இந்தியாவுக்கு எதிராக புதிய சரித்திரம்.. கெயில், லாதம் சாதனைகளை சுக்குநூறாக்கிய ஷாய் ஹோப்!

சண்டிகர்: இந்திய அணிக்கு எதிரான 3-வது ஒருநாள் போட்டியில் 162 ரன்கள் விளாசிய வெஸ்ட் இண்டீஸ் கேப்டன் ஷாய் ஹோப், கிறிஸ் கெயில் மற்றும் டாம் லாதமின் சாதனைகளை முறியடித்து புதிய சரித்திரம் படைத்துள்ளார். நியூ சண்டிகரில் நடைபெற்ற இப்போட்டியில் 352 ரன்கள் என்ற கடின இலக்கை துரத்திய வெஸ்ட் இண்டீஸ் அணி 5 விக்கெட் வித்தியாசத்தில் அபார வெற்றி பெற்றது. இதில் தொடக்க வீரராகவும் விக்கெட் கீப்பராகவும் களமிறங்கிய கேப்டன் ஷாய் ஹோப், 143 பந்துகளில் 17 பவுண்டரிகள், 3 சிக்சர்களுடன் ஆட்டமிழக்காமல் 162 ரன்கள் குவித்தார்.

இந்த இன்னிங்ஸ் மூலம் சர்வதேச ஒருநாள் கிரிக்கெட்டில் இந்திய அணிக்கு எதிராக ஒரு விக்கெட் கீப்பர் அடித்த அதிகபட்ச ரன் என்ற புதிய சாதனையை அவர் நிகழ்த்தினார். இதற்கு முன்பு 2022-ல் நியூசிலாந்து வீரர் டாம் லாதம் ஆட்டமிழக்காமல் எடுத்த 145 ரன்களே முதலிடத்தில் இருந்தது. அத்துடன் இந்தியாவுக்கு எதிராக ஒருநாள் போட்டியில் 150 ரன்களைக் கடந்த முதல் விக்கெட் கீப்பர் என்ற பெருமையையும் பெற்றார்.

அதேபோல் இந்திய அணிக்கு எதிராக அதிக சதங்கள் விளாசிய வெஸ்ட் இண்டீஸ் வீரர் என்ற கிறிஸ் கெயிலின் சாதனையையும் ஹோப் தகர்த்தார். கெயில் 41 போட்டிகளில் 4 சதங்கள் அடித்திருந்த நிலையில், ஹோப் 29 போட்டிகளிலேயே தனது 5-வது சதத்தைப் பதிவு செய்து சாதனை படைத்தார்.

மேலும், இந்திய அணிக்கு எதிராக ஒருநாள் போட்டியில் எதிரணி கேப்டன் அடித்த 2-வது அதிகபட்ச தனிநபர் ஸ்கோராகவும் ஹோப்பின் 162 ரன்கள் அமைந்தது. முன்னதாக 2000-ஆம் ஆண்டில் இலங்கை கேப்டன் சனத் ஜெயசூர்யா 189 ரன்கள் குவித்திருந்தார். இந்திய மண்ணில் ஷாய் ஹோப் விளாசும் 4-வது சதம் இதுவாகும். ஒரே போட்டியில் அடுத்தடுத்து பல சாதனைகளை முறியடித்த ஷாய் ஹோப்பிற்கு கிரிக்கெட் உலகம் பாராட்டு தெரிவித்து வருகிறது.

IND vs WI: முகமது சிராஜ் ஆவேசம்.. வெஸ்ட் இண்டீஸ் வீரருடன் ஆக்ரோஷ வாக்குவாதம்.. என்ன நடந்தது?

மூன்று போட்டிகள் கொண்ட இந்த தொடரை இந்தியா 2-1 என கைப்பற்றியது. மூன்றாவது போட்டியில் ஷாய் ஹோப்பின் அபார ஆட்டத்தால் வெஸ்ட் இண்டீஸ் அணி 351 ரன்கள் என்ற இலக்கை எட்டி ஆறுதல் வெற்றி பெற்றது.