IND vs JAP: “ஜப்பான் ரசிகர்களுக்காக மழை வராமல் இருக்கணும்”.. இந்திய அணி கேப்டன் ஸ்ரேயாஸ் ஐயர் பேச்சு

நகோயா: இந்தியா மற்றும் ஜப்பான் நாடுகளுக்கு இடையிலான 75 ஆண்டு கால தூதரக உறவைக் கொண்டாடும் வகையில், இரு அணிகளுக்கும் இடையிலான வரலாற்றுச் சிறப்புமிக்க ஒரே ஒரு டி20 போட்டி செவ்வாய்க்கிழமை சானோ சர்வதேச மைதானத்தில் நடைபெற உள்ளது. சர்வதேச ஆடவர் கிரிக்கெட்டில் இந்தியா மற்றும் ஜப்பான் அணிகள் நேருக்கு நேர் மோதுவது இதுவே முதல்முறையாகும்.

ஆனால் ஜப்பானில் வந்துள்ள 'துஜுவான்' புயல் காரணமாக பெய்து வரும் கனமழையால், திங்கட்கிழமை நடைபெறவிருந்த இந்திய அணியின் பயிற்சி ஆட்டம் ரத்து செய்யப்பட்டது. இதனால் செவ்வாய்க்கிழமை போட்டி நடக்குமா என்ற பதற்றம் நிலவுகிறது.

இதுகுறித்து செய்தியாளர் சந்திப்பில் பேசிய இந்திய கேப்டன் ஸ்ரேயாஸ் ஐயர், "ஜப்பான் அணிக்கு எதிராக முதன்முதலாக விளையாடுவது எங்களுக்கு மிகவும் சுவாரசியமான அனுபவம். மைதானத்தின் தன்மை பற்றி எங்களுக்கு அதிகம் தெரியாது என்றாலும், மிகச் சிறந்த ஆட்டத்தை வெளிப்படுத்த காத்திருக்கிறோம். மைதானத்திற்கு வரும் ரசிகர்களுக்காக மழை குறுக்கிடாமல் ஒரு முழுமையான போட்டி நடக்க வேண்டும் என விரும்புகிறேன்" என்றார்.

மேலும் ஜப்பான் நாட்டின் அனுபவம் குறித்துப் பேசிய அவர், "வழக்கமாக ஆஸ்திரேலியா, இங்கிலாந்து, நியூசிலாந்து போன்ற நாடுகளுக்குச் சுற்றுப்பயணம் செல்வதை விட இது முற்றிலும் புதிய அனுபவமாக உள்ளது. இங்குள்ள மக்களின் கட்டுப்பாடு, ஒழுக்கம் மற்றும் அன்பான விருந்தோம்பல் என்னை வெகுவாகக் கவர்ந்துள்ளது. புதிய கலாச்சாரத்தை அறிந்து கொள்வதில் எனக்கு எப்போதும் ஆர்வம் உண்டு" என்று மகிழ்ச்சி தெரிவித்தார்.

இந்தியா - ஜப்பான் டி20 போட்டி நடப்பதில் சிக்கல்.. ஜப்பானை தாக்கும் கோர புயல்.. வானிலை அறிக்கை

ஜப்பான் அணியின் ஆட்ட நுணுக்கங்களை அறிந்துகொள்ள அந்நாட்டு வீரர்களின் வீடியோக்களைப் பார்த்து வியூகம் அமைத்து வருவதாகக் கூறிய ஸ்ரேயாஸ் ஐயர், உலகெங்கும் கிரிக்கெட் அசுர வளர்ச்சி அடைந்து வருவதையே இந்த வரலாற்றுப் போட்டி காட்டுவதாகவும் குறிப்பிட்டார். செப்டம்பர் 28 அன்று ஆசிய விளையாட்டு காலிறுதிப் போட்டியில் நேரடியாகக் களமிறங்கும் இந்திய அணிக்கு, இந்த ஜப்பான் போட்டி மிக முக்கியப் பயிற்சியாக அமையும் என எதிர்பார்க்கப்படுகிறது. ஆனால், மழை குறுக்கிடாமல் இருக்க வேண்டும் என்பதே அனைவரின் எதிர்பார்ப்பாக உள்ளது.