டிராவிட்டின் கிரிக்கெட் வாழ்வை காப்பாற்றிய கங்குலி.. பிசிசிஐ-க்கு எதிராக எடுத்த துணிச்சல் முடிவு

கொல்கத்தா: இந்திய கிரிக்கெட் அணியின் முன்னாள் கேப்டன் சவுரவ் கங்குலி, ராகுல் டிராவிட்டின் கிரிக்கெட் வாழ்வை பிசிசிஐ தேர்வுக் குழுவிடமிருந்து எப்படிப் போராடிக் காப்பாற்றினார் என்பது குறித்த ரகசியத்தை வெளிப்படுத்தியுள்ளார். 2000-களின் தொடக்கத்தில் டிராவிட்டின் பேட்டிங் வேகம் குறித்து எழுந்த விமர்சனங்களால் அவரை அணியிலிருந்து நீக்க தேர்வுக் குழுவினர் முடிவு செய்தபோது, கங்குலி எடுத்த அந்த ஒரு அதிரடி முடிவு தான் இன்று டிராவிட்டை ஒரு ஜாம்பவானாக நிலைநிறுத்தியுள்ளது.

ராஜ் ஷமானி என்பவரின் யூட்யூப் வீடியோவில் பேசிய கங்குலி, தனது கேப்டன்சி குறித்தும், வீரர்களுக்குத் தான் அளித்த ஆதரவு குறித்தும் விரிவாகப் பேசினார். அப்போது ராகுல் டிராவிட் சந்தித்த இக்கட்டான சூழலை அவர் உதாரணமாகக் காட்டினார்.

தேர்வுக் குழுவின் எதிர்ப்பு

2000-களின் தொடக்கத்தில் ராகுல் டிராவிட் டெஸ்ட் போட்டிகளில் அசைக்க முடியாத வீரராக இருந்த போதிலும், ஒருநாள் போட்டிகளில் அவரது 'ஸ்டிரைக் ரேட்' எனப்படும் ரன் குவிக்கும் வேகம் குறைவாக இருப்பதாகப் புகார்கள் எழுந்தன. பிசிசிஐ தேர்வுக் குழுவினர் டிராவிட்டிற்குப் பதிலாக வேறு ஒருவரைத் தேர்வு செய்ய வேண்டும் என கங்குலியிடம் வலியுறுத்தினர்.

"அப்போது டிராவிட்டை நான் அணியிலிருந்து நீக்கியிருந்தால், அவருடைய ஒருநாள் போட்டி வாழ்க்கை அங்கேயே முடிந்திருக்கும். ஆனால் அவரை அணியில் தக்கவைக்க நான் விரும்பினேன். அதே சமயம் அணிக்கு ஒரு சமநிலையும் தேவைப்பட்டது" என்று கங்குலி அந்தச் சூழலை விவரித்தார்.

விக்கெட் கீப்பர் அவதாரம்

அப்போது உலக கிரிக்கெட்டில் ஆஸ்திரேலியாவிடம் ஆடம் கில்கிறிஸ்ட், தென்னாப்பிரிக்காவிடம் மார்க் பவுச்சர், இலங்கையிடம் சங்கக்காரா எனப் பேட்டிங்கில் மிரட்டக்கூடிய விக்கெட் கீப்பர்கள் இருந்தனர். ஆனால் இந்தியாவிற்கு அது போன்ற ஒரு வீரர் இல்லை. இதனால் 6-வது வீரரோடு இந்தியாவின் பேட்டிங் முடிந்துவிடும் சூழல் இருந்தது.

இந்த இடத்தில்தான் கங்குலி ஒரு வியூகம் சார்ந்த முடிவை எடுத்தார். ராகுல் டிராவிட்டை விக்கெட் கீப்பராகச் செயல்படுமாறு கேட்டுக்கொண்டார். இது ஒரு தற்காலிக முயற்சியாக இல்லாமல், இந்திய அணியின் கட்டமைப்பையே மாற்றியமைத்தது. டிராவிட் விக்கெட் கீப்பிங் செய்ததால், முகமது கைஃப் போன்ற ஒரு கூடுதல் அதிரடி பேட்ஸ்மேனை 7-வது இடத்தில் சேர்க்க கங்குலிக்கு வாய்ப்பு கிடைத்தது.

ஆல்-ரவுண்டர் பற்றாக்குறை

இந்திய அணியில் அப்போது தரமான ஆல்-ரவுண்டர்கள் இல்லாத குறையைச் சுட்டிக்காட்டிய கங்குலி, சேவாக், சச்சின், யுவராஜ் மற்றும் தான் எனப் பகுதிநேரப் பந்துவீச்சாளர்களைக் கொண்டு அந்தப் பற்றாக்குறையைச் சமாளித்ததாகக் கூறினார். டிராவிட்டை விக்கெட் கீப்பராக மாற்றிய இந்த முடிவுதான் 2003-ம் ஆண்டு உலகக் கோப்பையில் இந்திய அணி இறுதிப் போட்டி வரை செல்ல மிக முக்கியக் காரணமாக அமைந்தது.

IPL 2026: 6 மேட்ச் தோற்ற கொல்கத்தா அணியால் பிளே ஆப் போக முடியும்.. இதுதான் புள்ளிப்பட்டியல் கணக்கு!

ஒரு வீரரின் திறமை மீது நம்பிக்கை வைத்து, அவருக்குப் புதிய பொறுப்புகளை வழங்கி, தேர்வுக் குழுவின் அழுத்தத்தையும் மீறி கங்குலி எடுத்த அந்த முடிவு, இந்திய கிரிக்கெட் வரலாற்றின் மிகச் சிறந்த நகர்வுகளில் ஒன்றாக இன்றும் கருதப்படுகிறது. திரைக்குப் பின்னால் டிராவிட்டிற்காக கங்குலி நடத்திய அந்தப் போராட்டம் ரசிகர்கள் பலரையும் நெகிழ்ச்சியடையச் செய்துள்ளது.