பேட்டை தூக்கியதால் வந்த வினை.. ரன் அவுட் ஆகிவிட்டு அம்பயரிடம் கொந்தளித்த ஹெட்மயர்.. என்ன நடந்தது?

லக்னோ: இந்திய அணிக்கு எதிரான முதல் டி20 போட்டியில் வெஸ்ட் இண்டீஸ் அதிரடி பேட்டர் ஷிம்ரன் ஹெட்மயர் சர்ச்சையான முறையில் ரன் அவுட்டாகி, கள அம்பயர்களிடம் ஆவேசமாக வாக்குவாதம் செய்த சம்பவம் மைதானத்தில் பரபரப்பை ஏற்படுத்தியது. லக்னோ ஏகானா மைதானத்தில் நடைபெற்ற இந்தப் போட்டியில் வெஸ்ட் இண்டீஸ் அணி முதலில் பேட்டிங் செய்தது.

அப்போது 6-வது ஓவரை அக்சர் படேல் வீசினார். அந்த ஓவரின் 2-வது பந்தை ஷாய் ஹோப் தட்டிவிட்டார். அக்சர் படேல் டைவ் அடித்து பந்தைத் தடுக்க முயன்றபோது, பந்து அவரது இடது கையில் பட்டு கவர் திசையை நோக்கி விலகிச் சென்றது. இதையடுத்து எதிர்முனையில் நின்ற ஹெட்மயர் வேகமாக ஒரு ரன் ஓட முயன்றார்.

அப்போது மின்னல் வேகத்தில் பாய்ந்து வந்த இந்திய கேப்டன் ஸ்ரேயாஸ் ஐயர், பந்தை உடனடியாக விக்கெட் கீப்பர் சஞ்சு சாம்சனை நோக்கி வீசினார். சாம்சன் சற்றும் தாமதிக்காமல் ஸ்டம்பைத் தகர்த்தார். ஹெட்மயர் முழு மூச்சுடன் டைவ் அடித்தார். ஆனால், பந்து பட்டு ஸ்டம்பில் விளக்கு எரிந்த அந்த வினாடியில் அவரது பேட்டின் முனை தரையில் படாமல் காற்றில் இருந்தது.

இதனைத் தொலைக்காட்சி ரீப்ளேவில் பலமுறை ஆய்வு செய்த 3-வது அம்பயர் அவுட் எனத் தீர்ப்பளித்தார். வெறும் 2 பந்துகளில் 1 பவுண்டரியுடன் 5 ரன்கள் எடுத்திருந்த ஹெட்மயர், அம்பயரின் முடிவை ஏற்க முடியாமல் கடும் கோபமடைந்தார். தனது பேட் கோட்டிற்குள் பட்டுவிட்டது என்று கள அம்பயர்களிடம் ஆவேசமாக வாதாடிவிட்டு அதிருப்தியுடன் பெவிலியன் திரும்பினார்.

IND vs WI: வைபவ் சூர்யவன்ஷி நீக்கம்.. அறிமுகமான இளம் ஆல்-ரவுண்டர் நமன் திர்.. சாம்சன் நிலை என்ன?

இந்த ரன் அவுட் மூலம் சர்வதேச டி20 கிரிக்கெட்டில் அதிகமுறை ரன் அவுட்டான வெஸ்ட் இண்டீஸ் வீரர் என்ற மோசமான சாதனையை ஹெட்மயர் படைத்தார். டி20 அரங்கில் அவர் ரன் அவுட்டாவது இது 7-வது முறையாகும். இதற்கு முன் ஆண்ட்ரே பிளெட்சர் 6 முறை ரன் அவுட்டாகியிருந்தார்.