2026ஆம் ஆண்டில் சுப்மன் கில் என்ன செய்ய வேண்டும்? ராபின் உத்தப்பா கருத்து

மும்பை: சுப்மன் கில் தலைமையில் உலக டெஸ்ட் சாம்பியன்ஷிப் இறுதிப்போட்டிக்கு இந்திய அணி தகுதிபெறுவது சவாலாக மாறி இருக்கிறது. பார்டர்-கவாஸ்கர் கோப்பை மற்றும் சொந்த மண்ணில் தென்னாப்பிரிக்காவுக்கு எதிரான டெஸ்ட் தொடர் தோல்விகள், இறுதிப் போட்டிக்கான வாய்ப்பை மிகவும் கடினமாக்கியுள்ளன.

இந்த சூழலில், முன்னாள் இந்திய பேட்ஸ்மேன் ராபின் உத்தப்பா, டெஸ்ட் கேப்டனாக சுப்மன் கில் மேம்பட வாய்ப்புள்ளதாகத் தெரிவித்துள்ளார். வாஷிங்டன் சுந்தர் போன்ற சுழற்பந்து வீச்சாளர்களை கில் குறைத்து மதிப்பிடுவதாகவும் அவர் கூறினார்.

இது குறித்து பேசிய உத்தப்பா, "கேப்டனாக சுப்மன், சுந்தரை நம்ப வேண்டும் என்று நான் நினைக்கிறேன். சில வீரர்கள் ஒரு பந்துவீச்சாளரை எளிதாக விளையாட முடியும் என்று கருதுவதால், அவர்களது திறமையை மற்றவர்களைப் போல மதிப்பிடுவதில்லை. அவர் ஒரு எளிதான பந்துவீச்சாளர் என்று கில் கருதுகிறார். இது மனித இயல்பு. இந்திய கிரிக்கெட்டில் இது இதற்கு முன்பும் நிகழ்ந்துள்ளது. ஆனால், இந்திய கிரிக்கெட்டின் வளர்ச்சிக்கு வாஷிங்டனும் குல்தீப்பும் நிறைய டெஸ்ட் போட்டிகளில் விளையாடி, அதிக ஓவர்கள் வீச வேண்டும்" என்று உத்தப்பா வலியுறுத்தினார்.

"பேட்டிங் மூலம் நாங்கள் போட்டிகளை வெல்ல முடியும், ஆனால் ஒரு தொடரை வெல்ல வேண்டுமெனில் பந்துவீச்சுப் பிரிவு சிறப்பாக செயல்பட வேண்டும். அதற்காக வீரர்களை வளர்க்க வேண்டும். பந்துவீச்சாளர்களுக்கு கள அனுபவம் கொடுக்க வேண்டும். குல்தீப் யாதவை 20-25 ஓவர்கள் வீசச் செய்து, அதற்கு அவர் பழக வேண்டும்," என்றார்.

முன்னதாக, கடந்த ஜூலை மாதம் ஓல்ட் டிராஃபோர்டில் இங்கிலாந்துக்கு எதிரான நான்காவது டெஸ்டின் முதல் இன்னிங்ஸின் 3-ம் நாளில், தன்னை ஏன் பந்துவீச பயன்படுத்தவில்லை எனக் கேட்கப்பட்டபோது, வாஷிங்டன் சுந்தர் சுவாரஸ்யமான பதிலளித்தார்.

"முதல் இன்னிங்ஸில் உங்களால் பந்துவீச முடியும் என்பதை உங்கள் கேப்டன் [சுப்மன் கில்] மறந்துவிட்டாரா?" என்று கேட்டார். இதற்கு சுந்தர், "இந்த முறை நான் எந்த தலைப்பு செய்தியையும் கொடுக்கப் போவதில்லை," என்று பதிலளித்தார். முன்னாள் இங்கிலாந்து கிரிக்கெட் வீரர்கள் ஸ்டூவர்ட் பிராட் மற்றும் நாசர் ஹுசைன் ஆகியோரும் இதைக் கேட்டு சிரிக்கத் தொடங்கினர்.

"களத்தில் உங்கள் குறிப்புகளையும் சைகைகளையும் நீங்கள் மேம்படுத்த வேண்டும். 'நான் தயாராக இருக்கிறேன்' என்று கூறிக்கொண்டே வார்ம் அப் செய்வதைப் போல நீங்கள் காட்ட வேண்டும்," என்று பிராட் கிண்டலாகத் தெரிவித்தார்.பெரும்பாலான நேரம் நான் ஸ்கொயர் பகுதியில் இருப்பேன், எனவே நான் அவ்வப்போது அவரை (கில்லை) கடந்து செல்வேன் என்பதில் உறுதியாக இருக்கிறேன். ஆனால், ஆமாம், அணிக்கு என்ன தேவையோ அதுதான் முக்கியம்," என்று சுந்தர் கூறினார்.