டி20 உலககோப்பை இந்திய அணியில் சுப்மன் கில் இடம் பெறுவார்.. ஆஸ்திரேலிய ஜாம்பவான் கருத்து

இந்தியக் கிரிக்கெட்டின் முன்னணி பேட்ஸ்மேன்களில் ஒருவரான ஷுப்மன் கில், பிப்ரவரி 7 அன்று தொடங்கவிருக்கும் டி20 உலகக் கோப்பைக்கான இந்திய அணியில் இருந்து நீக்கப்பட்டிருப்பது பலருக்கும் ஆச்சரியத்தை ஏற்படுத்தியுள்ளது. பிசிசிஐ அறிவித்த அணியில் இருந்து கில் புறக்கணிக்கப்பட்டதும், இந்த முடிவு ரசிகர்களுக்கும், நிபுணர்களுக்கும் இடையில் தீவிர விவாதத்தை உருவாக்கி வருகிறது.

அஜித் அகர்கர் தலைமையிலான தேர்வுக் குழு, இஷான் கிஷன் மற்றும் ரிங்கு சிங் போன்ற வீரர்களுக்கு அணியில் இடமளித்தது, ஆனால் கில்லுக்கு இடம் அளிக்கவில்லை. இந்த விவாதம் தொடரும் வேளையில், ஆஸ்திரேலிய அணியின் முன்னாள் கேப்டன் மைக்கேல் கிளார்க், ஷுப்மன் கில்லுக்கு ஆதரவளித்து, அவர் மீண்டும் அணிக்குத் திரும்புவது மட்டுமல்லாமல், கேப்டன் பொறுப்பையும் ஏற்பார் என்று கூறியுள்ளார்.

இது குறித்து பேசிய அவர், "அவர் இன்னும் போட்டியில் இருக்கலாம். அது நிறைய மாற்றத்தை ஏற்படுத்தும் என்று நான் நினைக்கவில்லை. அணிகள் ஒரு குறிப்பிட்ட காலத்திற்குள் அறிவிக்கப்பட்டிருக்க வேண்டும், அத்தருணத்தில் அவர் தான் விரும்பும் அளவுக்கு சிறப்பாக பேட்டிங் செய்யவில்லை. இந்தியாவுக்குப் பல தொடக்க பேட்டிங் ஆப்சன் இருக்கின்றன. அவர் இந்தக் கட்டத்தில் அணியின் கேப்டன் அல்ல," என்று கிளார்க் தெரிவித்தார்.

"எனவே, அவர்கள் பெரும்பாலும் முடிவெடுத்துவிட்டார்கள் என்று நினைக்கிறேன். உலகக் கோப்பையில் அவர்கள் என்ன செய்கிறார்கள் என்பதில் இந்த இரண்டு பயிற்சி ஆட்டங்களை ஒரு உண்மையான கவனமாக மாற்ற விரும்பினர். அவரது ஃபார்ம் குறித்து கேள்விகள் இருந்தன. உலகக் கோப்பைக்கு முன்னதாக அவர்கள் இந்த முடிவை குறிப்பாக எடுத்தார்கள்," என்றார்.

கடந்த ஆண்டு அக்சர் படேலுக்குப் பதிலாக கில் இந்திய டி20 அணியின் துணை கேப்டனாக நியமிக்கப்பட்டார். ஆனால், பின்னர் தேர்வுக் குழு தனது முடிவில் ஒரு யூ-டர்ன் எடுத்தது. டி20 உலகக் கோப்பைக்கான குறுகிய வடிவ அணிக்கு அக்சர் மீண்டும் துணை கேப்டனாக நியமிக்கப்பட்டார். இந்த மாற்றம் தேர்வுக் குழுவின் மாறும் அணுகுமுறையை வெளிப்படுத்துகிறது.

டி20 உலகக் கோப்பை முடிந்த பிறகு, ஷுப்மன் கில் சூர்யகுமார் யாதவை முந்தி, இந்தியாவின் டி20 அணிக்குத் தலைமை தாங்குவார் என்று கிளார்க் கருத்துத் தெரிவித்துள்ளார். "உலகக் கோப்பை முடிந்த பிறகு, அவர் அணிக்குத் திரும்புவதுடன் மட்டுமல்லாமல், கேப்டன் பதவியையும் ஏற்றால் ஆச்சரியப்பட வேண்டாம்," என்று அவர் குறிப்பிட்டார்.

"அவர் ஒரு நம்பமுடியாத வீரர். தற்போது தனது சிறந்த கிரிக்கெட்டை வெளிப்படுத்தவில்லை என்றாலும், ஷுப்மன் கில் குறித்து எதிர்காலத்தில் பெரிய கவலைகள் எதுவும் இருக்காது என்று நான் நினைக்கிறேன். இந்த உலகக் கோப்பையில் 100 சதவீதம் கவனம் செலுத்தி, அதை வெல்ல விரும்புகிறோம் என்பதை இந்தியா திட்டவட்டமாகத் தெளிவுபடுத்தியுள்ளது," என்றும் மைக்கேல் கிளார்க் கூறினார்.