முதலிடத்தை இழந்தார் சுப்மன் கில்.. முந்திக்கொண்ட வெஸ்ட் இண்டீஸ் வீரர்.. 2025-ல் அதிக ரன் பட்டியல்

வெலிங்டன்: 2025-ம் ஆண்டில் சர்வதேச கிரிக்கெட்டில் அதிக ரன்கள் குவித்த வீரர் என்ற பெருமையை, இந்திய அணியின் நட்சத்திர வீரர் சுப்மன் கில்லிடமிருந்து வெஸ்ட் இண்டீஸ் வீரர் ஷாய் ஹோப் தட்டிப்பறித்துள்ளார். நியூசிலாந்துக்கு எதிரான டெஸ்ட் போட்டியில் ரன் குவித்ததன் மூலம் அவர் தற்சமயம் முதலிடத்தைப் பிடித்துள்ளார்.

சர்வதேச கிரிக்கெட்டில் (டெஸ்ட், ஒருநாள் மற்றும் டி20) 2025-ம் ஆண்டு அதிக ரன் குவித்தவர்கள் பட்டியலில் சுப்மன் கில் ஆண்டின் துவக்கத்தில் இருந்து ஆதிக்கம் செலுத்தி வந்தார். ஆனால், கட்டாக்கில் நடந்த தென்னாப்பிரிக்காவுக்கு எதிரான டி20 போட்டியில் அவர் சொற்ப ரன்களில் ஆட்டமிழந்தது அவருக்குப் பின்னடைவாக அமைந்தது.

ஷாய் ஹோப் செய்த சாதனை

அதே சமயம், நியூசிலாந்து மற்றும் வெஸ்ட் இண்டீஸ் அணிகள் மோதும் இரண்டாவது டெஸ்ட் போட்டி வெலிங்டனில் நடைபெற்று வருகிறது. இதில் முதல் இன்னிங்ஸில் களமிறங்கிய ஷாய் ஹோப், பொறுப்புடன் விளையாடி 80 பந்துகளில் 48 ரன்கள் சேர்த்தார்.

இந்த இன்னிங்ஸின் மூலம், 2025-ம் ஆண்டில் அதிக ரன்கள் குவித்தவர்கள் பட்டியலில் சுப்மன் கில்லை பின்னுக்குத் தள்ளி முதலிடத்தைப் பிடித்தார்.

புள்ளிவிவரம் என்ன?

ஷாய் ஹோப் (வெஸ்ட் இண்டீஸ்): இதுவரை 41 போட்டிகளில் (47 இன்னிங்ஸ்) விளையாடி 1749 ரன்கள் குவித்து முதலிடத்தில் உள்ளார். இவரது சராசரி 42.65.

சுப்மன் கில் (இந்தியா): 33 போட்டிகளில் (40 இன்னிங்ஸ்) விளையாடி 1736 ரன்கள் குவித்து இரண்டாம் இடத்தில் உள்ளார்.

கட்டாக் டி20 போட்டியில் சுப்மன் கில் 4 ரன்களில் ஆட்டமிழந்தார். அவர் இன்னும் சிறிது நேரம் நிலைத்து நின்றிருந்தால் முதலிடத்தைத் தக்கவைத்திருப்பார்.

இன்று மாறுமா வரலாறு?

இருப்பினும், சுப்மன் கில்லுக்கு முதலிடத்தைப் பிடிக்க இன்று ஒரு வாய்ப்பு காத்திருக்கிறது. இந்தியா - தென்னாப்பிரிக்கா இடையிலான இரண்டாவது டி20 போட்டி இன்று (டிசம்பர் 11) சண்டிகரில் நடைபெறவுள்ளது. இந்தப் போட்டியில் சுப்மன் கில் களமிறங்கி 14 ரன்கள் எடுத்தாலே போதும், மீண்டும் ஷாய் ஹோப்பை பின்னுக்குத் தள்ளி, 2025-ல் அதிக ரன் குவித்த வீரர் என்ற பெருமையை மீண்டும் பெறுவார்.

இந்த ஆண்டு முடிய இன்னும் சில போட்டிகளே எஞ்சியுள்ள நிலையில், முதலிடத்தைப் பிடிக்க இருவருக்கும் இடையே கடும் போட்டி நிலவுகிறது.

2025-ல் அதிக ரன் குவித்த டாப் 5 வீரர்கள்:

ஷாய் ஹோப் (வெஸ்ட் இண்டீஸ்) - 1749 ரன்கள்
சுப்மன் கில் (இந்தியா) - 1736 ரன்கள்
பிரையன் பென்னட் (ஜிம்பாப்வே) - 1585 ரன்கள்
சல்மான் அலி ஆகா (பாகிஸ்தான்) - 1569 ரன்கள்
ஜோ ரூட் (இங்கிலாந்து) - 1540 ரன்கள்