ரோஹித், சூர்யகுமார் வரிசையில் இணைந்த ஸ்ரேயாஸ் ஐயர்.. விராட் கோலி சாதனையை முறியடித்து வரலாறு!

லக்னோ: வெஸ்ட் இண்டீஸ் அணிக்கு எதிரான முதல் டி20 போட்டியில் 42 பந்துகளில் சதம் விளாசிய கேப்டன் ஸ்ரேயாஸ் ஐயர், சர்வதேச டி20 கிரிக்கெட்டில் சதம் அடித்த 3-வது இந்திய கேப்டன் என்ற புதிய வரலாற்றுச் சாதனையைப் படைத்துள்ளார்.

லக்னோ ஏகானா மைதானத்தில் 172 ரன்கள் என்ற இலக்கை நோக்கி ஆடியது இந்திய அணி. அப்போது 3-வது வீரராகக் களமிறங்கிய கேப்டன் ஸ்ரேயாஸ் ஐயர் 43 பந்துகளில் 10 பவுண்டரிகள், 6 சிக்சர்களுடன் 102 ரன்கள் குவித்து ஆட்டமிழக்காமல் களத்தில் நின்றார். வெறும் 42 பந்துகளிலேயே சதம் கடந்த இவர் பல்வேறு புதிய சாதனைகளைத் தகர்த்தெறிந்துள்ளார்.

இதற்கு முன்பு இந்திய அணியின் கேப்டனாக ரோஹித் சர்மா 3 சதங்களையும், சூர்யகுமார் யாதவ் ஒரு சதத்தையும் டி20 போட்டிகளில் அடித்துள்ளனர். அந்த ஜாம்பவான்களின் வரிசையில் தற்போது 3-வது இந்திய கேப்டனாக ஸ்ரேயாஸ் ஐயர் இடம் பெற்றுள்ளார்.

அதேபோல் சர்வதேச டி20 கிரிக்கெட் வரலாற்றில் இலக்கைத் துரத்தும் போது சதம் விளாசிய முதல் இந்திய கேப்டன் என்ற சாதனையை ஸ்ரேயாஸ் ஐயர் படைத்தார். இதற்கு முன் 2019-ஆம் ஆண்டில் வெஸ்ட் இண்டீஸ் அணிக்கு எதிராக சேஸிங்கில் இந்திய கேப்டனாக விராட் கோலி ஆட்டமிழக்காமல் அடித்த 94 ரன்களே சாதனையாக இருந்தது. அந்த சாதனையை தற்போது ஸ்ரேயாஸ் ஐயர் முறியடித்துள்ளார்.

மேலும் இந்தப் போட்டியில் இஷான் கிஷன் - ஸ்ரேயாஸ் ஐயர் கூட்டணி 3-வது விக்கெட்டுக்கு ஆட்டமிழக்காமல் 137 ரன்கள் சேர்த்தது. இது சர்வதேச டி20 அரங்கில் இந்திய அணியின் 3-வது விக்கெட்டுக்கான இணை சாதனையாகப் பதிவானது. கேப்டனாக முதல் சதம் அடித்து பல்வேறு சாதனைகளை படைத்த ஸ்ரேயாஸ் ஐயர் ரசிகர்களின் பாராட்டை பெற்றுள்ளார்.

"அவர்களுக்கு உதவ 20-30 ரன்கள் கூட எடுத்திருக்கணும்".. இந்தியாவிடம் தோற்றபின் ஷாய் ஹோப் உருக்கம்

முன்னதாக அவர் கேப்டனான பின் பேட்டிங்கில் பெரிதாக ரன் குவிக்கவில்லை, அதிக ஸ்ட்ரைக் ரேட்டில் பேட்டிங் செய்யவில்லை என்ற விமர்சனம் இருந்தது. அந்த விமர்சனத்துக்கு இந்த ஆட்டம் மூலம் பதில் அளித்துள்ளார் ஸ்ரேயாஸ் ஐயர்.