ஸ்மிருதி மந்தனா புகைப்படங்களை கூண்டோடு அழித்த பலாஷ் முச்சல்.. மோசமான புகார்களை அடுத்து நடவடிக்கை

மும்பை: இந்திய மகளிர் கிரிக்கெட் அணியின் நட்சத்திர வீராங்கனை ஸ்மிருதி மந்தனா மற்றும் இசையமைப்பாளர் பலாஷ் முச்சல் ஆகியோரின் காதல் விவகாரம் தற்போது முடிவுக்கு வந்துவிட்டதாகத் தெரிகிறது. கடந்த நவம்பர் மாதம் நடைபெறவிருந்த இவர்களது திருமணம் திடீரென ரத்து செய்யப்பட்ட நிலையில், தற்போது சமூக வலைத்தளங்களில் நடந்துள்ள ஒரு சம்பவம் ரசிகர்களை அதிர்ச்சியில் ஆழ்த்தியுள்ளது. பலாஷ் முச்சல் தனது இன்ஸ்டாகிராம் பக்கத்தில் இருந்த ஸ்மிருதி மந்தனாவின் புகைப்படங்கள் அனைத்தையும் நீக்கியுள்ளார்.

ஸ்மிருதி மந்தனாவும் பலாஷ் முச்சலும் கடந்த ஐந்து ஆண்டுகளாகக் காதலித்து வந்தனர். பலாஷ் முச்சல் தனது சமூக வலைத்தள பக்கத்தில் ஸ்மிருதி மந்தனாவுடன் எடுத்துக்கொண்ட புகைப்படங்கள், பிறந்தநாள் வாழ்த்துப் பதிவுகள் மற்றும் சுற்றுலா சென்ற புகைப்படங்கள் எனப் பலவற்றை பகிர்ந்திருந்தார். ஆனால், ஞாயிற்றுக்கிழமை அன்று அந்தப் புகைப்படங்கள் அனைத்தும் திடீரென மாயமாகின. தனது இன்ஸ்டாகிராம் பக்கத்திலிருந்து ஸ்மிருதி தொடர்பான அத்தனை சுவடுகளையும் பலாஷ் முச்சல் அழித்துள்ளார்.

தொடர்பைத் துண்டித்தனர்

புகைப்படங்களை நீக்கியது மட்டுமின்றி, இன்ஸ்டாகிராம் தளத்தில் ஒருவரை ஒருவர் பின்தொடர்வதையும் அவர்கள் நிறுத்தியுள்ளனர். அதுவரை ஸ்மிருதிக்கு ஆதரவாகவும், அன்பாகவும் பதிவுகளை வெளியிட்டு வந்த பலாஷின் பக்கம், தற்போது ஸ்மிருதியின் எந்தப் புகைப்படமும் இல்லாமல் வெறுமையாகக் காட்சியளிக்கிறது. இது அவர்கள் இருவரும் நிரந்தரமாகப் பிரிந்துவிட்டதை உறுதிப்படுத்துவதாக அமைந்துள்ளது என்று ரசிகர்கள் கருத்து தெரிவித்து வருகின்றனர். இதன் பின்னணியில் கடந்த சில நாட்களாக வெளிவரும் ஒரு புகாரும் காரணம் என கூறப்படுகிறது.

சமீபத்தில் ஸ்மிருதி மந்தனாவின் நண்பர் ஒருவர், பலாஷ் முச்சல் மீது அடுக்கடுக்கான புகார்களைக் கூறியிருந்தார். பலாஷ் முச்சல் வேறொரு பெண்ணுடன் தொடர்பில் இருந்ததாகவும், அதுவே திருமணம் நிற்கக் காரணம் என்றும் குற்றம் சாட்டப்பட்டது. இந்தக் குற்றச்சாட்டுகளைப் பலாஷ் தரப்பு மறுத்திருந்தாலும், சமூக வலைத்தளங்களில் இது குறித்த விவாதங்கள் சூடுபிடித்தன. இந்தச் சூழலில் தான் பலாஷ் முச்சல் புகைப்படங்களை நீக்கும் நடவடிக்கையை மேற்கொண்டுள்ளார்.

மவுனம் காக்கும் ஸ்மிருதி

இந்த விவகாரம் குறித்து ஸ்மிருதி மந்தனாவோ அல்லது பலாஷ் முச்சலோ இதுவரை அதிகாரப்பூர்வமாக எந்த அறிவிப்பும் வெளியிடவில்லை. ஸ்மிருதி மந்தனா எப்போதும் தனது தனிப்பட்ட வாழ்க்கை குறித்துப் பொதுவெளியில் அதிகம் பேசுவதில்லை. நவம்பர் மாதம் திருமணம் நடக்கவிருந்த நிலையில், நிச்சயதார்த்தம் முறிந்ததற்கான உண்மையான காரணம் என்ன என்பதை இருவருமே வெளிப்படையாகக் கூறவில்லை.

பொதுவாகப் பிரபலங்களின் உலகில், சமூக வலைத்தளங்களில் புகைப்படங்களை நீக்குவது என்பது உறவு முறிந்துவிட்டதற்கான அடையாளமாகவே பார்க்கப்படுகிறது. அந்த வகையில் ஸ்மிருதி - பலாஷ் ஜோடியின் ஐந்தாண்டு காலக் காதல் பயணம் கசப்பான நினைவுகளுடன் முடிவுக்கு வந்துள்ளதாகவே தெரிகிறது.