“இந்தியாவை வீழ்த்த தோனி கொடுத்த ஐடியாவை..”.. வெஸ்ட் இண்டீஸ் கேப்டன் ஷாய் ஹோப் பேச்சு

சண்டிகர்: இந்திய அணிக்கு எதிரான 3-வது ஒருநாள் போட்டியில் வெஸ்ட் இண்டீஸ் அணி அபார வெற்றி பெற்றது. அதன் பிறகு பேசிய வெஸ்ட் இண்டீஸ் கேப்டன் ஷாய் ஹோப் இந்திய அணியின் முன்னாள் கேப்டன் தோனி தனக்கு அளித்த ஆலோசனையே இந்த வரலாற்று வெற்றிக்குக் காரணம் என்று தெரிவித்துள்ளார்.

மூன்று போட்டிகள் கொண்ட இந்த ஒருநாள் தொடரின் முதல் இரண்டு போட்டிகளில் இந்தியா வெற்றி பெற்று தொடரை ஏற்கனவே கைப்பற்றிய நிலையில் நியூ சண்டிகரில் நடைபெற்ற இப்போட்டியில் ஆறுதல் வெற்றி பெற வெஸ்ட் இண்டீஸ் அணி போராடியது. இந்த நிலையில், 352 ரன்கள் என்ற கடினமான இலக்கை விரட்டிய வெஸ்ட் இண்டீஸ் அணி 5 விக்கெட் வித்தியாசத்தில் வெற்றி பெற்றது. இப்போட்டியில் 143 பந்துகளில் ஆட்டமிழக்காமல் 162 ரன்கள் குவித்து ஆட்டநாயகன் விருது வென்ற ஷாய் ஹோப் போட்டிக்கு பின் பேசியதாவது:

"இந்தியாவில் பனிப்பொழிவு இருக்கும்போது இலக்கைத் துரத்துவது எப்போதும் எளிதானது. இந்த ஒருநாள் தொடரை ஒரு பெரிய வெற்றியுடன் முடிக்க விரும்பினோம். இந்த கடினமான சேஸிங்கின் போது சிறந்த வீரர் தோனி கூறிய அறிவுரை எனக்கு நினைவுக்கு வந்தது. 'நாம் நினைப்பதை விட பேட்டிங் செய்ய களத்தில் அதிக நேரம் இருக்கும்' என்று அவர் என்னிடம் முன்பே கூறியிருந்தார்.

அவரது ஆலோசனையை மனதில் கொண்டு, வெற்றி தோல்வியைப் பற்றி முன்கூட்டியே யோசிக்காமல் ஒவ்வொரு ஓவராக நிதானமாக அணுகினேன். கடைசி கட்டத்தில் பவுண்டரிகளை விளாச திட்டமிட்டேன். அதேபோல் இந்திய அணி பந்துவீச அதிக நேரம் எடுத்துக்கொண்டதால், கடைசி ஓவர்களில் வட்டத்திற்குள் கூடுதல் ஃபீல்டரை நிறுத்த வேண்டிய நிலைக்குத் தள்ளப்பட்டது. இது எங்களுக்கு சாதகமாக அமைந்து ரன் குவிக்க உதவியது.

351 ரன்கள் குவித்தும் இந்தியா தோல்வி.. 162 ரன்கள் விளாசி தோற்கடித்த வெஸ்ட் இண்டீஸ் கேப்டன் ஷாய் ஹோப்

சுமார் 30 ஓவர்கள் முடிந்த நிலையில் எனது இடுப்புப் பகுதியில் தசைப்பிடிப்பு வலி ஏற்பட்டது. ஆனாலும், இறுதிவரை களத்தில் நின்று போராடினேன். பேட்டிங்கிற்கு சாதகமான இந்திய ஆடுகளங்களில் பந்துவீசுவது கடினம். இதில் எங்கள் பவுலர்கள் நிறையக் கற்றுக்கொண்டனர். அடுத்து வரும் டி20 போட்டிகளுக்கு இன்னும் 2 நாட்கள் ஓய்வு உள்ளதால் முழு உடற்தகுதியுடன் திரும்புவேன் என நம்புகிறேன்" என்று ஷாய் ஹோப் கூறினார்.