சுப்மன் கில்லுக்கு இனி டி20 கேப்டன் பதவி கிடைக்கவே கிடைக்காது.. பகிரங்கமாக சொன்ன முன்னாள் வீரர்!

மும்பை: சமீபத்தில் நடைபெற்று முடிந்த 2026 டி20 உலகக்கோப்பைக் கிரிக்கெட் தொடரில் சூர்யகுமார் யாதவ் தலைமையிலான இந்திய அணி சாம்பியன் பட்டம் வென்று வரலாற்றுச் சாதனை படைத்தது. இதனைத் தொடர்ந்து, 2028 ஆம் ஆண்டு லாஸ் ஏஞ்சல்ஸ் ஒலிம்பிக் தொடரில் தங்கம் வெல்வதே தமது அடுத்த இலக்கு என சூர்யகுமார் யாதவ் அதிரடியாக அறிவித்துள்ளார். ஆனால், அப்போது அவருக்கு 37 வயதாகிவிடும் என்பதால், இந்திய டி20 அணியின் அடுத்த கேப்டன் யார் என்ற மிகப்பெரிய கேள்வி தற்போது கிரிக்கெட் வட்டாரத்தில் எழுந்துள்ளது.

முன்னதாக, மூன்று வடிவ கிரிக்கெட்டிற்கும் ஒரே கேப்டனை நியமிக்க பிசிசிஐ திட்டமிட்டிருந்தது. அதன்படி, இந்திய டெஸ்ட் மற்றும் ஒருநாள் அணியின் கேப்டனாகச் செயல்பட்டு வரும் சுப்மன் கில், டி20 அணியின் கேப்டனாகவும் நியமிக்கப்படுவார் எனப் பெரிதும் எதிர்பார்க்கப்பட்டது. ஆனால், டி20 போட்டிகளில் கில்லின் பேட்டிங் ஃபார்ம் மிகவும் மோசமாக இருந்ததால், உலகக்கோப்பைக்கான அணியில் கூட அவருக்கு இடம் கிடைக்கவில்லை. இந்நிலையில், சுப்மன் கில்லுக்கு இனி டி20 அணியின் கேப்டன் பதவி கிடைக்க வாய்ப்பே இல்லை என முன்னாள் இந்திய வீரர் ஆகாஷ் சோப்ரா திட்டவட்டமாகத் தெரிவித்துள்ளார்.

இது குறித்து தமது யூடியூப் பக்கத்தில் விரிவாகப் பேசியுள்ள ஆகாஷ் சோப்ரா, இந்திய அணியின் தற்போதைய அதிரடியான ஆட்டத்தைப் பார்க்கும்போது, கில்லுக்கு டி20 அணியில் மீண்டும் இடம் கிடைப்பதே மிகவும் கடினமான ஒன்று என்று கூறியுள்ளார். டி20 உலகக்கோப்பையில் 250 ரன்களை மிக எளிதாகக் குவிக்கும் அளவிற்கு இந்திய அணி விஸ்வரூபம் எடுத்துள்ள நிலையில், அணியில் நங்கூரம் போல் மெதுவாக நிலைத்து நின்று ஆடும் ஒரு வீரர் இனி தேவைப்பட மாட்டார் என்று அவர் சுப்மன் கில்லின் மெதுவான பேட்டிங்கை வெளிப்படையாகச் சுட்டிக்காட்டியுள்ளார்.

இந்தியாவுக்கு உதவி செய்த முட்டாள் அணி தென்னாப்பிரிக்கா.. மைக்கேல் வாகன் சரமாரி விமர்சனம்

மேலும், டி20 கிரிக்கெட்டிற்காகத் தனது அதிரடி பேட்டிங் பாணியை மாற்றி கில் தனது இயல்பான ஆட்டத்தைத் தொலைத்துவிடக் கூடாது என்றும் அவர் அறிவுறுத்தியுள்ளார். ஒருநாள் மற்றும் டெஸ்ட் கிரிக்கெட்டில் மாபெரும் ஜாம்பவானாக உருவெடுக்கும் அபாரத் திறமை சுப்மன் கில்லுக்கு உள்ளது என்பதால், அவர் நீண்ட வடிவ கிரிக்கெட்டில் மட்டுமே முழு கவனம் செலுத்த வேண்டும் என ஆகாஷ் சோப்ரா முக்கியமான ஆலோசனையையும் வழங்கியுள்ளார்.

IND vs PAK: "இந்தியா என்றால் வெற்றி.. பாகிஸ்தான் என்றால்..".. முன்னாள் கேப்டன் லத்தீப் வேதனை: