற்று 'புல் லென்த்' ஆக வந்ததைக் கண்ட ஷஃபாலி, உடனடியாக பாய்ந்து பந்தை மைதானத்திற்கு நேராக சிக்ஸருக்கு பறக்கவிட்டார்.

இருப்பினும், சாடியா உடனடியாக தனது பந்துவீச்சின் லைன் மற்றும் லென்த்தை மாற்றி இந்திய வீராங்கனைக்கு நெருக்கடி கொடுத்தார். சாடியா வீசிய அடுத்தடுத்த பந்துகள் விக்கெட்டை நோக்கி நேராக வந்ததால், ஷஃபாலி தற்காப்பு ஆட்டத்திற்கு தள்ளப்பட்டார். தொடர்ந்து அதிரடி காட்ட முயன்ற ஷஃபாலி, ஆஃப் சைடில் ரன் குவிப்பதற்காக நகர்ந்து ஆட முயற்சித்தார். ஆனால், அதற்கு இடம் கொடுக்காமல் சாடியா சாமர்த்தியமாக பந்துவீசினார்.

IND Vs AFG: அம்மா தான் எல்லாம்.. செய்தியாளர் சந்திப்பை தாய் போனுக்காக நிறுத்திய நிதிஷ் குமார் ரெட்டி

அந்த ஓவரின் ஐந்தாவது பந்தில் பந்துவீச்சாளர் சாடியா நினைத்தது நடந்தது. மீண்டும் ஒருமுறை ஆஃப் சைடில் நகர்ந்து அதிரடி ஷாட் அடிக்க ஷஃபாலி முயன்றபோது, பந்து எதிர்பாராத விதமாக கூடுதல் பவுன்ஸ் ஆனது. இதனால் பந்து பேட்டின் வெளிவிளிம்பில் பட்டு விக்கெட் கீப்பர் முனீபா அலியிடம் தஞ்சம் புகுந்தது. இதனால் ஷஃபாலி ஆட்டமிழந்தார்.

சாடியா தனது ஓவரின் கடைசி பந்திலும் விக்கெட் வீழ்த்தும் நிலைக்குச் சென்றார், ஆனால் ஜெமிமா ரோட்ரிக்ஸ் அந்த பந்தைத் தட்டிவிட்டு ஆட்டமிழக்காமல் தப்பினார். இந்த ஓவரில் வீசப்பட்ட ஒரு வைடு ரன்னுடன் சேர்த்து, முதல் ஓவரின் முடிவில் இந்திய அணி 1 விக்கெட் இழப்பிற்கு 7 ரன்கள் எடுத்திருந்தது.

இந்த முதல் ஓவர் இந்திய அணிக்கு சில முக்கிய விஷயங்களை உணர்த்தியுள்ளது. முதலாவதாக, ஷஃபாலியின் இயல்பான ஆட்டமே இந்த அதிரடிதான். டி20 கிரிக்கெட் போட்டிக்கு இத்தகைய அதிரடி ஆட்டம் மிகவும் தேவையானது என்பதால், இதை விமர்சிப்பதை விடுத்து ஊக்குவிக்க வேண்டும். ஏனெனில் உலக அளவில் இவரைப் போல அதிரடியாக விளையாடக்கூடிய வீராங்கனைகள் மிகக் குறைவே.

IND w vs PAK W: மகளிர் டி20 உலகக் கோப்பை: வரலாற்று சாதனை படைத்த ஹர்மன்பிரீத் கவுர்!

அதே நேரத்தில், எட்ஜ்பாஸ்டன் ஆடுகளம் பேட்டிங் செய்ய அவ்வளவு எளிதானதாக இல்லை என்பதையும், போட்டி தொடர தொடர சுழற்பந்து வீச்சாளர்கள் ஆட்டத்தின் போக்கை மாற்றுவதில் முக்கிய பங்கு வகிப்பார்கள் என்பதையும் இந்திய அணி புரிந்து கொள்ள இது ஒரு வாய்ப்பாக அமைந்தது.