“இந்தியாவுக்கு உலகக்கோப்பை, தங்கப் பதக்கம் வென்று கொடுத்தார் ஆனால்..”.. துபே பற்றி ஆகாஷ் பேச்சு

மும்பை: இந்திய டி20 அணியில் ஆல்ரவுண்டர் சிவம் துபே மிக முக்கியமான வீரர் என்றும், ஆனால் அவருக்குத் தகுதியான அங்கீகாரம் இன்னும் கிடைக்கவில்லை என்றும் முன்னாள் இந்திய வீரர் ஆகாஷ் சோப்ரா தெரிவித்துள்ளார்.

சமீபத்தில் ஜப்பானில் நடைபெற்ற 2026 ஆசிய விளையாட்டுப் போட்டிகள் ஆண்கள் கிரிக்கெட் இறுதிப் போட்டியில், பாகிஸ்தானுக்கு எதிராக பேட்டிங்கில் 27 ரன்கள் எடுத்ததுடன், பந்துவீச்சில் 2 விக்கெட்டுகளையும் வீழ்த்தி இந்திய அணி தங்கம் வெல்ல சிவம் துபே முக்கியப் பங்காற்றினார்.

அடுத்து இந்தியா மற்றும் வெஸ்ட் இண்டீஸ் அணிகள் மோதும் 5 போட்டிகள் கொண்ட டி20 தொடரின் முதல் ஆட்டம் அக்டோபர் 6-ஆம் தேதி லக்னோவில் தொடங்குகிறது. இந்தத் தொடருக்கு முன்னதாக சிவம் துபேவின் முக்கியத்துவம் குறித்துப் பேசிய ஆகாஷ் சோப்ரா பேசுகையில், "சிவம் துபேவுக்கு கிரிக்கெட் உலகில் போதிய அங்கீகாரம் கிடைப்பதில்லை என்றே நான் நினைக்கிறேன். அவரிடம் அசாத்தியமான சிக்சர் அடிக்கும் திறமை உள்ளது. குறிப்பாக எதிரணியின் சுழற்பந்து வீச்சாளர்களை சாதாரணமாக அடித்து நொறுக்கும் ஆற்றல் அவரிடம் உண்டு. அவரது ஆல்ரவுண்டர் திறன் காரணமாக இந்திய அணிக்குத் தேவையான பேட்டிங் ஆழமும் சிறந்த சமநிலையும் கிடைக்கிறது.

2026 டி20 உலகக்கோப்பையை வென்றபோதும் சரி, ஆசிய விளையாட்டுப் போட்டி இறுதி ஆட்டத்திலும் சரி, சுழற்பந்து வீச்சாளர்களின் ஆதிக்கத்தை உடைக்க சிவம் துபே முன்னிறுத்தப்பட்டார். இங்கிலாந்துக்கு எதிரான முக்கிய போட்டியில் சூர்யகுமார் யாதவுக்கு முன்பாகவே இவரை களமிறக்கி சுழற்பந்து வீச்சை இந்தியா சிதறடித்தது. உலகக்கோப்பை மற்றும் ஆசியப் போட்டி இறுதி ஆட்டங்கள் போன்ற பெரிய மேடைகளில் இவ்வாறு அபாரமாகச் செயல்படுவது சாதாரண விஷயமல்ல. அவருக்கு இன்னும் அதிகமான பாராட்டுகள் கிடைக்க வேண்டும்" என்று அவர் தெரிவித்தார்.

"புவனேஸ்வர் குமார் உடனே வரணும்.. உலகக்கோப்பையில் இல்லாத அணியே நம்மை..".. ஹனுமா விஹாரி பேச்சு

ஹர்திக் பாண்டியா இல்லாத நிலையில் இந்திய டி20 அணியில் சிவம் துபே முக்கிய வேகப் பந்துவீச்சு ஆல் ரவுண்டராக இருக்கிறார். வெஸ்ட் இண்டீஸ் அணிக்கு எதிரான தொடரிலும் சிவம் துபே தனது அதிரடி ஆட்டத்தைத் தொடருவார் என எதிர்பார்க்கப்படுகிறது.